كتير من أفلام الرعب والخيال العلمي الناجحة على مستوى العالم، بتكتسب شعبيتها بسبب ابتكارها واستخدامها لأفكار جديدة في حبكاتها وشكل الكائنات المرعبة في أعمالها، ودايماً ما بتكون الفكوك وشكل الأسنان علامة مميزة في أي كائن مخيف، بس الحقيقة إنه وبالرغم من مجهودات المخرجين والكتاب في ابتكار أشكال مخيفة للشخصيات المرعبة، إلا إن فيه في عالمنا مخلوقات بتتميز بأسنان أشد رعباً من اللي ممكن تتخيلها في أي رواية أو تشوفها في أي فيلم رعب، بل ان بعضها كانت النواة اللي استوحت من خلالها بعض أشهر الأعمال السينمائية أفكارها بالفعل.

قرش قطاعة البسكويت Cookiecutter Shark

قرش قطاعة البسكويت من الأسماك الطفيلية اللي بتتغذى على الكائنات البحرية الاخرى، اسمها نابع من عضتها والطريقة اللي بتقطع بيها اللحم من على جسم ضحاياها، والطريقة دِه بتسيب مطرحها قطْع على شكل دائري زي قطعة البسكويت أو الكوكي بالضبط، بتتميز النوعية ده من الأسماك بأسنان حادة شفافة مثلثية الشكل مع فم بأطراف ماصة، وتركيب فك عجيبة بتخليه يمسك في جسد ضحاياه ويخرج بقطعة لحم دائرية الشكل.

على مدار النهار بتغطس قطاعة البسكويت في المياه لعمق يصل لأكتر من ألف متر في المتوسط، وفي الليل بتطلع بالقرب من سطح المياه للصيد، وبتستغل الخلايا المنتجة للضوء الموجودة في بطنها لجذب فرائسها، وبعدها تهجم على جانبي الفريسة وتمسك فيها قبل ما تقضم قضمتها، العجيب بقى ان السمكة ده أول عن اخر اقل من نص متر، ومع ذلك بتهاجم حيوانات مش ممكن تيجي على بالك ابدأ، حيتان، أسماك التونة الضخمة، قروش بما فيها القرش الأبيض الكبير أو الموت الأبيض، وحتى انه عندها الجرأة على مهاجمة الأوركا سيد البحار، وطبعاً العلماء مش محتاجين تصوير فيديو للوقائع ده عشان يتأكدوا من حقيقتها، فيكفي انك تبص على أثر العضة الشهيرة اللي بتسيبها قطاعة البسكويت على أجساد ضحاياها، ولك أن تتخيل ان السمكة الصغيرة ده بتهاجم كمان أخطر الأجسام الموجودة في عالم المحيطات على الإطلاق ألا وهي الغواصات النووية، وأكتر من حادثة تم التبليغ عنها والقرش بيهجم على المناطق اللينة المكشوفة على الغواصة من الكابلات الكهربائية وقباب السونار المطاطية وغيرها.

القرش المزركش frilled shark

وسط الظلام الدامس في عمق المحيط، بتتحرك واحدة من أغرب أنواع القروش على الإطلاق، مع جسم وحركة أشبه بالثعبان أو الأنقَلَيْس وأسنان مخيفة لأقصى درجة ممكنة، القرش المزركش أو الـ frilled shark قرش غير عادي بالمرة، لدرجة ان البعض وصفه باعتباره أقرب لكائن فضائي منه لسمكة عادية، وكتير بيشوفوا انه من الممكن يكون مصدر الأساطير المتعلقة بــحية البحر أو الـ sea serpent، أسنان السمكة ده مرعبة بالمعنى الحرفي للكلمة، صف ورا صف ورا صف من الأسنان الحادة بيوصل عددهم لـ 300 سن موزعين في 25 صف، وكل سن فيه مجموعة من النتوء الرفيعة أشبه في شكلها بالإبر، والفك الطويل و المرن بيساعد القرش المزركش على أكل مخلوقات أكبر من نصف حجم جسمه، واللي بيوصل طوله في المعتاد لـمترين، وأي كائن يعلق ما بين أسنانه سواء حبار أو أسماك أو حتى قروش زيه، فده يعتبر بمثابة حكم نافذ بالإعدام، لأن مافيش مفر أبداً بالهرب.

أسماك الزناد العملاقة Titan Triggerfish

لما نتكلم عن أسنان مصممة في الأساس لسحق المرجان والأصداف الصلبة في بيئتها بالمياه الضحلة وبين الشعاب المرجانية، فمن الصعب تتخيل ايه اللي ممكن تعمله في جسم إنسان، والمخيف ان أسماك الزناد العملاقة أسنانها أشبه بأسنان الإنسان، وعندها عدوانية شديدة ناحية المتطفلين على منطقتها، وكتير من الغواصين واجهوا بالفعل غضب النوع ده من الأسماك عليهم بسبب وجودهم داخل حدود مناطقهم وبالقرب من عشهم، وبالرغم إن مافيش حالات وفاة تم رصدها إلا ان بعض هجماتها نتج عنها اصابات خطيرة.

فرس النهر Hippo

معظمنا لما بيشوف فرس النهر وهو فاتح فمه الضخم لـ 150 درجة كاملة، ممكن يفتكر انه كده بيتاوب مثلاً، بس الحقيقة انه بيستعرض أنيابه العملاقة، فرس النهر هو صاحب أطول ناب بين سائر الحيوانات البرية على الإطلاق، وبيوصل طول الناب الواحد لنص متر تقريباًK وبالرغم انه بيستخدم نابيه الأشبه بالسيوف في الأساس أثناء صراعاته مع بني جنسه، إلا إنه يقدر يفرتك قارب كامل لنصين عن طريقهم، وما ننساش انه صاحب واحدة من أقوى 5 عضات في عالم الحيوان، وفي حين انه من الحيوانات العشبية اللي بتتغذى على النباتات والأعشاب، إلا ان كتير من البني آدمين بيقعوا ضحايا لأنيابه العملاقة، لدرجة انه بيقتل أعداد أكبر من اللي بيقتلها الأسود والأفاعي السامة وغيرها من الحيوانات المفترسة في افريقيا كل سنة.

مصاصات الحجر Lampreys

غالباً الواحد لما بيسمع عن كائنات طفيلية بتعيش على امتصاص الدم من المخلوقات الحية بيصاب بالقرف، بس في الواقع انك تشوف ازاي العملية دِه بتم، غير وانت بتسمع عنها خالص، الجَلَكَيات أو مصاصات الحجر من الفقاريات البدائية مستديرة الفم، وبالرغم ان ماعندهاش فك من الأساس،إلا ان عندها عشرات الأسنان المنتشرة في فمها، النوعية ده بتمتاز بفم ماص صاحب شكل قمعي بتنتشر فيه الأسنان، وحتى اللسان نفسه فيه سن لوحده، وبتعيش النوعية الغريبة ده من المخلوقات في المياه الساحلية والعذبة ومعظم المناطق المعتدلة باستثناء الموجودة في افريقيا، وبتعتاد الهجوم على جوانب الأسماك المختلفة ومص الدم منها، وأحياناً بيوصل عدد مصاصات الحجر على السمكة الواحدة – لو حجمها كبير – لـ 12 واحدة، يعني بتتكلم في فريق كامل من مصاصين الدماء شغالين في كل حتة تقريباً في جسم فريستهم.

رشال عملاق Goliath Tigerfish

بتنتشر الرشال العملاق أو الـ goliath tigerfish في حوض نهر الكونجو، وبتمتاز بشكل وسمعة مرعبة بسبب أسنانها المخيفة، بيمتلك الرشال العملاق 32 سن في منتهى الحدة بيوصل طول الواحد فيهم لـ 2.5 سم، وبتساعده حدة أسنانه في سهولة غرزها في جسم ضحاياه وتقطيعها لقطع صغيرة، وطول السمكة اللي بيوصل في المتوسط لمتر ونص ووزنها اللي يقدر بـ 50 كجم، بخلاف الصورة مع أسنانها المخيفة، كلها عوامل بتخليها صيد ثمين لهواة صيد الأسماك، والكلام ده بالرغم ان فيه تقارير متعددة عن حوادث لهجوم النوعية ده من الأسماك على البشر في منطقة نهر الكونجو.

Fangtooth Moray

الـ fangtooth moray هي نوع عجيب من الانقليسيات اللي بتمتاز بفك طويل وأسنان حادة أشبه في شكلها بالزجاج، والغريب ان الجزء السفلي من فم الانقليس ده مافيهوش غير صف واحد من الأسنان على كل جانب، في حين ان الجزء العلوي بيتميز بمجموعة متعددة من الصفوف، وبسبب كم و طول أسنانها اللي بيوصل لحوالي 2 سم، فحتى وهي قافلة فمها بتبنان أسنانها زجاجية الشكل بوضوح على الجانبين، ولو شايف ان ده مرعب فاستني لما تعرف ان فيه أسنان مخفية كمان غير اللي ظاهره للعيان، والحقيقة هي مش مجرد أسنان، ده فك تاني لوحده.
بتتمتع أسماك الانقليس بسلاح سري بتستخدمها في الفتك بفرائسها، السلاح ده عبارة عن فك داخلي موجود خلف الجمجمة ومعاه الأسنان بتاعته، وبعد ما بيمسك الانقليس فريسته بأسنانه الخارجية ويحكم قبضته عليها، بيطلق الفك الداخلي عشان ياخد الفريسة ويسحبها لجوه على طريقة أفلام الرعب والخيال العلمي، أو الأدق ان هي اللي بتستوحى أفكارها على طريقته.

رمح القاطور

يعتبر رمح القاطور من أكبر أسماك المياه العذبة في أمريكا الشمالية وأكبر أنواع أسماك الرمح على الإطلاق، مع طول يصل في المعتاد لأكتر من مترين وأحياناً لـ 3 أمتار، ووزن يقترب من الـ 100 كجم، اسمه نابع من الجزء الأمامي الممتد من وشه واللي عامل زي الموجود عند القاطور، بالإضافة كمان لأسنانه الطويلة الحادة، وبتقدر النوعية ده من الأسماك تعيش في مسطحات مائية غيرها من الأسماك ما يتحملش يقعد فيها وبيتخنق منها بسبب قلة الاكسجين،، فـرمح القاطور بيتميز بقدرته على الطفو واستنشاق الهواء، والعجيب ان الفك العلوي عند السمكة ده موجود فيه صفين من الأسنان، والصف الداخلي بيحتوي على أسنان أطول من الصف الخارجي، والنظام ده بيساعدها في اختراق لحم فرائسها وإحكام قبضتها عليه بمنتهى السهولة.

الفقمة آكلة السرطان Crabeater seal

تعتبر الفقمة أكلة السرطان هي أكثر أنواع الفقمات انتشاراً على الإطلاق، وبتقدر التقارير تعدادها من 7 مليون لـ 25 مليون فقمة، وساعد في إزدهار أعدادها وفرة وجبتها الرئيسية من الكريل في بيئتها الرئيسية حوالين ساحل القارة القطبية الجنوبية، فعلى الرغم من اسمها إلا إنها بتتغذى على الكريل في المقام الأول، بل انها ما بتاكلش أصلاً السلطعون ولا بتيجي جمبه، وفي حين ان اسنانها مش حادة أو قوية بالصورة اللي ممكن تتخيلها، إلا انها مصممة بشكل فريد لمساعدتها على الامساك بوجبتها المفضلة من الكريل، أسنان الفقمة مع قفل فكها بتشكل حاجة أشبه بالمنخل أو الغربال، وده بيساعدها انها تفلتر الكريل من المياه بعد ما تبلعهم في المياه.