أضخم التجمعات البشرية على مر التاريخ

في بداية عمر البشرية مكانش فيه مجتمعات ولا تكدسات ولا أي زحمة، وكان البشر عبارة عن جماعات متفرقة من الأسر والعشائر، لكن مع مرور الوقت بدأت تظهر التكدسات والتجمعات، واللي علماء الاجتماع بيقولوا إنها أهم علامات التطور الثقافي للمجتمع، وكل ما التجمعات دي زادت وبقت أكبر كل ما كانت بتدل على أحداث أضخم وأكبر.

أكبر تجمع عرائس

في يوم 10 فبراير سنة 1840، أُقيم حفل زفاف أسطوري للملكة فيكتوريا ملكة بريطانيا العظمى على سليل العائلات الحاكمة في أوروبا “الأمير البرت Prince Albert”، وفي يوم الفرح ارتدت الملكة فيكتوريا فستان زفاف أبيض من الحرير نال إعجاب الجميع، ومن يومها بقى فستان الزفاف الأبيض اللي كانت لابساه الملكة تقريبًا هو الاختيار الأول لكل العرائس في دول العالم، لكن قبل حفل زفاف الملكة فيكتوريا كانت العرائس بتلبس مختلف الألوان بما فيها اللون الأبيض نفسه.

وبتذكر الروايات التاريخية إن أسطورة الصين والملقبة بـ إلهة الحرير الامبراطورة “لى زيو Leizu”، كانت أول من صمم وارتدى فستان الزفاف الأبيض من حوالي 4600 سنة فاتوا، والامبراطورة لى زيو كانت بتعيش في مدينة “سوتشو الصينية Suzhou”، ومدينة سوتشو دي في الوقت الحالي هي عبارة عن مدينة سياحية من الدرجة الأولى، وبتحتوي على المنتجعات والجزر والحدائق، لكن رغم جمال طبيعتها، إلا أن أشهر ما بيميز سوتشو إنها معروفة بإسم “عاصمة فستان الزفاف في العالم”، فبيتواجد في سوتشو سوق شهير إسمه “سوق هاتشو Huqiu”، والسوق ده بيعتبر أكبر سوق في العالم لإنتاج فساتين الزفاف، وبيحتوي السوق على مئات المحلات والمصانع والمراكز التجارية، وبيشتهر بالجودة والأسعار المخفضة.

وفي سنة 2016 تم إفتتاح 30 مصنع جديد، وقامت إدارة المصانع بعمل عرض مغري بغرض الدعاية، بيتمثل في إقامة حفل زفاف جماعي كبير لألف من العرائس، مع هديه كمان عبارة عن رحلة سياحية بالمدينة لمدة خمس أيام، وده كله لأي عروسة تشتري فستان زفافها من المصانع دي، وبالفعل اتجمع 908 من العرائس سعداء الحظ اللي كانوا موافقين للشروط، واتعملت الاحتفالية بحضور مندوبة موسوعة جينيس للأرقام القياسية كأكبر تجمع للعرائس في العالم كله.

أضخم شعار بشري

بتعتبر دولة الفلبين من أكثر دول العالم صرامة في قوانين حظر التدخين، فغير القوانين المعتادة اللي بتمنع التدخين في المواصلات العامة والأماكن المغلقة، فمقاطعة “الاباى Albay” بالفلبين بتشتهر بأنها المقاطعة صاحبة أقوى القوانين الخاصة بحظر التدخين، زي مثلاً اعتبار شهر يونيو هو شهر بلا دخان؛ لأن شهر يونيو من سنة 2003 كان الشهر اللي شهد توقيع 176 دولة من بينهم الفلبين على معاهدة مكافحة التدخين، وفي يوم 28 يونيو سنة 2013، قررت 5 مدن في المقاطعة التوقيع على مجموعة من اللوائح والقوانين اللي بتؤدي للحظر الكامل لعملية التدخين أو حتى بيع السجائر، وتمت دعوة للمواطنين للمشاركة في المظاهرة، وتم تسجيل الحدث اللي حضره 13892 مشارك في موسوعة جينيس للأرقام القياسية كأكبر شعار بشري لـ لا للتدخين.

أكبر تجمع لحضور مباراة

معروف إن رياضة كرة القدم هي اللعبة الشعبية الأولى في العالم، وكان من الممكن لو تواجدت الأماكن المناسبة خصوصًا في عصر ما قبل النقل التليفزيونى إن حشود المتابعين للرياضة الشعبية دي تحقق كل الأرقام القياسية، لكن دايمًا كانت بتقف مشكلة السعة المحدودة للاستاد عائق قدام كتير من المهوسين بمتابعة المباريات، وحتى استاد الماراكانا الشهير بالبرازيل، واللي كان في وقت من الأوقات قادر على استيعاب أكتر من 200 ألف متفرج مكانش عنده القدرة المناسبة في مباراة نهائي كأس العالم سنة 1950 بين البرازيل وأوروجواى.
فعلى الرغم من قدرة الاستاد الاستيعابية الكبيرة، إلا أن أعداد التذاكر مكانتش كافية لأعداد الجماهير اللي كانت عايزة تحضر ماتش النهائي، فبعد بيع 199,854 تذكرة حسب الأوراق الرسمية، اضطر المسئولين إنهم يسمحوا لحوالي 20 ألف إضافيين لحضور المباراة من غير تذاكر، وحاليًا طبعًا وللدواعي الأمنية تم تخفيض سعة استاد الماراكانا بما لا يتجاوز 80 ألف متفرج، لكن رغم تخفيض الأعداد، إلا أن استاد الماركانا قدر إنه يحجز لنفسه رقم قياسي مش هيتم كسره أبدًا، وده طبعًا بعد تحديد سعة الاستاد، وهيفضل رقم الـ 199,854 متفرج المسجل في الأوراق الرسمية، هو الرقم القياسي لأضخم حشد جماهيري لمشاهدة مباراة في كرة القدم على مر التاريخ.

أكبر تجمع رياضي

الرقم القياسي لعدد الجماهير اللي حضروا أي تظاهرة رياضية، كان من نصيب رياضة سباق السيارات وبالتحديد سباق “إنديانابليس Indianapolis”، أو السباق الشهير بـ اندي 500. اندي 500 هو سباق عريق للسيارات بدأ من سنة 1911 بولاية إنديانا بالولايات المتحدة الأمريكية، وخلال 110 سنة هي عمر السباق كله متوقفش السباق ده إلا 6 سنين بس بسبب الحربين العالميتين الأولى والتانية، لدرجة إن الحظر والإجراءات الاحترازية اللي حصلت وقت الكورونا ممنعتش برضه إقامة السباق في ميعاده، وكل اللي قدر يعمله الوباء إنه يجبر المنظمين أنهم يخفضوا أعداد الجماهير اللي هيحضروا السباق.
والسباق بيضم 33 متسابق بيتم ترتيبهم في 3 صفوف على حسب سرعة اللفات وقت التصفيات، والمتسابقين بيتنافسوا على مضمار ضخم طوله حوالي 4 كيلو متر، وبيتطلب السباق استكمال 200 لفة في المضمار بإجمالى مسافة 500 ميل أو 800 كلم؛ وعشان كده السباق ده واخد إسمه إندي 500 من ولاية انديانا ورقم 500 ميل، وعلى عكس سباق الفورمولا 1 الشهير، واللي بيقام في عدد من الدول وبتتعدد المراحل بتاعته، فالاندي 500 بيقام مرة واحدة في شهر أغسطس من كل سنة على حلبة موتور سبيد واي، وهي الحلبة اللي بيحتشد فيها أعداد من الجماهير بتوصل لـ 400 ألف متفرج، وهو الأمر اللي بيخلي سباق اندي 500، هو أضخم الحشود الجماهيرية لأي تظاهرة رياضية.

حفلات

بيعتبر جمهور الألعاب الرياضية التنافسية هو جمهور مرتفع الأدرينالين، وعشان كده بتلجأ الاعتبارات الأمنية للحد من أعداد المتابعين، باعتبار أن متابعي الرياضة التنافسية بيكون عندهم قدر كبير من التحفز وإحتمالية إثارة المشاكل، وده على عكس جمهور الحفلات الغنائية، فالمفترض أن جمهور الحفلات الغنائية دول من نوعية الناس الرايقه اللي رايحه تستجم بعيد عن جو التنافسية والشحن العصبي؛ وعشان كده بتحتكر الحفلات الغنائية كل الأرقام القياسية الخاصة بعدد الجماهير.
ففي سنة 1995 وفي ليلة رأس السنة على شاطئ “الكوبا كابانا Copacabana” البرازيلى الشهير، حضرت الجماهير بأعداد مهولة لمتابعة نجمهم البريطاني السير “رود ستيوارت Rod Stewart”، وهي نفس الأعداد اللي حضرت في موسكو سنة 1997 لمتابعة حفل “اكسيجين Oxygen” للفنان جون ميشيل جار، وهي الأعداد اللي تم تقديرها بـ 3.5 مليون إنسان، وهو الرقم اللي بيعتبر أضخم التجمعات البشرية لأي حفل على مدار التاريخ.

جنائز

الحقيقة بقى مش الأفراح بس اللي بتجتمع عشانها أكبر الحشود الجماهيرية، لكن الأحزان كمان ليها نصيب في تحفيز الناس للتجمع والحشد، بل إن تجمعات الناس في الأحزان بتفوق بمراحل تجمعاتهم في الأفراح، ومن أشهر مظاهر التجمعات البشرية في الأحزان هي التجمعات اللي بتحصل لحضور جنازات المشاهير، وأكبر الجنازات على الإطلاق واللي سجلت الرقم القياسي في أعداد المشيعيين كانت جنازة الزعيم الهندي “انا دوري Annadurai” اللي توفي سنة 1969.
وبترجع شعبية انا دوري” لكونه مناضل سياسي وكاتب ومؤلف قضى حياته كلها في النضال لصالح التامليين، وهما مجموعة عرقية بتسكن ولاية تاميل نادو في أقصى جنوب الهند، بالإضافة لأعداد في بلاد تانية زي سيريلانكا وماليزيا وسنغافورة، ومع وفاة زعيمهم انا دوري في سنة 1969، خرج لوداعه حشود جماهيرية تم تقديرها بـ 15 مليون إنسان، وهو الحشد البشري الأكبر لأي جنازة على مر التاريخ.

تجمعات دينية

على الرغم من ارتباط المسلمين بدينهم وأمنيات الملايين منهم بتيسير فريضة الحج، إلا أن أعداد الحجيج دايمًا ما بتكون محدودة لارتباطها بسعة المسجد الحرام، فعلى حسب تصريح وزير التخطيط السعودي محمد بن عبدالله الجدعان، إن المسجد الحرام وصل بعد التوسعة الأخيرة لطاقة استيعابية بتقدر بمليون وسبعمائة ألف حاج، وهو الرقم اللي مش بيمثل شئ حرفيًا من العدد الإجمالي للمسلمين حوالين العالم، واللي اقتربوا من الـ 2000 مليون مسلم حسب المصادر غير الإسلامية.

لكن مع ذلك الرقم القياسي الأسطوري للزيارات المتعلقة بعقائد دينية، مسجل بإسم شعيرة هندوسية، وهي الشعيرة المعروفة باسم “كومب ميلا Kumbh Mela”، والكومب ميلا بيعتبر حاجه كده زي الحج عند الهندوس، وبتقام الشعيرة مرة كل 3 سنين تقريبًا، وخلال الكومب ميلا بيجتمع الهندوس على ضفاف 3 أنهار بيعتقدوا في قدسيتها، وبيكون التجمع بغرض الاغتسال والتطهر، وخلال التجمعات الرهيبة دي بتوصل أعداد الحشود لعشرات الملايين من الحجاج، واللي تم تقدير أعدادهم سنة 2013 بـ 120 مليون إنسان، وهو الرقم اللي بيعتبر أضخم التجمعات البشرية لأي حدث على مر التاريخ.