دايمًا لما بنزور متحف أثري بنلاحظ إن أغلب المقتنيات بتاعة المتاحف مش محفوظة في زجاج أو تحت حماية معينة تحميها من العبَث، وخصوصًا بقى لو متحف جيولوجي فيه هياكل عظمية منصوبة ساعتها بتتحول لوضع من الحذر والتوتر عشان بتكون خايف تلمس عضمة ولا حاجة؛ فيقوم الهيكل العظمي كله منهار فوق دماغك وتكون دمرت جزء من التاريخ، بس ماذا لو دا حصل فعلًا، وأنت كسرت أو أتلفت أثر غصب عنك أو بمزاجك؟
هيحصل إيه لو كسرت أثر بالغلط؟
لو كنت في يوم من الأيام في متحف وكسرت أثر لا يقدر بثمن هيكون فيه 3 سيناريوهات، حسب أنت إزاي كسرت الأثر دا، أول سيناريو هو إنك وأنت ماشي اتزحلقت غصب عنك مثلًا، فخدت أثر في رجليك وأنت بتقع؛ فكسرته، ودا بالظبط اللي حصل مع “نك فلين Nick Flynn” في متحف Fitzwilliam للفنون والآثار، واللي حصل إن وفلين نازل من على سلم المتحف.. اتزحلق وخد في طريقه 3 مزهريات خزفية بترجع في تاريخها للقرن الـ17 الميلادي، وقيمتها بتساوي حوالي 500 ألف جنيه إسترليني، لكن لأنه اتزحلق وغصب عنه المتحف مرفعش عليه أي قضايا، وكل اللي حصل أن مدير المتحف إلا إنه يبعت رسالة لفلين بيطلب منه فيها إنه يا ريت يمتنع عن زيارة المتحف في المستقبل القريب، دا غير إن المتحف أصلًا ما أعلنش عن هوية فلين ولا قال اسمه للصحافة، وفلين هو اللي أعلن عن نفسه بنفسه.
طب لو كسرته بسبب مخالفة التعليمات؟
لو كسرت الأثر بسبب مخالفتك للتعليمات واللعب فيه دا هيكون السيناريو التاني من الـ3 سيناريوهات اللي قُلنا عليهم، واللي عمله زوجين مسنين في المتحف الوطني للساعات بكلومبيا، لما حاولوا إنهم يلمسوا ساعة على الحيطة بهدف الكشف عنها وتشغيلها، بس للأسف أجزاء الساعة اتفرَطت كلها على الأرض في مشهد درامي، وأول رد فعل خده المتحف.. هو إنه رفع الفيديو على اليوتيوب بعنوان “لو سمحت.. لا تَلمِس” كناية عن إنك ما تلمسش أي أثر في المتحف يعني، وبرضو من غير ما يعلن عن هوية الزوجين، ولا حتى المتحف نفسه اهتم يعرف هما مين.
هيحصل إيه لو كسرت أثر عن قصد؟
لو كسرت أثر عن قصد بقى هيحصل معاك نفس اللي حصل مع” نك فلين Nick Flynn” اللي قلنا عنه من شوية، طبعًا زي ما قلنا عادةً المتاحف مش بتعلن عن هوية أي حد اتسبب في إتلاف أي أثر عندها، ودا اللي حصل مع فلين برضو، لكن الغريب إن فلين طلع في أكتر من لقاء صحفي عشان يحكي قصة المزهريات وإزاي هو أتلَفها، ودا خلى متحف Fitzwilliam يشُك في إن فلين كسر المزهريات عن قصد، وفورًا بلغوا عنه الشرطة واتحبس لمدة يوم كامل عشان الشرطة تحاول تعرف كسر المزهريات كان بقصد أو لأ، لكن فلين طلع فعلًا برئ.
لكن اللى ثبت عليه تهمة تدمير أثر بقى هو Andrew Shannon اللي لكَم لوحة عن عَمد بقصد كسرها، دا غير إن الشرطة كمان لاقت في جيبه علبة دهان كان قاصد يتلف بيها اللوحة، وأندرو اتحكم عليه بـ5 سنين سجن؛ وتم اعتبار القضية قضية جنائية.