لما تتعرف على المساحة الرهيبة لغابات الأمازون واللي بتوصل لـ 5 ونص مليون كم مربع، طبيعي انك تتفهم استحالة حصر جميع أنواع الحيوانات المنتشرة في أرجائها، ناهيك عن إن الغابات أصلاً بتضم نص الأنواع المعروفة لينا من حيوانات ونباتات على وجه الأرض، بس الحقيقة إن مش بس الغابات اللي بتمتع بالتنوع البيئي العجيب ده، وبخلاف الحيوانات اللي بتتجول وبتزحف وبتتأرجح في أرجائها، فيه مخلوقات عجيبة ومخيفة أقرب لوحوش عايشة في أعماق تاني أطول أنهار العالم ألا وهو نهر الأمازون.
ومش بالضرورة إن كل الوحوش اللي يتخاف منها في نهر الأمازون يبقى وجودها مقتصر على النهر وبس، فيه وحوش فارضة سيطرتها في أرجاء غابات الأمازون ونهرها على حد سواء.

الأناكوندا الخضراء

مع وزن يصل لـ 250 كجم أو ربع طن و طول يتراوح من 6 أمتار لـ 9 أمتار كاملين أو ما يعادل طول اتوبيس مدرسي أو ارتفاع مبنى مكون من 3 طوابق، تعتبر الأناكوندا الخضراء من أكبر أنواع الثعابين على مستوى العالم، وبلغة الأرقام فهي الأكبر على الإطلاق من حيث الوزن، لكن بالنسبة للطول بتحتل الأفعى المشبكية المرتبة الأولى.
ولو فاكر ان الأناكوندا بتعيش بس على اليابس، فالكلام ده غير صحيح بالمرة، ويكفي تعرف ان الاسم العلمي لجنس الاناكوندا “يونيكتس Eunectes” معناه “السباح الجيد”، بتعيش الأناكوندا الخضراء بشكل رئيسي في المستنقعات والجداول بطيئة الحركة في أحواض نهر أورينوكوOrinoco والأمازون، وبالرغم ان حركتها تقيلة على الأرض، إلا انها في المياه بتمتاز بخفة حركة وتسلل في صيد فرائسها، وبيساعدها في القصة ده أن عيونها وأنفها موجودين أعلى راسها، وبالتالي بتعرف تخفي جسمها الضخم تحت المياه وهي في انتظار الكائن المحكوم عليه بالإعدام بأبشع طريقة ممكنة.
الأناكوندا من الثعابين العاصرة غير السامة، عاصرة ازاي يعني؟ يعني بتُعصر فريستها زي ما انت بتُعصر حتة قماش من المياه كده.

في ثواني بتلف الأناكوندا جسمها حوالين الفريسة وتفضل تُعصر تُعصر لحد ما الحيوان يتخنق، ومستحيل تفك قبضتها من عليه إلا في حالة واحدة بس، وهي إن قلب الفريسة يتوقف تماماً عن النبض، وهي ده العلامة ان وجبتها أصبحت جاهزة على الأكل، ساعتها بس بتبدأ تاكله، بس هي مش بتاكل حتة حتة لأ، دِه بتبلع الفريسة حتة واحدة زي ما هي، والفريسة اللي بنتكلم عليها مع الأناكوندا الخضراء بتتنوع ما بين خنازير برية وغزلان وطيور وسلاحف بل وممكن تنجح في افتراس جاجوار أو حتى كَيامِن.

الكَيمَن الأسود Black Caiman

الكَيمَن الأسود زيه زي أي تمساح من عائلة القاطوريات، باستثناء انك تحسه ضارب منشطات، فهو أكبر أفراد عائلته مع طول يتراوح من 4 لـ 5 أمتار ووزن ممكن يوصل أحياناً لنص طن، وبيمتلك جمجمة أثقل وأعرض في تكوينها من تمساح النيل حتى لو كانت المقارنة ما بين تمساح نيل أطول وأضخم من كيمن أسود، وما تنساش ان حجم الجمجمة والفك يعتبروا راس مال التمساحيات وسر قوتهم، ويعتبر الكَيمَن الأسود هو المفترس الرئيسي في مياه الأمازون، لأنه بخلاف حجمه فهو ببساطة كده مافيش حاجة ما بياكلهاش، بما فيها القرود والغزلان والأسماك المفترسة وحتى الأناكوندا، يعني تقدر تقول عليه كده من أسياد المنطقة.
وطبعاً الحمية الغذائية للكَيمَن الأسود لا تخلو من البني آدمين، وكفاية تعرف ان في 5 سنين بس بالفترة من 2008 لـ 2013 هاجم الكَيمَن الأسود 42 بني آدم بالمنطقة، منها واقعة عام 2010 وقعت فيها عالمة الأحياء “ديزي ناشيميرا Deise Nishimura” لحادثة مروعة نجت فيه بشق الأنفس لكن فقدت أحد ساقيها تحت حدة أنياب الوحش المفترس.

الكانديرو Candiru

لعل أكتر الوحوش رعباً في عالم نهر الأمازون وملحقاته، هو من أصغر الحيوانات الموجودة معانا النهاردة، أسماك الكانديرو candiru والمعروفة كمان باسم “خلة الأسنان” ممكن تصيبك بكوابيس صعب تفارق خيالك، النوع ده من أسماك السلور الطفيلية بتمتاز برأس صغير جداً وجسم رفعي وطول يصل في المعتاد لحوالي 17 سم، المخيف بقى في النوعية ده، إنه معروف عنها مهاجمة مجرى البول لأي شخص بالغباء الكافي للتبول في أحواض أنهار الـ أورينوكو Orinoco والأمازون، أيوه زي ما قرأت كده، يقال عنها انها بتهاجم مجرى البول وبتعرف تدخل فيه لغاية ما تتحشر جواه، وبالرغم ان معظم الحوادث المرعبة عن السمكة دِه تم التشكيك في صحتها، إلا إن فيه حادثة واحدة على الأقل مؤكدة لراجل احتاج لتدخل جراحي لإزالة الكانديرو أو خلة الأسنان من مجرى البول عنده، وبعيداً عن البشر، فالمعتاد لأسماك الكانديرو الطفيلية افتراس الأسماك الأخرى عن طريق الإلتصاق بيها والتغذي على دمائها.

قرش الثور

بالرغم إنه من أصغر أنواع القروش المعروفة بمهاجمتها للبشر، إلا ان قرش الثور بيمتلك قوة عضة أقوى من أي قرش تاني مقارنة بحجم جسمه، وعلى عكس معظم القروش الخطيرة، بيقدر قرش الثور إنه يعيش في المياه المالحة والعذبة على حد سواء، وعنده من الشجاعة اللي تخليه يغامر ويدخل وسط الروافد والأنهار زي نهر الأمازون كده.
وزنه ممكن يقترب في بعض الأحيان لـ ربع طن وطوله بيوصل لـ 3.5 متر، والغريب إنه وبالرغم إن البشر مش على قائمة طعامه، إلا إنه بيمتلك رصيد مش قليل من حوادث الهجوم على البشر، والسبب في ده راجع لعدوانيته وحبه السيطرة على المنطقة المتواجد فيها، عشان كده هنلاقي انه واحد من أكتر القروش اللي بتهاجم البشر بدون حتى ما يتعرض لأي استفزاز أو مضايقة من ضحاياه.

البيرانا ذات البطن الأحمر

مدفوعة بحوادث متفرقة وأفلام سينمائية وحكايات السكان المحلين في أمريكا الجنوبية، السمعة المفزعة لأسماك البيرانا دايماً سابقاها باعتبارها أحد أكثر المخلوقات البحرية رعباً على الإطلاق، بتعيش في بحيرات وأنهار أمريكا الجنوبية، تعتبر البيرانا ذات البطن الأحمر أو البيرانا الحمراء من أصغر أنواع الأسماك اللي بتصيب الناس بنفس حالة الخوف اللي بتسببها القروش العملاقة اللي زي القرش الأبيض الكبير، والكلام ده على الرغم ان طولها أول عن اخر بيبقى أقل من 40 سم في المعتاد، بس خطورة النوعية ده من أسماك البيرانا بتتمثل في تجمعاتها اللي ممكن توصل أحياناً لاكتر من 100 سمكة بخلاف انها مسلحة بأسنان حادة وقوة عض عجيبة، مقارنة بحجم الجسم تعتبر عضة البيرانا أقوى من عضة القرش الأبيض الكبير، لدرجة انها تقدر تفرتك الخيوط المعدنية وألياف الكيفلار اللي بُتستخدم في صناعة الصدريات الواقية من الرصاص، وبمنتهى السهولة.
وأسنانها العلوية والسفلية المتشابكة بيشتغلوا مع بعض زي المقصات لتقطيع الطعام، وبيمتازوا بمستشعرات بيحسوا من خلالها بحركة المخلوقات حواليهم بالإضافة انهم يقدروا يشموا ريحة الدم من على بعد أكتر من 3 كم، وتخيل بقى مجموعة من الأسماك بالمواصفات ده بيوصل عددها لأكتر من 100 سمكة ممكن يعملوا ايه في أي حيوان أو حتى إنسان في ظرف دقائق معدودة.

باكو Pacu

بالرغم من الاختلاف التام في الشكل بين أسنانهم وحميتهم الغذائية، إلا ان أسماك الـ”باكو Pacu “والبيرانا بيُعتقد ان فيه صلة قرابة ما بينهم، حتى إن الباكو وهي لسه صغيرة في العمر بتستغل الشبه بين شكلها وشكل البيرانا في التخفي بين مجموعاتها لحماية نفسها من المفترسين، لكن التشابه ده بيزول مع تقدمها في العمر وساعتها بتتجنب الحركة وسطهم، والاتنين بيشتركوا كمان في قوة العضة، فالباكو من الأسماك اللي عضتها قوية جداً، لدرجة إن أكلتها المفضلة في البرية هي ثمار النباتات وخاصة البندق اللي بيقع عليها أحياناً في المياه، وبالرغم إن أسنانها أشبه في شكلها بأسنان البشر، إلا إن عضتها بتقدر تفرتك البندق بمنتهى السهولة.

الأربيمة Arapaima

تعتبر الأربيمة أحد أكبر أسماك المياه العذبة في العالم، مع طول يصل أحياناً لـ 200 كجم وطول يُقدر بـ 3 أمتار، وحراشفها من القوة الكافية اللي بتخلي من الممكن استخدامها كمبرد أظافر، وبفضل لحمها الشهي عند البعض ومعدل سرعة نموها الفائق اللي يعتبر الأسرع بين جميع الأسماك، تعتبر الأربيمة من أفضل الأنواع المثالية للزراعة، وبالرغم إنها بتتغذى على الأسماك، إلا إنها بتحب الفواكه والبذور والحشرات، وعندها القدرة بالرغم من وزنها الضخم إنها تقفز من المياه بشكل سينمائي لارتفاعات متوسطة، وتنتزع الطيور والسحالي وحتى الرئيسيات الصغيرة من على الأشجار المنخفضة من سطح المياه، وعموماً هي بتحتاج تفضل بالقرب من سطح المياه باستمرار، وده لأنها بتحتاج تطلع فوق السطح لاستنشاق الهواء، وما بتقدرش تفضل تحت المياه إلا من 10 لـ 20 دقيقة مش أكتر.
واستراتيجيتها في صيد الأسماك بتعتمد على فتح فمها الضخم وخلق فراغ لسحب الكائنات القريبة منها داخل فمها، وبتساعد ألسنتهم وأسنانهم العظمية الحادة بجانب الأسنان الموجودة على سقف حلقهم في تمزيق فرائسهم بسهولة.

الجاجوار Jaguar

ممكن تستغرب ذكرنا للقطط وسط قائمة بتضم أخطر وحوش نهر الامازون، بس الحقيقة ان الجاجوار من القطط البرية اللي بتمتاز بمهارتها في السباحة ومهارتها في تسلق الأشجار ومهارتها في التسلل، من الاخر كده صياد مفترس على أعلى طراز ممكن تتخيله، ضيف على كده ان عنده عقدة سيطرة، وبيمتاز بطبيعة مهيمنة بتخليه عايز يفرض سيطرته على مساحات مهولة في منطقته ممكن توصل لـ 80 كم مربع.
تالت أكبر القطط البرية على مستوى العالم، القط الاكبر على مستوى الأمريكتين، رابع أقوى حيوان في العالم على مستوى قوة العضة.
وبسبب ان ايديه طايلة أو بمعنى أدق بيعرف يوصل لفرائسه في أي مكان على الأرض أو في المياه أو على الأشجار، فحميته الغذائية جبارة، أسماك وطيور وغزلان وقرود وضفادع وقوارض، وركز معايا بقى في اللي جي، وسلاحف وتماسيح، الجاجوارعنده من قوة العض وحدة الأنياب انه يقدر يثقب صدفة سلحفاة أو جمجمة تمساح، وممكن يمسك أناكوندا متوسطة في الحجم ويتغذى عليها كمان، بس لو واجه الأحجام الكبيرة غالباً بيقصر الشر.