تليفونك القديم منجم ذهب حقيقي

ياما باظت مننا أجهزة إلكترونية، موبايل كنا ناسينه جنب كوباية شاي أو إزازة مياه والمياه وقعت عليه، وكمبيوتر البوردة بتاعته اتحرقت فجأة، وأيبود كان معانا من سنين و قرر إنه مش عايز يكمل أكتر من كدة ومن ساعتها وهو مرمي في الدرج، وغيرهم كتير لو قعدنا نفكر كل الحاجات دي أحنا بنتعامل معاها على إنها خردة أو حاجه مالهاش لازمة، لكن إيه رأيك لو قولتلك إن الأجهزة اللي أنت بترميها دي عبارة عن مناجم ذهب؟
لكن قبل ما نعرف إزاي فيهم ذهب؟ والذهب ده بيعمل إيه في موبايل؟ وإزاي ممكن تستخرجه بسهولة؟ خليني أقولك إن الموبايل القديم اللي متشال في الدرج مينفعش نقارنه بمنجم الذهب ولا حاجة وده لإن الموبايلات فيها قد المناجم 70 مرة.

ليه الذهب؟

الفلزات هي المعادن الموصلة للكهرباء والحرارة، وكمان معادنها بتتميز باللمعان، بسبب الخصائص اللي بتتمتع بيها بعض العناصر الفلزية واللي مش موجودة في عناصر تانية، بتبقى هي دي الاختيار المثالي لشركات الإلكترونيات علشان تطلعلنا أفضل منتج ممكن، يعني مثلًا لو عندنا عنصر بيوصل كهرباء كويس، بس فيه عنصر تاني بيوصل الكهربا بعشر أضعاف سرعة العنصر الأول فأكيد هنختار العنصر التاني، بس هنا بتظهر مشكلة تانية إن العنصر التاني اللى بيوصل بسرعة ده، ممكن يكون نادر فى الطبيعة أو يكون الجرام منه بثمن كيلو من العنصر الاول، علشان كدة مثلًا بنستعمل النحاس بشكل أساسي في الكهربا اللي عندنا في البيوت على الرغم من إن فيه عناصر تانية بتوصل الكهربا أحسن منه، لكن اختيارنا النحاس علشان متوفر بشكل أكتر وبأسعار أقل بكتير، في الصناعات الكبيرة النقطة دي بتكون مشكلة حقيقية وبنلاقي الاختيارات قائمة بشكل أساسي على خطط إقتصادية مدروسة، وإيه اللي ممكن يكسب الشركة أو لأ، لأن الهدف الأول والأخير للشركة هو الأرباح بس، في صناعة زي صناعة الإلكترونيات الموضوع بيكون مختلف شوية، وده لإن الشركة مش محتاجة معادن بكميات كبيرة، يعني هتلاقي تليفونك بيكون محتاج جرامات قليلة من المعادن وكمان لو جينا نبص على نسبة المعادن النادرة هنلاقيها قليلة جدًا، وفيه بعض الدراسات بتقول إن جرام الذهب الواحد بيتعمل منه من 35 لـ 40 تليفون، ده غير طبعاً إن الموبايلات مش رخيصة وبالتالى المعادن اللي بتتحط دي المشترى بيدفع تمنها، لو جينا بقى نتكلم عن الذهب بشكل خاص هنلاقي إن الذهب موجود في أماكن كتيرة على البوردة وده بسبب خصايصه الجيدة في التوصيل، وكمان هنلاقي شركات كتير بتدهن بيه المسامير وبعض المعادن التانية علشان تحميها من الصدى.

موبايلك القديم يساوي 70 منجم ذهب!

من المعروف إن كل طن من الأرض بيكون فيهم نصف جرام من الذهب فى المتوسط، الرقم ده بيتضاعف لما نلاقي منجم ذهب، وساعتها ممكن يكون في كل طن من خمسة لستة جرام، في عام 2018 تم نشر بحث بيأكد إن طن الأرض فيه فعلا نصف جرام ذهب، والمنجم فيه من خمسة لستة جرام في كل طن من الأرض، بس الجديد اللي البحث بيقدمه إن لو جبنا طن من الموبايلات نقدر نطلع منه 350 جرام ذهب، يعني بحسبه بسيطة هنلاقي إن طن الموبايلات ممكن نطلع منه قد اللي بيطلع من ستين لسبعين طن من أراضي مناجم الذهب.

بعد البحث ده العالم كله بدأ يهتم بمناجم الذهب اللي مع كل واحد فينا لكن ماكنش يعرف عنها حاجة، وأتعمل كتير من الدراسات العلمية اللي بتدور حولين الموضوع، منها دراسة بتقولنا إن متوسط عدد الأجهزة الإلكترونية الغير مستعملة عند كل أسرة أمريكية 80 جهاز، من أول الموبايلات واللاب توب والتلفزيونات القديمة وفرشاة الأسنان اللي شغالة بالكهرباء وماكينة الحلاقة وغيرها، وبسبب إن عدد الأجهزة القديمة في كبير، ده دفع ناس كتير تبدأ رحلة استخراج الذهب بنفسها.
وبعد ما عرفنا بقى إن فيه ذهب موجود فى كل جهاز إليكترونى، هل ممكن نستخرج الذهب ده بنفسنا؟ الإجابة أيوه، خليني بقى أشرحلك إزاي ممكن نوصل للذهب الموجود في ألاجهزة دي؟

إزاي تستخرج الذهب من تليفونك القديم؟

أول حاجة هنفصل البوردة اللي قررنا تستخرج منها الذهب، وعلى الرغم من إن فيه أجزاء تانية بيكون فيها ذهب، لكن في الغالب البوردة هي الجزء الرئيسي اللي بنستخرج منه، بعد ما بناخد البوردات من كل الأجهزة القديمة بنحطهم في وعاء مناسب لحجمهم، وبنضيف عليهم حامض النتريك المركز، الحامض ده بيبدأ يدوب كل المعادن اللي موجودة قدامه على البوردة، بعد ما المعادن كلها تدوب هناخد ألاجزاء المتبقية من البوردة ونتخلص منها، وبناخد حمض النتريك اللي دايب فيه المعادن، لحد هنا بيبقى عندنا المعادن كلها مختلطة مع بعضها، لكن علشان نوصل للذهب لوحده، هنبدأ خطوة جديدة لاستخلاصه في الخطوة دي بنستعمل مادة من أشهر المواد الكيماوية اللي بتدوب الذهب بشكل خاص مادة مشهورة باسم الماء الملكي، والماء الملكي هو مزيج من حمض النتريك والهيدروكلوريك، وهى الأحماض اللى بتكون بتركيز عالي جدًا بتتفاعل مع الذهب وبتدوبه بشكل كامل في السائل اللي موجود عندنا، كدة أحنا دوبنا الذهب في الأحماض بس لسه عندنا باقي المعادن اللي محتاجين نفصلهم عن الذهب، ودي خطوة سهلة لأ الذهب هو بس اللي دايب في الماء الملكي، وعلشان نفصله بنرشح السائل في وعاء تاني وبكده يبقى عندنا الذهب لوحده، بعد كدة بنحط كمية قليلة من اليوريا وكمية كبيرة من بودرة بيروكبريتيت الصوديوم، بعدها ذرات الذهب بتبدأ تتجمع مع بعضها وبتترسب في قعر الوعاء اللي بنستخدمه.

بعد ما الذهب بيترسب قدمنا، بناخد الوعاء اللي معانا وبنبدأ نرشح تاني، علشان نفصل الراسب، واخر خطوة معانا هي أننا بناخد الراسب وبنحطه في وعاء بيستحمل الحرارة، وبنعرض الذهب للهب بشكل مباشر، وبنسخن الراسب لحد ما بيكون قطعة من الذهب.

مشاكل استخراج الذهب من هاتفك القديم

بالرغم من إننا نقدر نوصل للذهب ونستخلصه، إلا إن الطريقة دي غير منتشرة، وده لأسباب كتير.
أولها وأهمها هو التعامل مع الأجهزة الإلكترونية نفسها، وده لإن الأجهزة دي زي ما فيها ذهب ومعادن مهمة، إلا إن فيها مواد خطيرة ومضرة للإنسان وللبيئة، وممكن الإنسان لو معندوش دراية كافية باللي بيتعامل معاه، تتحول التجربة من محاولة استخراج ذهب لحادثة مؤسفة بيتعرض فيها صاحبها لمواد سامة، كمان عندنا سبب تانى بيخلي ناس كتير تبعد عن استخراج الذهب، والسبب ده هو صعوبة بعض طرق استخلاص الذهب، وكمان أسعار المواد الكيمياوية المُستعملة، وناس كتير من اللي جربت قالت إن المكسب اللي طلعوا بيه من استخراج الذهب كان قليل، من الأسباب التانية المهمة هي إنك محتاج كمية كبيرة من التليفونات والأجهزة علشان تقدر تستخرج كمية معقولة من الذهب، ولو أشتغلت على على كمية قليلة من التليفونات هتلاقي في الأخر صعوبة علشان توصل حتى لجرام واحد من الذهب.

مشاريع عملاقة تستخرج الذهب من الإلكترونيات

زي ما قولنا إن استخراج الذهب من تليفون مش عملية سهلة، ومع ذلك بنلاقي ناس كتير مبتضيعش وقت وبتشوف المشاكل وبتستغلها لصالحها، وموضوع إعادة تدوير الإلكترونيات مش بعيد عن الناس دي، علشان كدة هنلاقي ناس قررت تستغل الموضوع لأكتر درجة ممكنة، بنوا معامل ضخمة وجابوا كيميائيين ومهندسين وبقوا بيعيدوا تدوير الإلكترونيات بشكل اقتصادي وبياخدوا منها الذهب والفضة والنحاس، أحد الشركات الناشئة فى نيوزلندا اسمها Mint Innovation، قررت تستخدم كائنات حية دقيقة بترتبط بأنواع معينة من المعادن، وبالكائنات دي بدأوا يستخرجوا معادن مهمة من الإلكترونيات وعلى رأسهم الذهب، وأصبحوا قادرين على إعادة تدوير طن من الإلكترونيات أسبوعياً، فيه مشاريع تانية في العالم بقى ليها إهتمامات مشابهة، وفيه مشروع دلوقتى تحت الإنشاء في أستراليا متوقع يكون قادر على إعادة تدوير 10 طن من النفايات الإلكترونية يومياً، وطبعاً محدش يعتقد ان رقم 10 طن ده رقم كبير، الباحثين قدروا نسبة النفايات الإلكترونية فى عام 2021 بأكثر من 57 مليون طن، والمتوقع ان الرقم ده يوصل 74 مليون طن بحلول عام 2030، فاحنا فعلاً محتاجين لجيش من المصانع من النوعية دي، عشان يقدروا يتخلصوا من كم النفايات الإلكترونية الرهيب ده ويعيدوا تدويرها مرة تانية، منها يحصلوا على الذهب ومنها يحافظوا على البيئة من خطر النفايات الإلكترونية.