كوكب الأرض له كل يوم دورة حوالين نفسه بتستمر لمدة 24 ساعة، والدورة دي بينشأ عنها تعاقب الليل والنهار، جزء من الأرض بيكون مقابل للشمس (واللي بيكون فيه نهار)، وجزء تاني الناحية التانية (واللي بيكون فيه الليل)، وعشان كدا لو الدنيا نهار والناس صاحيين في دولة زي مصر مثلًا، ممكن تلاقي بلد تانيه الناحية التانية من الأرض الناس فيها كلها نايمين دلوقتي، بس عمرك فكرت إيه اللي هيحصل لو عملنا الناس كلها ناموا في نفس الوقت؟

التأثير على البشر

كوكب الأرض له كل يوم دورة حوالين نفسه بتستمر لمدة 24 ساعة، والدورة دي بينشأ عنها تعاقب الليل والنهار، جزء من الأرض بيكون مقابل للشمس (واللي بيكون فيه نهار)، وجزء تاني الناحية التانية (واللي بيكون فيه الليل)، وعشان كدا لو الدنيا نهار والناس صاحيين في دولة زي مصر مثلًا، ممكن تلاقي بلد تانيه الناحية التانية من الأرض الناس فيها كلها نايمين دلوقتي، بس عمرك فكرت إيه اللي هيحصل لو عملنا الناس كلها ناموا في نفس الوقت؟

المشكلة بقى إن الساعة البيولوجية دي ما بتقدرش تعرف إمتى الليل وإمتى النهار إلا من خلال الشمس، وبالتحديد الضوء الأزرق اللي بينتج عنها، فلما بتعرف الساعة البيولوجية إننا الصبح بتبدأ تكون بروتيناتها وهرموناتها المسؤولة عن النشاط، طيب.. إيه المشكلة في كدا، المشكلة هو إننا لما نخلي كل الناس تنام في نفس الوقت.. فيه ناس هيبقى نومها دايمًا بالنهار، وبالتالي مش هتتعرض للشمس أبدًا، ودا هينتج عنه إنهم هيحسوا طول الوقت بالخمول؛ لإن الجسم مش بياخد إشارات إننا الصبح، ودَا مش بس هيأثّر على تكسير بروتين الـPER؛ بل كمان هيأثر على هرمونات زي الـMelatonin المسؤول عن النعاس، والـSerotonin المسؤول عن تعديل المزاج وتحسين عمليات الإدراك والتعلم والذاكرة، وعشان كدا.. الناس اللي دوريات شغلهم بتكون بالليل وفيها سفر كتير ولخبطة في النوم، غالبًا بيحصل عندهم خلل في إفراز الهرمونات، وقلة في كفاءة العمل، دا غير إن متوسط أعمارهم بتكون أقل من الأشخاص اللي نومها منتظم، بل أن كتير منهم بيصابوا بأمراض مناعية؛ لإن مناعتهم بتكون ضعيفة نسبيًّا خصوصًا وإنهم ما بياخدوش نسبة كافية من فيتامينات الشمس زي فيتامين د.

التأثير على الكوكب

اللي فات دا كله كوم، والتأثير على كوكبنا الغلبان اللي مشحتطينه معانا دا.. كوم تاني، بصرف النظر عن الصعوبة والمجهود الجبار اللي هتحتاجه الزراعة والصناعة في أجزاء الأرض اللي الناس هتنام فيها بالنهار، في مصايب هتحصل في إنتاج الطاقة وانبعاثات الغازات الضارة على الغلاف الجوي زي ثاني أكيد الكربون مثلًا.

في الـ8 ساعات اللي البشر كلهم هيكونوا نايمين فيها.. الكوكب أخيرًا هياخد نفسه؛ لإن ضغط الكهرباء وإنتاج الطاقة هيقل بشكل مهول، وبدوره هيقلل من الانبعاثات الضارة على الكوكب وعايزك تتخيل إن في سنة 2018م، بلغ استهلاك العالم للطاقة حوالي 23,398 بليون كيلو وات/ ساعة، والرقم دا.. لا زال في تزايد مستمر لحد النهار دا، فتخيل بقى لما كمية الطاقة المهولة دي تتعطل لمدة 8 ساعات، وبعد كدا ترجع كلها مرة واحدة، مع العلم إن كمية الطاقة دي أصلًا مش بتستهلك كلها مرة واحدة، وبيتم استهلاكها على حسب البلدان اللي صاحية، ومع ذلك بنعاني من الاحتباس الحراري؛ فتخيل بقى أن الناس كلها بتطلع ثاني أكسيد الكربون في نفس الوقت، فأنا بقول نخلي البشر يناموا بطبيعتهم أحسن.. عشان لا إحنا ولا الكوكب ناقصين.