أطول ساعات صيام في العالم

عدد ساعات الصيام في دولة زي مصر مثلاً، في بداية شهر رمضان، بتكون حوالي 14 ساعة و 20 دقيقة؛ أذان الفجر عادةً في حدود الرابعة صباحًا، والمغرب بيكون في حدود السادسة والنصف مساءًا، اللي كتير من الناس مش مُنتبهين ليه بقى، هو إن مش دا الوضع في باقي دول العالم، مش كل دول العالم بتصوم ساعات صيام متوسطة زي مصر وغيرها من الدول المجاورة، ولكن فيه إختلاف واضح في توقيت الإمساك والإفطار بين الدول وبعضها، ومانقصدش هنا اختلاف بمقدار دقائق مثلاً، ولكن الإختلاف ده بيكون كبير بشكل ملفت، فيه دول بتصوم فترات زمنية أطول مننا بكتير، وده على حسب الموقع الجغرافي للدولة.
طبقًا لحسابات الفلك الحالية، الدول القريبة من شمال الكرة الأرضية بتطول فيها ساعات الصيام جدًا مقارنةً بالدول القريبة من نصف الكرة الجنوبي، فلو إحنا في مصر بنصوم حوالي 14 ساعة، ففي دول أخرى في النصف الشمالي، بتتخطى فيها ساعات الصيام حاجز الـ 23 ساعة.

الجزائر

دولة الجزائر بتسجل أطول ساعات صيام بين الدول العربية، وكذلك في قارة أفريقيا بالكامل، وده راجع لموقع الجزائر الجغرافي؛ ودا لأنها أقرب لنصف الكرة الشمالي دونًا عن غيرها من الدول الأفريقية، بخلاف (تونس)، واللي هنتكلم عنها كمان شوية.
ده غير إن مساحة الجزائر الضخمة وكونها عاشر أكبر دولة في العالم، بمساحة تتعدى الـ 2 مليون و382 ألف كيلومتر مربع، فده مخليها تنتشر على مساحة جغرافية أكبر، وبالتابعية بيحصل داخل أرضها إختلاف كبير في عدد ساعات النهار دونًا عن غيرها من الدول المجاورة.
بتصل عدد ساعات الصيام في الجزائر لحوالي 16 ساعة بنهاية شهر رمضان.

تونس

دولة تونس بالرغم من كونها دولة صغيرة في المساحة مقارنةً بجارتها الجزائر، ومش منتشرة على مساحة جغرافية واسعة؛ وده لأن مساحة تونس تقدر بحوالي 163 ألف كيلومتر مربع فقط، إلا إنها بتشارك الجزائر في مرتبة أكثر الدول العربية والافريقية طولاً في عدد ساعات الصيام، بالرغم من صِغر حجم الدولة إلا إنها بتقع تقريبًا في أعلى نقطة في من قارة أفريقيا، وبالتالي قريبة جدًا من نصف الكرة الشمالي دونًا عن غيرها من الدول الأفريقية المجاورة، وده أدى لإن ساعات الصيام على أرضها تطول بشكل ملحوظ.
دولة تونس بتسجل عدد ساعات صيام بتوصل أيضًا لحوالي 16 ساعة بنهاية شهر رمضان.

المملكة المتحدة

خارج قارة أفريقيا، معظم الدول الأوروبية بتكون أطول في ساعات الصيام مقارنةً بالدول الأفريقية؛ وده نظرًا لأن قارة أوروبا بالكامل أقرب لنصف الكرة الشمالي، والمملكة المتحدة هي واحدة من الدول دي.
شهر رمضان في المملكة المتحدة مؤثر جدًا؛ وده نظرًا لإن الإسلام تقريبًا بيُعد تاني أكبر ديانة في المملكة، بيعيش في إنجلترا وويلز حوالي 3 مليون مسلم، وعدد المسلمين هناك بيزداد بشكل ملحوظ.
وأخيرًا ساعات الصيام في المملكة المُتحدة بتقع في المتوسط من 16 لـ 17 ساعة.

ألمانيا

بالقرب من المملكة المتحدة بتوجد ألمانيا، واللي تقريبًا بتشارك المملكة في نفس عدد ساعات الصيام، بيُقدّر عدد المسلمين في ألمانيا بحوالي 5 مليون شخص، وحوالي 6 % من إجمالي السكان الألمان، مسلمين، وغالبيتهم أتراك أو من أصول تركية، ونسبة العرب المسلمين هناك حوالي مليون شخص.
وفي ظل الأجواء الرمضانية في ألمانيا، فساعات الصيام هناك بتقع أيضًا في المتوسط من 16 لـ 17 ساعة.

روسيا

بالانتقال للحدود بين قارة أوروبا وقارة أسيا، وتحديدًا على الأراضي الروسية، فـ روسيا تعتبر واحدة من أكثر دول العالم طولاً في ساعات الصيام، الإسلام في روسيا بيُعد تقريبًا تاني أكبر ديانة في البلد؛ وده نظرًا لإن روسيا بيُحيط بيها عدد كبير من الأقاليم والدول الإسلامية من عدة إتجاهات.
والمدن الروسية بتختلف بينها وبين بعضها في عدد ساعات الصيام وكذلك في فترة الصيام، وده راجع طبعًا للمساحة الشايةسعة اللي بتغطيها روسيا، وكونها أكبر دولة في العالم بمساحة تتعدى الـ 17 مليون كيلومتر مربع.
وعشان كده مدينة زي مدينة (مورمانسك) واللي بتبعد عن العاصمة موسكو حوالي 19 ألف كيلومتر، ساعات الصيام فيها طويلة جدًا مقارنةً بغيرها من المدن الروسية.
وبتصل ساعات الصيام داخل مدينة (مورمانسك) حوالي 18 ساعة متواصلين، وبالرغم من كده، إلا إن مسلمي المنطقة بيحرصوا بشدة على القيام بالعبادات الرمضانية والإلتزام بأداء الصلاة وتنظيم الموائد، وتبادل المعلومات الدينية والثقافية بينهم وبين بعض.

السويد

الدولة اللي بتلي روسيا في القائمة، هي دولة صغيرة بتقع في قارة أوروبا، والدولة دي، هي السويد، السويد من أكثر دول العالم طولاً في ساعات النهار، وبالتابعية هي أكثرهم في عدد ساعات الصيام؛ وده نظرًا لموقعها الجغرافي في أعلى قارة أوروبا.
السويد بالرغم من كونها دولة صغيرة في الحجم، إلا إنها بتحتوي على نسبة كبيرة من المسلمين، لا يُستهان بيها إطلاقًا، ووفقًا لإحصائيات عام 2017 فـ عدد المسلمين في السويد يُقدر بحوالي 8.1% من إجمالي عدد السكان، واللي عددهم بيبلُغ حوالي 10 مليون شخص ومش بس كده، السويد بتحتوي على مركز وجمعية ومدرسة إسلامية في مقاطعة استكهولم، وبتحتوي على رابطة إسلامية في نفس المُقاطعة، ومركز إسلامي، وجمعية إسلامية في مدينة (مالمو) تالت أكبر مدينة في السويد من حيث عدد السكان، ده غير إن البلد بتحتوي على حوالي 17 مركز إسلامي في المدن الرئيسية.
وأخيرًا عدد ساعات الصيام في السويد بتتراوح من 17 لـ 18 ساعة في نهاية شهر رمضان.

النرويج

دايمًا بعد دولة السويد بيتم ذِكر دولة النرويج بعدها بالتابعية، وكأنهم توأم متطابق؛ وده نظرًا لاشتراكهم في نفس الموقع والمساحة الجغرافية تقريبًا، وبما إن الموقع الجغرافي هو مربط الفرس في موضوع التوقيت، فده بيخلي النرويج تتصدر المشهد هي كمان من حيث عدد ساعات الصيام، وزي ما إنتشار الإسلام في السويد له نصيب كبير وبارز فنفس الحال تقريبًا داخل دولة النرويج، الإسلام هناك من أكثر الديانات إنتشارًا، وبتُقدر نسبة الجالية المسلمة داخل النرويج بحوالي 4% من إجمالي عدد السكان، وده رقم كبير جدًا مقارنةً بعدد المعتقدات الأخرى الموجودة في المكان، لدرجة إن البعض بيعتبر الإسلام تاني أكثر المعتقدات إنتشارًا في النرويج.
وأخيرًا عدد ساعات الصيام داخل النرويج بيُقدر بمتوسط من 17 لـ 18 ساعة.

فنلندا

داخل حيز قارة أوروبا، تعتبر فنلندا أطول الدول الأوروربية من حيث ساعات الصيام، فنلندا هي أحد الدول الاسكندنافية بالمشاركة مع النرويج والسويد، وبيشكل الإسلام نسبة ضئيلة جدًا في فنلندا؛ وده نظرًا لإن عدد السكان والمقيمين من معتنقي الديانة الإسلامية في البلد بيصل عددهم تقريبًا لـ 100 ألف إنسان، وعلى الرغم من كده بيقدروا يمارسوا الشعائر الدينية بحرية تامة.
ومن الجدير بالذكر إن فنلندا في بعض السنوات وصل طول عدد ساعات النهار على أرضها لحوالي 23 ساعة، وكانت في الوقت ده بتحمل لقب أطول الدول في ساعات النهار على الإطلاق.
وعدد ساعات الصيام في فنلندا بتصل لـ 19 ساعة كاملين.

أيسلندا

أيسلندا أو جزيرة أيسلندا، بالرغم من كونها دولة أوروبية، إلا إنها موجودة في مكان مُنعزل داخل المحيط الأطلنطي، وتحديدًا في الجزء الشمالي منه.
المُسلمين في أيسلندا عددهم ضئيل ويُقدروا بالمئات، وبيتمركزوا في الجزء الشمالي من البلدة، ونسبة المسلمين الضئيلة راجعة في الأساس لصغر حجم الجزيرة واللي بيقدر بحوالي 100 كيلومتر مربع فقط، والجزيرة بالرغم من كونها صغيرة في الحجم، إلا إن موقعها الجغرافي بيخلي الشمس تقريبًا ما بتغيبش عن المكان في موسم الصيف إلا سويعات قليلة جدًا، واللي بدوره بيخلي نهار رمضان على الأراضي دي طويل جدًا.
وبالفعل عدد ساعات الصيام داخل أيسلندا ممكن توصل لـ 20 ساعة تقريبًا، وبكده تكون الدول الإسكندنافية بشكل عام، من أطول ساعات الصيام في دول العالم.

جرين لاند

بالخروج تمامًا من قارة أوروبا والإنتقال لأقصى الغرب، بتوجد جزيرة عملاقة في منطقة القطب الشمالي والمحيط الأطلسي، والجزيرة دي ما هي إلا جرين لاند.
جزيرة جرين لاند بتحتوي على نسبة ضئيلة جدًا من المسلمين؛ وده نظرًا لإن سكان الجزيرة بوجه عام عددهم قليل جدًا بسبب الظروف المناخية القاسية، ولو بنتكلم طول الحلقة عن إن المناطق القريبة من نصف الكرة الشمالي، عدد ساعات الصيام فيها بتكون طويلة، فـ جرين لاند تقريبًا بتقع في القطب الشمالي نفسه، وقريب جدًا من المنطقة، وبناءًا عليه في أجزاء على جزيرة جرين لاند، الشمس مش بتغرب عنها تقريبًا في موسم الصيف، وعشان كده ساعات الصيام على الجزيرة في بعض الأوقات، ممكن تصل في المتوسط من 21 لـ 22 ساعة متصلة.