أي عدسة كاميرا موجودة حوالينا سواء في الكاميرات البروفيشنال أو حتى في كاميرات الموبايل شكلها بيكون دائري، والشكل ده ثابت في معظم إن لم يكن كل الكاميرات لكن بالرغم من كده لما بنيجي نلقط أي صورة وبعدين نبص عليها بنلاحظ إن الصورة دي بتكون واخدة شكل مربع أو مستطيل، فياترى إيه السبب؟
عدسة الكاميرا
في العادة لما بنيجي نصور أي جسم موجود قدامنا فاللي بيحصل هو إن الضوء الساقط على الجسم ده بيدخل مباشرة لـ (عدسة الكاميرا) وبتبدأ العدسة فورًا تعكس الضوء ده وتعمله تركيز على نقطة أو مكان معين داخل الكاميرا من جوا، والمكان ده معروف في الكاميرات القديمة باسم “الفيلم” وفي الكاميرات الرقمية الحديثة بيُطلق عليه أو الـ sensor او الحساس او مستشعر الضوء،
الشاهد في الأمر بقى إن مصنعي الكاميرات الأوائل لما جربوا كل أشكال العدسات لاحظوا إن العدسات المستديرة هي الأكثر فاعلية في تركيز الضوء على مسطح الفيلم، طيب يعني معنى الكلام ده إنه ينفع يبقى في عدسة كاميرا مستطيلة؟ في الواقع أيوه، العدسات دي موجودة عادي جدًا وممكن يتم استخدامها، لكن تركيز الضوء من خلالها مابيكونش أفضل من الدائرية، وعلشان كده كل مصنعي الكاميرات بيميلوا أكتر لإستخدام عدسات مستديرة، من الجدير بالذكر إن لما الضوء بيسقط على المستشعر بيبقى واخد نفس شكل العدسة وبيكوِّن شكل دائري، يعني الصور اللي جوا الكاميرات في الأساس بتكون فعلا دائرية زى العدسة.
طب ليه بقى لما بنشوف الصور اللي بتطلع في النهاية بنلاقيها عِبارة عن مستطيل أو مربع؟
السر في الوضوح
الموضوع راجع لعدة أسباب :
أول سَبب فيهم إن الصور الدائرية بالرغم من إنها بتكون صور دقيقة وواضحة إلا إن الحواف الخارجية للصورة بيبقى فيها دايما بعض التشوهات أو الإنحرافات، في حين إن مركز الصورة بيكون واضح جدًا، وعلشان كده لجأوا لفكرة معينة وهي إنهم ياخدوا جزء مربع فقط من منتصف الصورة الدائرية ويتم استخراجه من الكاميرا لأن الجزء ده تحديدًا بيكون الأوضح، ده غير إن كل الاجهزة اللى احنا بنستهلك عليها الصور أو الفيديوهات بوجه عام أما مستطيلة او مربعة.