أكتر حيوانات مفجوعة في العالم

بعض الناس تحسهم مش بياكلوا عشان يعيشوا أد ما بيعيشوا عشان ياكلوا، ولعل كل واحد فينا يعرف من أصحابه حد أكّيل، يعني مهما حطيت قدامه ممكن يقوم بالليلة كلها وبدون أي مساعدة، النوعية دِه لو جاعت ممكن تبقى مشكلة كبيرة على الشلة كلها، وفي عالم الحيوان فيه حيوانات مفجوعة في الأكل بشكل مش ممكن تتصوره، بس الفرق هنا إنهم بياكلوا عشان يعيشوا.

1- الزبابة القزمة الأمريكية American Pygmy Shrew

تخيل حيوان ما بينامش في يومه غير دقائق معدودة عشان ما يبطلش أكل، ولو قعد ساعتين من غير أكل يموت فيها، الزبابة القزمة الأمريكية أو الـ American Pygmy Shrew، هو حيوان أشبه بالفأر كده بيعيش في الأجزاء الشمالية من قارة أمريكا الشمالية، مع وزن يتراوح من 2 جرام لـ 4 جرام وطول يُقدر بـ 5 سم ، ويعتبر هو أصغر الثدييات على وجه القارة الأمريكية بل ومن أصغر الثدييات على مستوى العالم كله؛ وبسبب سرعة الإيض عنده أو عملية تحويل الطعام لطاقة مطلوب من الحيوان ده ياكل 3 أضعاف حجمه يوميًا، يعني لو وزنه عامل 4 جرام مثلاً هيبقى مطلوب منه ياكل كل يوم 12 جرام؛ وعشان تجمع معايا أد ايه الموضوع صعب فتخيل إنسان وزنه 70 كجم مثلاً مطلوب منه ياكل يوميًا 210 كجم وإلا يموت؛ وبسبب النقطة دِه فالزبابة القزمة لازم تلاقي أكلها من حشرات ودود وخلافه كل 15 لـ 30 دقيقة مش أكتر ، وده عشان يعرف يعمل الـ 12 جرام اللي محتاجهم على مدار اليوم، وده معناه إنه ما يقدرش ينام غير لدقائق معدودة في المرة الواحدة على السريع كده، ولو ماعرفش يلاقي أكل في ظرف ساعتين ممكن يموت فيها.

2. أفعى البايثون البورمية Burmese python

تخيل معايا لو واحد وزنه عامل مثلاً 60 كجم وبياكل وجبة وزنها 65 كجم أو 70 كجم في قعدة واحدة.. لأ، وبلع كمان، أفعى البايثون البورمية تعتبر واحدة من أكبر الثعابين على مستوى العالم طولها بيتراوح من 4 متر لـ 7 أمتار كاملين ووزنها ممكن يوصل لـ 90 كجم، وبالرغم إنها مش بتاكل غير مرة واحدة بس في الشهر لكنها مش بترحم في الوجبة دِه وبتختار فرائس عجيبة جدًا تتغذى عليها أكلها في الأساس مرتكز على الطيور والثدييات الصغيرة بس أحيانًا بتهب منها وبتاكل فرائس في منتهى الخطورة زي ما تم رصدها وهي بتفترس ضباع، وأحيانًا بتتغذى على فرائس أضخم منها في الحجم، والأعجب إنها بتبلع فريستها زي ما هي مرة واحدة، البايثون مش من الثعابين السامة ولا حاجة، لكن عندها أنياب حادة بتعض بيها فريستها قبل ما تلف عليهم وتعصرهم لحد ما تخنقهم وفي النهاية تبلعها، بس إزاي بتبلع الفريسة زي ما هي مرة واحدة خصوصًا لو كانت أكبر منها في الحجم؟، معروف عن البايثون إن عندها أربطة مطاطية في فكها بتساعدها في قصة البلع، لكن فيه دراسة تم إجرائها عام 2013 كشفت عن حاجة عجيبة جدًا في جينات البايثون البورمية، أثناء الهضم جينات الأفعى بيحصلها حالة تغير في نشاطها وكأنها بتفعل خاصية في جسمها بتزود من سرعة عملية الإيض عندها، بل إن أعضائها في الفترة دِه بيزداد حجمها بشكل مخيف لدرجة إنه بيوصل لـ 150% من حجمها الأصلي، وبتفضل على الحال ده لفترة تتراوح من 24 ساعة لـ 48 ساعة لحد ما تهضم وبعدها ترجع لحجمها الطبيعي مرة تانية.

3. طائر الطنان

طائر الطنان من الطيور اللي تبهرك بصفاتها، وشهيتها المفتوحة واحدة من الصفات دِه، على مستوى العالم فيه أكتر من 350 نوع من طيور الطنان أو الـ Hummingbirds كلهم بيعيشوا في الجزء الشمالي من الكرة الأرضية ومعظم الأنواع بتلاقيها في المناطق الاستوائية على وجه التحديد، والطيور دِه بتمتاز بحجم صغير مش كبير فنلاقي إن معظمها بيتراوح طوله بين 7.5 سم لـ 13 سم في المتوسط، ووزنهم من جرامين لـ 20 جرام، وطائر الطنان بيمتلك أسرع معدل إيض بين جميع الحيوانات على الإطلاق، ولك أن تتخيل إن الطائر ده قلبه بينيض بمعدل 1200 مرة في الدقيقة الواحدة، في حين أن الإنسان قلبه بيدق من 60 لـ 100 مرة في الدقيقة، ولو ده غريب بالنسبالك فحضر نفسك للأغرب من كده كمان؛ حركة جناحات الطنان أثناء الطيران بتبقى من السرعة اللي بيصعب معاها ملاحظاتها من الأساس لدرجه إن فيه من طيور الطنان اللي بيضرب بجناحاته بمعدل يصل لأكتر من 50 نبضة في الثانية الواحدة وأحيانًا أكتر من 70 نبضة كمان، وعشان يحافظوا على سرعة حركتهم بالشكل دِه بيحتاجوا طاقة عالية جدًا لدرجة إن الطائر الواحد ممكن ياكل أكتر من ضعف وزنه من الرحيق يوميًا يعني لو وزنه عامل مثلاً 4 جرام بيحتاج 8 جرام من الرحيق يوميًا، وعشان يكفوا احتياجاتهم العالية دِه من الرحيق بيحتاجوا يزوروا ما بين ألف لـ ألفين زهرة في اليوم الواحد.

4. الفيل

الفيلة مش بس أكبر الحيوانات البرية على مستوى العالم لكن من أفجعها كمان، بيتنوع أكل الفيلة في البرية من جذور وأعشاب وفواكه وحتى لحاء الأشجار وبتقضي معظم يومها أكل، حتى أن نومها في اليوم كله مش بيزيد عن الـ 4 ساعات، بيتراوح وزن الفيلة من 2000 كجم لـ 7000 كجم حسب النوع والحجم الضخم للفيلة بيتطلب أكل كتير، وعلى عكس القطط البرية زي النمور كده واللي ممكن تصطاد فريسة وتاكل منها لحد ما تشبع وتسيب الباقي لتاني يوم ولا حاجة تحسبًا إنها ماتلاقيش حاجة تصطادها، الفيلة مش بترحم كل يوم سواء أكل أو مياه، الفيل البالغ بيضرب يوميًا 136 كجم من الأكل ومعاهم كميه مهولة من المياه تقترب من الـ 200 لتر في اليوم الواحد.

5. الخلد نجمي الأنف The Star-Nosed Mole

فيه ناس لو الجوع تمكن منها أوي والأكل اتحط قدامها بتاكل بسرعات مجنونة، بس مافيش وجه مقارنة بين سرعة أكل أي مخلوق على الأرض مهما كان جعان مقارنةً بالخُلد نجمي الأنف، أنت بتتكلم على أسرع أكّيل على وجه الأرض، الحيوان الثدي يعتبر واحد من أغرب الحيوانات اللي ممكن تشوفها في حياتك
إسمه نابع من أنفه اللي بيمتاز ببنية شبيهة بالنجمة بتضم لوامس عامله زي المجسات عددها 22 مجس، واللوامس دِه بتحتوي على أكتر من 25 ألف مستقبل حسي، وفي عالمه تحت الأرض يعتبر العضو ده هو رأس ماله، فبغض النظر إن الحيوان نظره تقريبًا مش موجود إلا إن من خلال العضو ده بيقدر يحس بكل حركة حواليه ويوصل لطعامه من الحشرات والديدان بمنتهى السهولة، والأهم بمنتهى السرعة لدرجة إنه بيقدر يحدد موقع الفريسة ويمسكها وياكلها في أقل من ربع ثانية.

6. قرش النمر

معظمنا مهما كان جعان غالبًا بيبدأ أكله بالتذوق يعني يدوق كده صباع محشي ولا ياخدله قضمة من حتة لحمة وبعدين ينطلق، الكلام ده بتشترك فيه معانا معظم أنواع القروش في العالم وعلى رأسها أضخم الضواري البحرية من الأسماك ،القرش الأبيض الكبير، بس على عكسنا وعلى عكس أقرانه من القروش، قرش النمر مالوش في قصة التذوق دِه نهائي ما بيعرفش غير إنه يلهط أي حاجة تيجي في سكته، طبعًا أنت فاكر إن “أي حاجة” هنا مقصود بيها الأكل اللي بيحبه أسماك بقى وكده؛ لأ.. الكلمة هنا حرفية.. أي حاجة بتقع قدامه بياكلها أسماك، طيور، أفاعي سامة، حتى التماسيح وأسماك القرش اللي زيه، وقوة أسنانه سمحاله كمان إنه يقطم صدف السلاحف البحرية قبل ما ياكلهم، بس كل ده وبالرغم من تنوعه إلا إنه يعتبر نوعًا ما عادي إحنا في النهاية بنتكلم على حيوانات مفترسة، اللي مش عادي بقى إن قرش النمر مش بيقف لحد هنا ده لو لقى لوحة معدنية في المياه ياكلها، علب صفيح شغال، كتل فحم هاتلي كمية، وهكذا.. ما بيتفاهمش، كل اللي يجي في سكته.