أول ما تيجي سيرة القروش قدامنا، بيجي على بالنا أنواع زي القرش الأبيض الكبير وقرش الثور أو قرش النمر، وده بسبب شهرتهم وظهورهم المتكرر في الاخبار أو البرامج أو على شاشات السينما، بس ده ما يمنعش ان فيه أنواع تانية كتير من أسماك القرش بيوصل عددها لأكتر من 375 نوع، وبعضها أغرب مما تتصور.

القرش الدرّاس Thresher shark

في معظم القروش، الجزء الأمامي منهم هو الخطر الحقيقي، أسنان حادة وفك قوي، بس القرش الدرّاس قصة مختلفة تماماً، وخطورته الحقيقية متمثلة في الجزء الخلفي منه، مش الأمامي، ذيلهم الطويل أشبه بالمنجل وفي حركته وضرباته عامل زي الكرباج، وطوله لوحده ممكن يعادل طول جسم القرش نفسه، ولسنين طويلة ماحدش كان متأكد من السبب ورا الشكل الغريب للذيل ده، وايه الهدف منه.
وفي 2010 بالفلبين نجح “سيمون أوليفر Simon Oliver” مؤسس مشروع أبحاث القرش الدرّاس والحفاظ عليه، في تصوير فيديو هو وفريقه بيرصد حقيقة استخدام القرش للذيل ده، الدرّاس بدل ما يقعد يجري ورا سمكة صغيرة عشان يفترسها، بيدخل على مجموعات أسماك السردين الصغيرة، ويضربهم بديله ضربة أشبه بلسعة العقرب، ممكن تقول في نفسك يعني هي ضربة الديل دِه هي اللي هتموت السمك؟
لما يبقى الديل عامل زي الكرباج وبيضرب بسرعة ممكن توصل لأكتر من 100 كم في الساعة، النتيجة بتكون صعق أو قتل 5 / 6 أسماك في المرة الواحدة ده إن لم تكن أكتر، بل إن قوة الضربة ممكن توصل لدرجة انها تقسم السمكة الصغيرة نصين، وبعدها يسبح حواليها القرش الدرّاس ويبلعها على بعضها، أو على أقل تقدير أجزائها اللي اتبقت بعد الضربة.

قرش المطرقة العظيم Great Hammerhead Shark

ما بين 9 أنواع من قروش المطرقة، يعتبر قرش المطرقة العظيم هو أكبرهم على الإطلاق، وفي نفس الوقت، أحد أغرب أنواع القروش اللي ممكن تشوفها في حياتك، سهل أوي تتعرف عليه دوناً عن أي نوع من أنواع أسماك القرش بسبب شكل راسه المميز اللي عامل زي المطرقة أو المجرفة كده، بيعيش في المياه الدافية والاستوائية بالمحيط الأطلسي والهادي والهندي، وبيهاجر للمياه الأهدى شوية في حراراتها خلال فصل الصيف، وراسهم اللي عاملة زي حرف الـ T مع عين على كل طرف، بتديهم مجال رؤية واسع جداً لدرجة انه بيوصل لـ 360 درجة، وهي ميزة بتنفرد بيها مجموعة محدودة من المخلوقات في العالم كله، وأعضائهم الحسية الموجودة على راسهم العريضة دِه، بتديهم القدرة على مسح المحيط بحثاً عن طعامهم واللي بيتنوع بين الاسماك والقشريات والحبار والاخطبوط، لكن أهم فريسة بالنسبالهم على الإطلاق هي أسماك الرقيطة أو الطباق Stingrays والمعروفة بوجود شوكة سامة في نهاية ذيلها الطويل، قرش المطرقة بقى مش بس بيقدر يكتشفهم وهما مستخبيين في الرمال، لأ وكمان عنده مناعة من سمومهم.

والطريقة اللي بيصطادهم بيها مثيرة جداً، فتلاقيه بيثبتها الأول براسه الضخمة في قاع البحر وبعدين يعض زعانفها عشان يمنعها من الحركة، وفي النهاية يتغذى عليها براحته وعلى أقل من مهله، بالنسبة للبشر، فهو مش عدواني بطبيعته لكن في حالة استفزازه بطريقة أو بأخرى، ممكن يهاجم أي مخلوق قدامه في مجاله.

ووبجونج wobbegong

ووبوجونج هو الاسم الشائع لـ 12 نوع من أسماك القرش المعروفة بالـ “قرشيات السجادية”.
اسم السجادية جي من الجسم المفلطح للنوعية دِه من القروش وطريقتهم في السباحة، واللي بتخليهم أشبه ببساط هائم في قاع المحيط، أما كلمة “ووبجونج wobbegong” فهي كلمة مصدرها السكان الأصليين لاستراليا ومعناها “أشعث اللحية”، نسبةً للزوائد الموجودة حوالين فم السمكة وجاونب راسها، النوعية دِه من أسماك القرش بتعيش بشكل رئيسي في المياه الضحلة والاستوائية، وبالتحديد حوالين استراليا وأندونيسيا، خصوصاً في الخلجان والكهوف والقيعان الصخرية وكذلك الشعب المرجانية، تلاقيها دايماً بالقرب من قاع المياه بالذات مع استفادتها من شكل جسمها المفلطح والأنماط اللي بتفترش جلدها عشان تتموه في الرمال وبين الصخور، بتمتاز بفك قوي وأسنان حادة وبتتغذى على جميع أنواع أسماك الشعب المرجانية وأحياناً أسماك قرش زيها كمان، وبالرغم ان المعروف عنها في العموم عدم تعرضها للبشر، إلا ان الواقع والسجلات بتقول غير كده تماماً.
يعني تلاقي مثلاً في السجلات الاسترالية عن هجوم اسماك القرش، تسجيل أكتر من 50 حادث لهجوم الـووبجونج أو القروش السجادية على البشر، لأ وايه بدون اي استفزاز يٌذكر من الضحايا وفي السجل الدولي لهجوم أسماك القرش تم تسجيل 28 حادث لهجومهم على البشر، فـعلى الرغم ان اسنانها صغيرة جداً، إلا ان حدتها مع فكها القوي بتخلي عضتها تخترق بِدّل السباحين، وبعض الأنواع منها زي الووبجونج المنقطة، معروف عنها انها بتطلع على ضهر ضحاياها ومش بتنزل من عليه وكأنها لزقت.

القرش المتشمس basking shark

وقفت بجانب بقرة كبيرة قبل كده؟ شكلها مخيف مش كده؟
تخيل دِه بيبقى وزنها حوالي 500 كجم، هيكون ايه رد فعلك بقى لو وقفت بجانب حيوان أد البقرة دِه 10 أضعاف، وطوله أكتر من 10 أمتار، وخصوصاً كمان ان شكله مايطمنش، لكن أحياناً المظاهر بتكون خداعة، والقرش المتشمس أكبر دليل على كده.
يعتبر الـ basking shark أو القرش المتشمس هو تاني أكبر أنواع الأسماك في المحيط على الإطلاق، ومن أغرب أنواع أسماك القرش اللي ممكن تشوفها، اكتسب اسمه من اعتياده السباحة بالقرب من سطح المياه وزعنفته الظهرية بارزة فوقيها، ومع حركته البطيئة جداً ممكن تحس انه مريح مثلاً تحت أشعة الشمس وبيتشمسله شوية، بيعيش في المياه المعتدلة في كل أنحاء العالم تقريباً، وكتير بتلاقيه بالقرب من اليابس خصوصاً عند الخلجان اللي بتمتاز بمداخل ضيقة، وممكن تلاقيه بالقرب من سطح المياه وعلى عمق يصل لـ 900 متر تحتها، أكتر ما بيميزه هو فمه العملاق، فـالقرش المتشمس لما بيفتح فمه، بيوصل عرضه لمتر كامل، طبعاً لما تشوف سمكة بالمواصفات دِه داخلة عليك، وفاتحة بقها بالشكل أو الوسع ده، هتتشاهد وخلاص كده، بس الحقيقة ان النوعية ده من أسماك القرش ماعندهاش اهتمام في أكل أي حاجة باستثناء العوالق وبيض الأسماك، وفمهم الواسع ده بيدخلوا بيه على مجموعات العوالق ويلتهموا منهم على أد ما يقدروا، وبالرغم من نهم البشرية على اصطيادهم بكميات كبيرة على مدار السنين بسبب زعانفهم الضخمة أو الزيوت في أكبادهم، إلا ان النوعية دِه من القروش عمرها ما أظهرت أي علامات خوف أو عدوانية اتجاه البشر أو حتى المراكب حواليها، وبالمقارنة بحجم جسمهم الضخم، يمتلك القرش المتشمس أصغر مخ بين جميع أنواع القروش المعروفة بالنسبالنا، وبالرغم من مخهم الصغير وسرعتهم البطيئة وحجمهم الضخم، إلا انهم بيقدروا يقفزوا بالكامل خارج المياه في محاولة ذكية منهم لطرد الطفيليات من على أجسادهم.

قرش القرن Horn shark

قرش القرن هو واحد من أغرب أنواع القروش، الجزء العلوي من راسه عامل زي واحد مكشر وشه لدرجة ان بقى فيه تجاعيد بارزة فوق عنيه، والبروز ده هو السبب في تسميته، فالحواف البارزة فوق عينيه اعتبرها العلماء أشبه بالقرون، وسمّوه قرش القرن.
راسه صغيرة وخطمه منحني أو تحسه متني لجوه، وطوله بيعمل حوالي واحد متر ووزنه ممكن يوصل لـ 9 كجم، طريقته في السباحة أقرب للدفع في قاع المياه أو تقدر تقول بيزحف كده باستخدام زعانفه القوية، وبسبب حساسيته الشديدة للضوء، بيعيش معظم حياته مستخبي في الكهوف والشقوق بين الصخور بعيداً عن أي ضوء في موطنهم المحدود بالقرب من سواحل كاليفورنيا والمكسيك، حميته الغذائية معتمدة على الجمبري وسرطان البحر، لكن أكلته المفضلة على الإطلاق هي قنافذ البحر، ومن كتر أكله للنوعية دِه من القنافذ من أصحاب اللوان الأرجواني، أصبح معظم أفراده مميزين بأسنانهم المصبوغة بنفس اللونK ومن أغرب المعلومات اللي ممكن تعرفها عنه، ان النوعية دِه من القروش وعلى عكس أقرانها مرتبطة جداً بمناطقها ونادراً ما بتبعد عنها، لدرجة ان فيه قرش قرن تم أسره ووضع علامة عليه قبل تحريره في منطقته مرة تانية، وعثروا عليه زي ما هو في نفس المنطقة بعد 11 سنة.

قرش الملاك Angel Shark

من الصعب على اي مخلوق انه يلاحظ وجود قرش الملاك وهو مستخبي في قاع المياه، وده مش بسبب صغر حجمه، لكن لمهارته العجيبة في التموه، فيه 24 نوع من أسماك قرش الملاك حوالين العالم، ومن الممكن تتلغبط بينهم شوية وبين أسماك الرايز أو شياطين البحر بسبب جسمهم المفلطح، إلا ان سهل تفرق ما بينهم عن طريق زوج الزعانف الظهرية الموجودة عندهم، بجانب طريقتهم في السباحة زي معظم القروش وحركة ذيولهم يمين وشمال، النوعية دِه من القروش بتستخدم اسلوب المباغتة في الصيد، تستخبى الأول بقاع المحيط عن طريق دفن نفسها في الرمل، وتنتهز اللحظة المناسبة للانقضاض على فريستها من أسماك أو حبار أو كريل، طريقتها في التموه بالرمال في قاع المياه عجيبة جداً، فتلاقيها بتختار موقعها وتثبت فيه قبل ما تبدأ تُنفض جسمها في الارض بشكل متكرر لحد ما الرمل يتنطر ويطلع على جسمها لغاية ما يغطيها ويخفي وجودها بالكامل بإستثناء عينيها.
وفي الوقت ده بتقدر تثبت بدون حركة بشكل مثير للاعجاب، لدرجة ان الباحثين اللي بيغطسوا عشان يدرسوا سلوكها في قاع المياه، ممكن يقربوا منها ويعملوا حركات مباغتة حواليها، وتلاقيها ثابتة في مكانها ما بتتحركش، وكأنها مش موجودة.

قرش العفريت Goblin shark

لعل أغرب أنواع القروش على الإطلاق وأكثرها ندرة وأحد أغرب الأسماك في العالم على الإطلاق هو قرش العفريت، واللي يعتبر النوع الوحيد المتبقي من عائلته بعد انقراض جميع أفرادها.
بيعيش بالمحيط من أول سطح المياه لحد عمق يصل لـ 1300 متر، لكن فرص العثور عليه محدودة جداً، ومن لحظة وصفه بشكل علمي في أواخر القرن الـ 19 وحتى وقتنا هذا، تم رصده مرات معدودة مش أكتر، الجزء البارز من وجهه مليان بالمستقبلات الحسية اللي بتقدر تلتقط حركة الفرائس حواليه، عشان كده بيعتمد عليه في اكتشاف وجباته فوق قاع البحر، زي اللي بيستخدم جهاز الكشف عن المعادن، وبيعتقد الباحثين ان النوعية دِه من القروش حركتها بطيئة في المياه وكذلك نظرها ضعيف، وبدل من مطاردة الفريسة، بيستنى انها تمر بالقرب منه، وهنا بيعمل حاجة زي الضفدع اللي بيطلع لسانه لالتقاط الحشرات، بس بدل اللسان؛ الفك نفسه هو اللي بيخرج من فمه، لأ وايه بيخرج بسرعة مهولة تُقدر بـ 3 أمتار في الثانية الواحدة، ايوه زي ما قرأت كده، الفك يطلع مرة واحدة من الفم ويمسك في الفريسة اللي بتتنوع ما بين أسماك وحبار وقشريات.