أغرب الروبوتات في العالم

الروبوتات هى عبارة عن آلأت تم تصميمها بغرض القيام بمهام ووظائف مختلفة، الروبوت ده ممكن يكون أى حاجة مهما كان شكله، لكن المهم أنه يكون آلة معتمدة على السوفت وير والهندسة الميكانيكية فى نفس الوقت، وعن طريق الإتنين دوول يقدر الروبوت إنه يشتغل ذاتياً أو بمساعدة بسيطة من البشر، يعني بمعنى أوضح مش كل آلة ميكانيكية يتقال عليها روبوت، وفي نفس الوقت الروبوت مش مجرد برنامج، الروبوت الإتنين مع بعض، يعنى نقدر نقول أن العربية العادية اللى انت بتسوقها،هى مجرد آلة ميكانيكية، إنما بقى العربيات الجديدة اللى بتتمتع بخاصية القيادة الذاتية، فهي دي اللى روبوت.

أول آلة يطلق عليها روبوت

تعتبر الآلة “هيربرت تليفوكس Herbert Televox” اللى صممها المهندس الأمريكى “رون وينسلي Roy Wensley” عام 1927، هى أول آلة تم اطلاق كلمة روبوت عليها فى العصر الحديث، والآلة دى كانت فى البداية عبارة عن جهاز أنسر ماشين answer machine بدائى، وعشان كده تم تصميم الآلة دي بقدر الإمكان عشان توحي بالشكل البشرى، وتم تزويدها بأطراف ميكانيكية وكانت بتعتمد بشكل أساسى على سلسلة من الدوائر الكهربائية المظبوطة على إنها تستجيب لإهتزازات بترددات معينة، وعن طريقها بيقدر Televoxانه يرفع سماعة التليفون ويقول رسالة مسجلة، ومع الوقت حاول “وينسلي” انه يضيف بعض المهام لـ Televox، زى مثلاً انه يحاول يخليه يمسك بإيده التانية علم البلاد، أو حتى يمسك أداة لمسح الأرضيات أو غيرها من المهام المختلفة.
الموضوع ده عمل ضجة فى الجرائد والإعلام، وبدأت الناس تبص على الآلة الجديدة دي كأنها إنسان من المعدن، وعشان كده نشأت كلمة الإنسان الآلى اللى بقت فيما بعد علَمَ على الروبوتات.

كلاب منزلية

زى ما قولنا فى البداية الروبوت مش بالضرورة يبقى على شكل إنسان، ومع تقدم العلم ظهرت كتير من الروبوتات اللى شكلها أبعد ما يكون عن البشر، تصميمات تنوعت ما بين أشكال هندسية و اشكال حيوانية أو حتى أشكال للحشرات الصغيرة.
الشركة الامريكية Boston Dynamics قاممت بتصميم روبوتات مختلفة على شكل ووظائف الكلاب المنزلية الاليفة او حتى الكلاب العسكرية القوية، أنتجت Boston Dynamics الروبوت الشهير Spot، و Spot ده ما هو إلا روبوت رشيق بيقدر يحاكى حركات الكلاب الحقيقية، فبيقدر إنه يمشى ويجري ويحافظ على إتزانه كمان، لكنه بيقدر يتفوق على الكلاب الحقيقية فى مهارات تانية، زي إنه بيقدر يراقب بيانات الطقس ودرجات الحرارة وسقوط الأمطار، ويقدر كمان إنه يحذرك من المواقع الخطرة او الملوثة بالإشعاع، بالإضافة إنه عنده قابلية إضافة الملحقات اللى تخليه يقوم ببعض الاعمال المختلفة، زي مثلاً إنه يجيب كوب من المياه أويفتح الباب أو حتى يرمي القمامة وهكذا.

والروبوت Spot بيوصل وزنه لحوالى 25 كجم، لكن عيبه الوحيد بقى إن سعره مرتفع جداً وبيعمل 74500 دولار أمريكي.

كلاب عسكرية

Boston Dynamics لم تكتفي من إنتاج SPOT، أنتجت كمان الروبوت العسكرى BigDog، واللى هو فى الحقيقة يعتبر نوع من أنواع البغال الميكانيكية القادرة على حمل المؤن والمعدات، وطبعا الفائدة الرئسية لـ BigDog انه بيقدر يتحرك على التضاريس الصعبة، وتم تصميمه بحيث إنه يكون قادر على حمل أوزان بتوصل لـ 150 كجم، وبيتحرك بيها على التضاريس الصعبة جانب جندى المشاة كأنه جندى وظيفته حمل المتاع، وبيقدر وهو شايل الوزن الأقصى انه يتحرك بسرعة 6.4 كم / ساعة، وفى نفس الوقت بيقدر انه يتعامل مع المنحدرات اللى بتوصل لـ 35 درجة بدون أى مشاكل.

روبوت الكانجرو

شركة Festo الألمانية هى واحدة من أكبر الشركات فى العالم المغرمة بأشكال الروبوتات الغريبة، أنتجت الشركة روبوت “بايونيك كانجرو BionicKangaro”، واللى من اسمه كده واضح انه محاكى لحيوان الكانجرو، والروبوت ده بيزن 7 كجم وبيبلغ ارتفاعه عن الارض متر كامل، وبيقدر انه يقفز بطريقة مماثلة لحيوان الكانجرو، وبيحتوى على نظام استشعار عن بعد بيشتغل عن طريق وحدة تحكم بتكون مع مالك الروبوت، فبيقدر المستشعر ده انه يقرأ الإشارات الكهربائية العضلية للمالك، والمدهش أكتر هو القوة الكبيرة للمستشعر ده، اللى ببيقدر إنه يترجم الإشارات لمدى كبير بيوصل لكيلو متر كامل.

روبوت على شكل دب لمساعدة المرضى

اتكلمنا عن شركة أمريكية وشركة ألمانية، لكن ماينفعش نتكلم عن صناعة الروبوتات من غير ما نذكر اليابانيين، فالشركة اليابانية Sumitomo Riko، هى واحدة من الشركات اللى بتنتج الروبوتات الحيوانية الغريبة، ومن اشهر روبوتات الشركة دى هو ممرض المستشفى الروبوت “روبير Robear”، وروبير ده عبارة عن روبوت على شكل دب بيزن حوالى 140 كجم، بيتميز بقدرته على مساعدة المرضى وكبار السن وأصحاب الهمم، وده لأنه بيقدر ينقل المريض من سرير لكرسي متحرك مثلاً، أو حتى لدورات المياه وغيرها من المساعدات اللى ممكن يتحرج البعض انه يطلبها من البشر، وبيتميز روبير بقوته الكبيرة وهدوء حركته، وبيحتوى على مستشعرات لعزم الدوران وأجهزة لمس ذكية بتسمح له بالحركة اللطيفة وتجنب السقوط وتعريض المرضى للخطر، وبتتكون الاجزاء الخارجية له من المطاط بالكامل، وهو الأمر اللى بيوفر للمرضى الشعور بالراحة أثناء الإنتقال من مكان لمكان.

أسراب من الحشرات

الروبوتات الغريبة أشكالها لم تقتصر على الحيوانات الكبيرة لوحدها، إنما حتى الحشرات كان ليها نصيب كمان من صناعة الروبوتات، بتعتمد الروبوتات اللى بتُصنع على شكل حشرات على تقنية السرب أو الـ Swarm، التقنية دي بتكون نظام كامل بيتكون من أعداد كبيرة من الحشرات بيكون بينها تعاون وإتصال، والروبوتات اللي من النوعية دى بتكون مفيدة للوظائف اللى بتتطلب تغطية مساحات كبيرة فى وقت واحد، والنوعية دي من الروبوتات بيتم تطويرها من عدد من الشركات والمؤسسات المختلفة ومنهم وكالة ناسا نفسها، وبتهدف ناسا لتطوير أسراب من الروبوتات لاستخدامها فى مختلف التطبيقات خارج كوكب الأرض، وفيه شركات بتهدف لإستخدام النوعية دي من الروبوتات فى جهود التعدين والصناعة وعمليات البحث والإنقاذ، وبتتنوع الروبوتات دي ما بين أسراب نمل أو نحل او حتى فراشات، والشركة الألمانية Festo بتطور أسراب روبوتية من النمل بيبلغ طول كل نملة منهم 13.5 سم، والأسراب دي بتشتغل مع بعض بنظام ووفق قواعد صارمة زى حياة النمل بالظبط، وبتقدر أسراب النمل انها تتواصل مع بعضها البعض عن طريق المستشعرات ووحدات الراديو على أجسامهم، وبيقدر النمل الروبوتى ده انه يشتغل بصورة متواصلة لمدة 40 دقيقة، وبعدها بيروح منه لنفسه عشان يرجع يشحن من تاني.

الثعلب الطائر

لو كان النمل و النحل مش غريب بما فيه الكافية فعندنا كمان خفافيش، الروبوت BionicFlyingFox هو محاكاة لأكبر نوع من الخفافيش موجودة فى العالم، وهو النوع الشهير بالثعلب الطائر، بيوصل طول جناحاته المصنوعه من الجلد لـ 228 سم، أما طول جسمه لوحده فهو 87 سم، ووزنه 580 جرام، وهى المواصفات اللي تعتبر قريبة نوعاً ما للنوع الحقيقى من الخفافيش دي، والأجنحة مصنوعة من نوع من الجلد الرقيق للمساهمة فى تخفيف الوزن، وعلى الرغم من رقة الجلد دي إلا إن الجلد قوى وبيمتاز بالمرونة، و الـ BionicFlyingFox بيستخدم عدد من الاجهزة الالكترونية المدمجة اللى بتسمحله بالطيران بنفس طريقة الطيارات الطبيعية، فالخفاش عنده طيار آلى ونظام تتبع للحركة الخارجية، وكاميرتين بيشتغلوا بالأشعة تحت الحمراء وغيرها، بالإضافة كمان إلى إن الخفاش بيكون محدد له مجال جوى بنفس أسلوب الطائرات، والخلاصة إن الخفاش الطائر ده ماهو الا نوع متطور من الطائرات اللى بدون طيار.

روبوتات بأشكال عجيبة

الروبوتات الغريبة لم تقتصر على الأشكال البشرية والحيوانية بس، الروبوت “هاندل Handle” هو روبوت متحرك بيجمع بين القدرة على الحركة فى التضاريس الصعبة وكمان القدرة على استخدام المقبض بتاعه لمناولة المواد، وبيتميز Handle بذراع قوية قادرة على حمل الصناديق الثقيلة من إرتفاعات بتوصل لـ 2 متر، وبيقدر انه يستمر فى الحركة على امتداد 25 كم كاملين، أما سرعته القصوى فبتوصل لـ 15 كم فى الساعة.

الروبوت “مورو MoRo” من إنتاج شركة Ewaybot الصينية، و الروبوت ده مش مفهوم شكله أصلاً، إنما هو حاجه كده شبه الخلاط بتاع المطبخ بس بدراعات، وعموما MoRo هو مساعد منزلى ممتاز وبيقدر يتعامل مع كل أدوات المطبخ او حتى المختبر، يعنى يقدر يشيل كبايات أواني أو حتى مواد كاوية كله شغال، وكمان بيقدر MoRo إنه يقوم بتنفيذ المهام دى عن طريق الأوامر الصوتية، وبيقدر انه يستمر فى الشغل عن طريق بطارية بتمده بالطاقة لمدة 8 ساعات متواصلة، انما بقى عيب MoRo هو العيب المعتاد للنوعية دى من الروبوتات، وهو السعر المرتفع اللى بيبلغ 30 ألف دولار، إنما الشركة الصينية Ewaybot بتقول ان عندها خطط طموحة لخفض التكلفة عشان توسع قاعدة إنتشار MoRo فى المدارس والمنازل والمختبرات.