آخر منطقة تم اكتشافها على وجه الارض

العلماء اتفقوا إن البشر بدأوا أولى خطواتهم على الأرض من قطعة اليابس المسماة بالعالم القديم، والعالم القديم ده مسمى إبتدعه العلماء للإشارة لقارات أسيا وأفريقيا وأوروبا، أما بقية القارات والمعروفة بالعالم الجديد، فكانت آخر الآراضى اللى وصلها البشر، ولو كان من الممكن وقوع الخلاف حوالين أول المناطق المكتشفة من البشر نتيجة لضعف التوثيق، فبالتأكيد إن آخر الأماكن المكتشفة مفيش عليها أى خلاف.

القارة الآسيوية

القارة الآسيوية هى أكبر قارة على سطح الكرة الأرضية، بالإضافة كمان إلى إنها أفقر قارات العالم فى مسألة الأكتشافات الحديثة، فالقارة الاسيوية مستقرة من قديم الأزل ومسألة إكتشاف المناطق الجديدة فيها بتعتبر من النوادر، وطبقاً لأراء العلماء فكانت المنطقة الممثلة لدولة كمبوديا الحالية، هى آخر المناطق اللى عرفها الانسان فى القارة الآسيوية، وقبل كمبوديا على طول كانت المنطقة المتمثلة فى دولة سيرى لانكا الحالية، والمعلومة الملفتة للإنتباه هنا، أن آخر المناطق اللى عرفها الإنسان قبل سريلانكا على طول كانت المنطقة اللى قامت عليها دولة الصين، والمعلومة دى تعتبر ملفتة للإنتباه لأن دولة الصين تعتبرمن أقدم الدول اللى قامت عليها حضارات العالم القديم، ومع ذلك فأرض الصين نفسها كانت من آخر المناطق اللى استعمرها البشر فى قارة أسيا، لكن على كل حال يفضل كل الكلام ده على عهدة علماء الحفريات، بينما الثابت بقى أن آخر منطقة تم إكتشافها فى آسيا كانت المنطقة المعروفة بجزر بونين Bonin Islands.

وجزر بونين دى عبارة عن مجموعة من الجزر الإستوائية اللى تم إكتشافها سنة 1453 جنوب دولة اليابان، والجزر دى رغم إنها تابعة سياسياً لدولة اليابان إلا إنها جغرافياً بتتبع قارة أوقيانوسيا Oceania، يعنى باختصار كده لو اعتبرنا أن جزر Bonin دى مش تابعه لآسيا فنقدر نقول ان قارة اسيا متمش فيها إكتشاف أى منطقة جديدة من عصر الاكتشافات الكبرى فى القرن الـ 13 لغاية النهاردة.

قارة أفريقيا

قارة أفريقيا بتيجى فى المساحة بعد قارة آسيا على طول، والإتنين طبعاً أقدم مناطق الكرة الأرضية اللى إكتشفها الإنسان، والمتوقع يعنى إن قارة أفريقيا ميكونش فيها إكتشافات حديثة زيها زى آسيا، إلا إن الواقع بقى إن القارة الأفريقية ولّادة فى موضوع المناطق الحديثة ده، بل إنها تعتبر أغنى القارات فى مسألة اكتشاف المناطق الجديدة، والبداية مثلاً مع دولة زى الراس الأخضر أو Cape Verde اللى إكتشفوها سنة 1462م، وبعد الراس الاخضر اكتشف البحارة دولة غينيا الاستوائية سنة 1474، وبعد كاب فيردى وغينيا الأستوائية بشوية تم إكتشاف ساو تومى وبرينسيبى فى سنة 1485م، وإستمرت القارة الأفريقية تمارس هوايتها فى إمداد العالم بالمناطق الجديدة مع إكتشاف جزيرة موريشيوس سنة 1638م، وبعد إكتشاف موريشيوس ب 112 سنة وفى سنة 1770م رجعت أفريقيا تقدم للعالم منطقة جديدة وهى جزيرة سيشيل.

وبالرغم إن كان فى عن جزيرة سيشيل بلاغات ومشاهدات قبل التاريخ ده بكتير، إلا إن ده التاريخ الموثق لإكتشافها، وبناءً عليه فسيشيل كانت آخر الإكتشافات بالنسبة لقارة أفريقيا.

قارة أوروبا

العلماء بيعتقدوا إن الإنسان وصل لأوروبا من حوالى 45 ألف سنة، وكانت البداية فى المناطق اللى هى دلوقتى تركيا واليونان، والجدير بالذكر أن البشر قدروا إنهم يكتشفوا العالم الجديد ووصلوا لأمريكا الشمالية عن طريق مضيق بيرنج Bering قبل إستكشاف مناطق كتير فى أوروبا، فجزيرة ماديرا البرتغالية تم إكتشافها سنة 1420 ميلادية، وإن كانت جزيرة ماديرا تعتبر أقرب للساحل الشمالى الغربى من أفريقيا إلا إنها تابعة سياسياً لدولة البرتغال الأوروبية، أما بقى المكان الأحدث من ماديرا من حيث الإكتشاف فهما أشقائها مجموعة جزر الأزور، واللى تم إكتشافهم سنة 1439م، وفى عام 1604 و 1615م تم إكتشاف جزيرتين بأقصى شمال أوروبا، واللي تم اعتبارهم فيما بعد تابعين لدولة النرويج، وده برضه على الرغم من إن الجزيرتين بيبعدوا مسافة محترمة من البر الرئيسى للنرويج، وهما جزيرة سفالبارد Svalbard و جزيرة جان ماين Jan Mayen.

والجزيرتين هم آخر المناطق المكتشفة التابعة لأوروبا وقريبين من القارة نفسها، لأن ظهرت بعض الإكتشافات فيما بعد تعتبر تابعة سياسياً لدول أوروبية لكنها مش بتنتمى جغرافياً لقارة أوروبا، ومن أشهر الأقاليم دى مثلا جزر فوكلاند البريطانية المكتشفة عام 1690م.

وهى الجزر اللى تسببت فى نشوب حرب كبيرة بين انجلترا والأرجنتين فى عام 1982م، وده راجع طبعا لوقوع الجزر دى بالقرب من ساحل الأرجنتين.
أما بقى آخر الاقاليم المكتشفة ما وراء البحار والتابعة سياسياً لأوروبا، فكانت مجموعة جزر كروزيه أو ارخبيل كروزيت Archipel Crozet.

وهو الأرخبيل اللى تم إكتشافه سنة 1821 وبيعتبر تابع سياسيا لدولة فرنسا، وده على الرغم من وقوعه فى جنوب المحيط الهندى فى منطقة بين جنوب شرق القارة الافريقية وشمال القارة القطبية الجنوبية.

العالم الجديد

بالنسبة للعالم الجديد واللى بيمثله الأمريكتين واستراليا، زى ما قلنا إن البشر إكتشفوا مناطق كتير فيه وسكنوها قبل ما يستكملوا اكتشاف مناطق كتير فى قارات العالم القديم، وبالنسبة للمعلومات الموثقة، فالامريكتين نفسهم تم إكتشافهم على إيد كريستوفر كولومبوس عام 1492م، بينما تم إكتشاف قارة استراليا سنة 1606م على إيد البحار الهولندى وليام جانزون Willem Janszoon، لكن تم اعتبار الاكتشاف ده لاستراليا من قبيل المشاهدات، وعشان كده تم توثيق اكتشاف أستراليا رسمياً على إيد المستكشف البريطانى جيمس كوك James Cookسنة 1770م، وطبعاً كمان كريستوفر كولومبوس مش اول من اكتشف الامريكتين ولا حاجة لكن إحنا بنتكلم عن الاكتشافات الموثقة الرسمية، بعيداً أصلا إن أماكن زى ده كانت مسكونة بسكان أصليين، يعنى إكتشافها ده طبقاً للباحثين والدارسين اللى أغلبهم كانوا أوروبيين، بالرجوع لجيمس كوك؛ العلماء نسبوا له اكتشاف قارة أستراليا باعتباره أول من رسم خريطة لأستراليا نفسها وخريطة تانية لكيفية الوصول لأراضيها، بالاضافة لجهودة فى إكتشاف نيوزيلاندا وجزر هاواى.

آخر المناطق المكتشفة بالأمريكتين

أما بالنسبة للأمريكتين فعلى الرغم من توثيق اكتشاف القارتين نفسهم حديثا إلا إن القارتين توقفوا عن امداد العالم بالمناطق الجديدة بعدها، وده باستثناء بعض الجزر الصغيرة زى جزيرة برمودا المكتشفه سنة 1609، وغير برمودا فزى ما قلنا تم إكتشاف جزر الفوكلاند سنة 1690 وأخيرا جزيرة الامير ادوارد Prince Edward Island سنة 1799، والجزيرتين دول واحدة منهم بالقرب من الارجنتين والتانية بالقرب من كندا، إلا إن الجزيرتين برضه تابعين للتاج البريطانى.

قارة أستراليا

والجزيرة دى تم إكتشافها سنة 1788، على ايد ضابط البحرية الملكية البريطانى هنرى ليدج بيرد بول
Henry Lidgbird Ball، ، لكن برضه فى سنة 1820 تم اكتشاف جزيرة بتقع فى منتصف المسافة بين نيوزيلندا والقارة القطبية الجنوبية وهى جزيرة ماك وارى Macquarie.

والجزيرة دى وان كانت تابعة سياسيا لقارة استراليا الا انها اقرب جغرافيا للقارة القطبية الجنوبية.
المهم بقى قبل ما نقول إيه هى آخر بقعة من اليابس تم اكتشافها على كوكب الارض لازم التنويه على إن المقصود بآخر المناطق المكتشفه هى المناطق أو حتى الجزر اللى بيكتب ليها الحياة والاستمرار، والأ فكل يوم بتتكون مناطق وجزر جديدة فى البحار والمحيطات، إلا إن الجزر الجديدة دى بتتنوع ما بين جزر بركانية صغيرة اتكونت نتيجة ثورة مفاجئة لبركان فى وسط المحيط، أو حتى من الممكن ظهور جزر كبيرة من الجليد، لكن النوعية دى من الجزر بتعيش سنين أو حتى عشرات السنين قبل ما تتآكل اراضيها ويذوب الجليد المكون ليها، وعشان كده إحنا كلامنا كله على آخر المناطق والبقع الأرضية اللى إكتشفها الانسان واللى من المتوقع ليها الاستمرار إلى أن يشاء الله.

القارة القطبية الجنوبية

لك أن تتخيل إننا إكتشافنا ألاف الأجرام السماوية وعرفنا بوجودها، قبل ما نعرف إن فى قارة سابعة على الأرض اسمها القارة القطبية الجنوبية، وهى القارة صاحبة الاسم الشهير Antarctica أنتاركتيكا، على الرغم من مساحتها الكبيرة اللى بتبلغ ضعف مساحة قارة أستراليا تقريبا، إلا إن البشر مكانوش يعرفوا بوجودها لغاية القرن ال 20، وعلى الرغم من المشاهدات والبلاغات قبل الوقت ده، إلا إن هبوط البشر الفعلى واليقين من وجود القارة وتوثيقها كان تحديداً فى يوم 15 ديسمبر من سنة 1911 على ايد المستكشف النرويجى روالد أمندسون Roald Amundsen، واللى قدر هو وفريقه يكونوا أول البشر اللى يمشوا على آخر المناطق المكتشفه على سطح كوكب الأرض.