دايمًا بنسمع إن في دول معينة عندها أسلحة نووية ممكن يستخدموها في الحروب، ودول تانية عندها مفاعلات نووية بيستخدموها في في توليد الكهرباء، لكن عمرك سألت نفسك قبل كدا ياترى إيه الفرق بين النوعين، إيه اللي يفرق النووى المُستخدم في الحروب عن النووي المستخدم في توليد الكهرباء، والأهم من كده بقى، إيه مَدى خطورة الأسلحة النووية الموجودة على كوكب الأرض في الوقت الحالي؟، يعني لو فعلاً حصل حرب عالمية جديدة، بين الدول الكبرى زي ما بيُشاع طول الوقت، وكلهم استخدموا الرؤوس النووية في الحرب دي ياترى إيه اللي هيحصل؟

مين اللي معاه نووي

العالم في الوقت الحالي بخصوص الطاقة النووية منقسم لـ جزئين، الجزء الأول هي الدول اللي بتستخدم النووي في توليد الكهرباء، ودول دِول كتير جدًا؛ لأن ممكن أي دولة في العالم تاخد الخطوة دي بكل سهولة طالما معاها الموارد المالية والكفاءات العلمية المناسبة، أما بقى الشِق التاني فـ هم الدول اللي معاها نووي عسكري، والدول دي على كوكب الأرض عددهم محدود جدًا وهما حوالي 9 دول فقط، وخلينا نبدأ بالشِق ده تحديدًا لأنه الشِق الأكثر خطورة، لو سألتك دلوقتي وقولتلك مثلاً إيه معلوماتك عن كوريا الشمالية، أول حاجة هتيجي في بالك هي الرئيس بتاعها (كيم يونغ أون) وهو بيهدد أمريكا والعالم كله، بإنه ممكن يستخدم الأسلحة النووية في أي وقت، وممكن كمان تكون معتقد إن كوريا الشمالية هي أكتر دولة في العالم معاها أسلحة نووية، أو على أقل تقدير هي ضمن التلاتة الكبار، لكن المفاجأة بقى إن كوريا الشمالية هي أقل دولة في العالم كله عندها نووي عسكري.

كوريا الشمالية عندها حوالي 50 رأس نووي فقط، في حين إن روسيا بتمتلك 6257 رأس نووي، وأمريكا بتمتلك 5550 رأس نووي، الله.. طب ليه بقى كوريا الشمالية دايمًا عاملة مشاكل، والعالم كله بيخاف منها، وبيعملولها ألف حساب؟، الإجابة ببساطة هي إن لو دولة عندها رأس نووي واحد فقط فـ العالم كله هياخد حذره منها؛ لأن الرأس النووية الواحدة ممكن تسبب كوارث مهولة، وخصوصًا إن القنابل النووية الموجودة حاليًا أخطر وأضخم بكتير جدًا جدًا من القنابل اللي كانت موجودة في وقت الحرب العالمية التانية مثلاً، يعني القنبلة اللي تم إلقاءها على مدينة هيروشيما اليابانية في عام 1945م وإتسببت في الحادث المروع اللي حصل، كانت القنبلة دي بتحمل حوالي 64 كيلوجرام من اليورانيوم المُشع 235 (U-235) والمدهش بقى إن القنبلة دي أصلًا بيتم اعتبارها قنبلة فاشلة؛ لأن من الـ 64 كيلو من اليورانيوم ما إنشطرش منهم غير حوالي كيلو واحد فقط؛ وده سَبِب إنفجار مهول بيكافئ حوالي 15 ألف طن من مادة الـ TNT، يعني تخيل إن كل الإنفجارات والكوارث اللي حصلت في هيروشيما كانت بسبب كيلوجرام واحد من اليورانيوم، فما بالك بقى بالقنابل الحديثة الموجودة دلوقتي، العالم في الوقت اللي بتسمعونا فيه دلوقتي موجود فيه 13 ألف قنبلة نووية، ولو القنابل دي إنطلقت من أماكنها حرفيًا الكوكب هيختفي من على وش الكوكب.

تجارب نووية حصلت بالفعل!

علشان نقدر نتخيل حجم الدمار اللي ممكن يتعرضله كوكب الأرض بالكامل، في حالة لو تم استخدام كل القنابل والرؤوس النووية الموجودة مع الدول الكبرى فـ إحنا ممكن نستنبط ده من خلال تجارب نووية عديدة، حصلت داخل كوكب الأرض بالفعل؛ لأن في أماكن كتير في العالم إتعرضت للتفجيرات النووية، إما من خلال التجارب والأبحاث المُتعمدة، أو من خلال بعض الأخطاء الغير مقصودة، أو حتى التفجيرات اللي حصلت بسبب الحروب، الإتحاد السوفيتي في أكتوبر من عام 1961م، أسقطوا قنبلة نووية بغرض الإختبار ، فوق جزيرة (نوفايا زمليا Novaya Zemlya) الموجودة في المحيط المتجمد في أقصى شمال شرق أوروبا، كان إسمها قنبلة القيصر Tsar Bomba، ودي كانت أقوى سلاح نووي حراري تم تفجيره في العالم على الإطلاق، القنبلة دي كان قوتها التفجيرية تقدر بحوالي 57 مليون طن من مادة الـ TNT، يعني أكبر من القوة التفجيرية لقنبلة هيروشيما بحوالي 3800 مرة، وعلشان كده تأثير القنبلة وصل لحيز 780 كيلومتر، وسحابة الغبار بتاعتها لوحدها وصل إرتفاعها لـ 64 كيلو فوق سطح الأرض، والموجات الناتجة عن الانفجار طافت حوالين الكرة الأرضية بأكملها 3 مرات؛ النتائج المُخيفة بتاعت التجربة النووية دي صعقت العالم كله، وخلت الناس تعرف فعلاً مَدى خطورة الأسلحة النووية الموجودة حوالينا.

كارثة تتشيرنوبل

الخطر بتاع الطاقة النووية موجود حتى في المُفاعلات السلمية اللي بيتم توليد الطاقة الكهربية من خلالها، المُفاعلات النووية السِلمية اللي بيفرق عنها وعن القنابل النووية العسكرية، هو نوع المواد المُشعة وكمياتها؛ لأنه ممكن يتم استخدام مواد مُشعة غير اليورانيوم ووبلوتونيوم زي مثلاً السترونشيوم Strontium والسيزيوم، والمواد دي في العادة بيكون نشاطها الإشعاعي مُنخفض لكن ده طبعًا مايمنعش إنها برده في غاية الخطورة، وحادثة مُفاعل تشيرنوبل الشهيرة هي أكبر مثال على كده.

في يوم السبت 26 أبريل من عام 1986م، في منطقة تشيرنوبل وبالقرب مدينة (بريبيات Pripyat) في شمال أوكرانيا أثناء ما كانت جزء من الإتحاد السوفيتي حصل إنفجار يُعد أكبر كارثة نووية شهدها العالم، منطقة تشيرنوبل كان فيها محطة نووية لتوليد الطاقة، وفي لحظة معينة وأثناء ما المختصين كانوا بيعملوا اختبار على المُفاعل رقم 4 زادت طاقة المُفاعل لأقصى درجة وماقدروش يسيطروا عليها وكل محاولاتهم في إغلاق المُفاعل باءت في الفشل، وحصل فورًا سلسلة مستمرة من الإنفجارات إنتشرت في كل مكان حوالين المفاعل، في اللحظات الأولى توفى عدد قليل من الأشخاص واللي يكادوا يكونوا 50 شخص فقط ومحدش كان متوقع حجم الكارثة اللي بتحصل؛ لدرجة إن رجال الإطفاء نفسهم اللي جُم في مكان الحادث علشان يطفوا الحريق، كانوا بيتعاملوا مع الموضوع ببساطة شديدة ومكنوش واخدين بالهم من مَدى خطورة الإشعاع في المنطقة، لكن خلال أيام من الحادث بدأت تظهر المشكلة، حوالي 4 آلاف شخص من اللي كانوا موجود في المحيط القريب من الإنفجار ماتوا فورًا بسبب التسمم الإشعاعي، و 2.3 مليون شخص من سكان أوكرانيا والأماكن المجاورة إتعرضوا للإشعاع، والمدهش إن الغبار المُشع إتنقل بواسطة الرياح لمسافات كبيرة جدًا، لدرجة إن تأثيره وصل لـ السويد واللي بتبعد عن أوكرانيا حوالي 2600 كيلومتر، وعلشان كده ملايين الأشخاص واللي كانوا في أماكن بعيدة جدًا عن مركز الإنفجار، إتأثروا بالإشعاع وكانوا عُرضة بالإصابة بأمراض خطيرة زي السرطانات، وأكتر من 150 ألف كيلومتر مربع في أوكرانيا وروسيا البيضاء اتلوثوا تمامًا، ومنهم حوالي 3 مليون فدان زراعي واللي بقوا غير صالحين للزراعة، ومازالت منطقة تشيرنوبل مهجورة لحد النهاردة ومينفعش حد يدخل المنطقة إلا وهو مأمن نفسه ضد الإشعاع.

النووي السِلمي

على ذكر مفاعل تشيرنوبل خلينا دلوقتي بقى نتكلم عن المُفاعلات النووية السلمية بشكل مُفصل ونفهم هم إزاي بيستخدموها وليه أصلاً بيتم استخدام النووي في توليد الكهرباء بالرغم من خطورة العملية دي؟، في محطات الطاقة التقليدية علشان نولد كهرباء الموضوع بيكون معتمد بشكل أساسي على الحرارة، بيجيبوا وقود أحفوري زي الفحم مثلاً أو حتى البترول أو الغاز الطبيعي، وبيتم إشعالهم داخل المحطات، وبعد كده بيستخدموا الحرارة اللي بتطلع منهم وبيسخنوا بيها كمية كبيرة من المياه وبيضخوها داخل مواسير، ومن خلال الضغط المهول بتاع بخار المياه بتبدأ مجموعة من التوربينات تدور بسرعة، والدوران ده بيتحول في النهاية لطاقة كهربائية، السلسلة الطويلة دي بقى هي بالظبط اللي بيتم استخدامها في المفاعلات النووية ولكن بإختلاف الوقود، فـ بدل ما بنستخدم فحم وغاز طبيعي وغيره بنستخدم المواد المُشعة، الإنشطار النووي للمواد المُشعة بيطلق طاقة حرارية كبيرة جدًا كناتح من التفاعل، والطاقة الحرارية دي تحديدًا بيستخدموها داخل المحطات النووية في تسخين المياه وتشغيل التوربينات، وبالتالي الحصول على كهرباء نظيفة.

ليه ببيستخدموا النووي أصلاً في توليد الكهرباء ؟

طيب دلوقتي فيه سؤال مُهم جدًا، هما ليه أصلاً بيستخدموا الإنشطار النووي في توليد الكهرباء، وخصوصًا إن الموضوع ده بيكون خطير ، وممكن يسبب خسائر مهولة لو حصل إنفجار في المُفاعل عن طريق الخطأ، زي مثلاً واقعة تشيرنوبل اللي إتكلمنا عنها من شوية، الإجابة على السؤال ده بتكمن في إن الكميات الضئيلة جدًا جدًا من المواد المُشعة، بتدينا حرفيًا سيل مهول من الطاقة اللي تكاد تكون ما بتنتهيش، وعلشان كده دايمًا الدول والحكومات بيفضَّلوا إنهم يستخدموا الطاقة النووية في توليد الكهرباء، وخلينا نضرب مثال علشان نوضح الموضوع أكتر، كمية الطاقة اللي بنحصل عليها من 75 ألف لتر من النفط واللي بتعادل 80 ألف متر مكعب من الغاز الطبيعي أو 166 ألف كيلو من الفحم، نفس الكمية دي من الطاقة ممكن نحصل عليها لو عملنا إنشطار نووي لكيلوجرام واحد فقط من اليورانيوم 235 (U-235)؛ وعلشان كده دول كتير جدًا عنيها على الطاقة النووية وبيحاولوا إنهم يستخدموها في توليد الكهرباء قدر الإمكان وخصوصًا إن الصناعات النووية إتقدمت جدًا، وبقى فيه وسائل آمنة بنقدر نتخلص بيها من النفايات المُشعة الخطيرة.

الدول التي تمتلك محطات نووية

فيه 32 دولة في العالم عندهم محطات طاقة نووية قائمة بالفعل، وعددهم وصل لحوالي 443 مُفاعل، بالإضافة لـ 55 محطة نووية جديدة قيد الإنشاء؛ وعلشان كده المفاعلات النووية لوحدها بتوفر حوالي 10% من كهرباء العالم، والرقم مُتوقع إنه يوصل لـ 15% خلال الكام سنة اللي جايين، فرنسا مثلاً عندها 56 مفاعل نووي وبيولدوا حوالي 70% من كهرباء البلد بالكامل، الصين عندهم 53 مفاعل، وكندا عندهم 19، والمملكة المُتحدة عندهم 11 مفاعل، ده غير بقى اليابان وإسبانيا ورومانيا والبرازيل والمكسيك وغيرهم.