الألم هو واحد من الأشياء اللي صعب جدًا إننا نوصفها أو نعبر عنها من خلال الكلمات، لكن بالرغم من كده أي شخص بيتألم بيحاول قدر الإمكان إنه يوصف تعبه والشعور اللي حاسس بيه سواء لـ الطبيب المعالج أو حتى لأقرب الناس إليه، وكتير فعلًا بينجحوا في إنهم يوصلوا إحساسهم وتعبهم للي حواليهم، لدرجة إنه من شدة ودقة وصف البعض لحالة مُعينة بقينا نقدر نخمن مقدار الألم المُصاحب لحالته.

العصب ثلاثي التوائم Trigeminal nerve

لو مُعتقد إن ألم الأسنان هو أسوأ الآلام على الإطلاق، فخليني أعرفك على العصب ثلاثي التوائم والمعروف بإسمه الدارج “العصب التالت”، وهو العصب الرئيسي اللي بيخدم الوجه؛ وده لأنه بيحمل 3 فروع مسئولين عن أحاسيس العين والفم والفك، واللي بتوصل في النهاية للدماغ.
والآلم الخاص بالعصب ده في العادة بيحصل في الجانب الأيمن، لكنه ممكن يأثر بشكل أو بآخر على كلا الجانبين، وبيوصف مرضى العصب الثلاثي الألم بأنه بيشبه لحد كبير الصاعقة اللي بتضرب الوجه، وفي كل المرات اللي كان بيسأل فيها الأطباء المرضى ويطلبوا منهم إنهم يدوا نسبة للألم اللي بيشعروا بيه بدلالة رقم من 1 لـ 10، كلهم كانوا بيقولوا أرقام أكبر من 10، وده في إشارة منهم على مَدى صعوبة الألم.
الشخص المصاب بالعصب التالت، في بداية الأمر بيشعر بنوبات شديدة من الألم والوخز اللي بتشبه الصّدمات الكهربائية، وده بيحصله بمجرد ما بيعمل أفعال بسيطة زي لمس الوجه أو المضغ أو غسل الأسنان أو حتى التحدث، وبتتراوح نوبات الألم المستمرة بين بضع ثواني إلى دقائق معدودة، والنوبات نفسها على فترات مُتقطعة بتستمر لمدة أيام أو أسابيع وأحيانًا شهور ، وده قبل ما الموضوع يتطور ويبدأ يشعر بـ ألم العصب التالت نفسه.
والسبب في حدوث مرض العصب التالت في الغالب بيكون بسبب شريان دم موجود في موضع غير طبيعي وضاغط على العصب، وفي أحيان تانية ممكن تكون الإصابات الجراحية أو السكتة الدماغية أو أي صدمات في الوجه هي المسؤولة عن ألم العصب ثلاثي التوائم.
ألم العصب ثلاثي التوائم في العادة بيصيب النساء أكتر من الرجال، وبيزيد مُعدل حدوثه غالبًا في الفئة العمرية الأكبر من 50 سنة.

الحروق Burns

واحدة من أصعب الآلام واللي للأسف في بعض الأحيان بتسيب آثارها للوفاة هي الحروق، من المعروف إن الحروق درجات من الأولى لحد الرابعة، والفرق ما بينهم هو الطبقة اللي بيوصل ليها مُسبب الحرق داخل أعماق الجلد.
الجلد بيتكون من 3 طبقات، الطبقة الخارجية الرقيقة والمعروفة بالبشرة (Epidermis)، والطبقة الوسطى الأكثر سماكة والمعروفة بالأدمة (Dermis)، وأخيرًا الطبقة السُفلية والمعروفة بطبقة الأنسجة تحت الجلد أو الـ(Hypodermis).
الحروق من الدرجة الأولى بتسبب تلف بسيط في الجلد، وعشان كده بتسمى حروق سطحية، بتسبب إحمرار وإلتهاب طفيف وفي بعض الأحيان تورم، وحروق الدرجة الأولى مؤلمة لكنها في العادة ما بتبقاش خطيرة، ومش بتسبب مشاكل على المدى الطويل، وفي معظم الحالات مابيبقاش في حاجة أو داعي للتدخل الطبي.
أما بخصوص الحروق من الدرجة التانية فدي ممكن تكون ناتجة عن الماء المغلي أو حروق الشمس الخطيرة، وبيشمل الحرق الطبقتين العلويتين من الجلد البشرة والأدمة، والحروق دي مؤلمة لكنها مش بتترك وراها أثار أو ندبات ملحوظة، لكنها ممكن تكون خطيرة لو أصابت مساحة كبيرة من الجلد، وبتلتئم الحروق دي خلال فترة بتتراوح من سبعة أيام ل 21 يوم.
أما بخصوص الحروق من الدرجة الثالثة فبتقدر إنها تدمر كل طبقات الجلد، وفي بداية الأمر الموضوع بيكون مؤلم لأقصى درجة، لكن بعد كده ممكن الألم يتوقف تمامًا، وده مش عشان الجرح خف ولا حاجة، ولكن بسبب إن النهايات العصبية ممكن تكون اتدمرت تمامًا.
وأخيرًا الحروق من الدرجة الرابعة وهي للأسف أسوأهم، النوع ده من الحروق بيشمل جميع أعراض الحروق من الدرجة الثالثة وبيمتد كمان إلى ما وراء الجلد فى الأوتار والعضلات والعظام.

كسور العظام Bone breaking

لما الجسم بيتعرضّ لأي قوة خارجية بيبدأ يقاوم القوة دي من خلال العظام في المقام الأول، لكن في حالة إنه مقدرش يقاوم بتبدأ عظام الجسم تنكسر أو تتشقق؛ كنتيجة لعدم قدرتها على تحمّل القوة اللي تعرضت لها، وده بياخدنا لأحد أسوأ أنواع الآلام على الإطلاق، ألا وهي آلالام كسور العظام.
كسر العظام أمر مؤلم جدًا، وده لأسباب كتير زي وجود النهايات العصبية حوالين الألياف اللي بتتضر عند تعرض العظام للكسر، والنهايات العصبية دي هي المسؤولة في المقام الأول عن نقل الإحساس ومُتصلة بشكل مُباشر بالجهاز العصبي المركزي، بالإضافة إلى تشنج العضلات في المنطقة المحيطة بالعظام المكسورة هو كمان له دور كبير في حدوث الألم.
ومن ضمن الأعراض اللي بتصاحب كسر العظام هي الألم الحاد مش بس في المنطقة اللي حصل فيها الكسر، ولكن في كل المنطقة المحيطة بيها، وبيحصل بعد كده انتفاخ في مكان الكسر، وبالرغم من إن ده شئ صحي جدًا؛ لأنه بيدل على بداية جبر العظام أو إلتئامها، إلا أنه بيسبب ألم شديد وحاد.
وألم العظام بينتمي لـ فئة الألم الجسدي العميق، وفي كتير من الأحيان بيتم تصنيفه كـ ألم أصم؛ لأن المريض في العادة مابيقدرش يحدد مكان الألم بالظبط، ولكنه بيتألم وخلاص وده طبعًا على عكس الألم اللي بيحصل بواسطة المُستقبلات السطحية في الجلد.

آلم الولادة

طبعًا الموضوع مايكتملش بدون ذكر أشهر الآلام على الإطلاق، ألا وهو ألم الولادة، ألم الولادة بيختلف من إمرأة لأخرى، كل أم بتشعر بيه بطريقة مختلفة، لكنه في الغالب بيتضمن أمور ثابتة زي الوجع في أسفل البطن والظهر والحوض والفخذين مع بعض الانقباضات، وعدد من النساء وصفوا ألم الولادة بإنه شعور أشبه بتضيق مفاجئ داخل الجسم، وخصوصًا في عضلات الرحم.
وبيشعروا كمان وكأن المعدة تقلصت فجأة، وعدد تاني وصفوه وكأن فيه شخص بيضغط على بطنهم من الخارج بحمل ضخم جدًا، وبعد كده يشيل الحمل للحظات معدودة، وبعدين يعيد الكرة مرة تانية، بجانب ألم حاد جدًا في الظهر وضغط على العمود الفقري، والموضوع بيُصبح أخف مع تحسن الإنقباضات وإختفائها تدريجيًا.
لكن كل النساء بتتفق إن الألم ده بيخف حدته وبيصاحبه سعادة بعد الولادة واللحظات الأولى من رؤية الجنين.

الصداع النصفي Migrane

وخلينا ننتقل لألم تاني يمكن كتير مننا مر بيه ألا وهو الصداع النصفي، الصداع النصفي واللي بيعتبر مرض مزمن، وفي الغالب بيصيب نصف الرأس.
المرض شائع بنسبة كبيرة، فحوالي 12% من الاشخاص حول العالم بيصابوا بيه، واللي بيمروا بالتجربة بيوصفوا شعورهم بأنه أشبه بقصف الرعد داخل الدماغ، تشوش ذهني مهول وشعور بنبضات مُتتالية، وحساسية تجاه أي دوشة.
الألم في العادة بيبدأ من أحد الجانبين، وبعدين بينتقل للجانب التاني، وبيزداد الآلم تدريجي في وقت قليل، وبيبدأ يأثر على أداء الشخص بالكامل وممكن يكون سبب في توقف الشخص عن جميع أعماله على مدار اليوم؛ لأن في حالات كتير بتوصل الأعراض للغثيان والقئ وتصلب الرقبة، وده بجانب شعور الشخص باضطراب في الإحساس وصعوبة في الكلام وهبوط حاد، والشائع أن موضوع الصداع النصفي ممكن يستمر لبضعة ساعات، والحالات الشديدة ممكن يستمر لأكتر من 3 أيام.

حصوات الكلى Kidney stones

بحسب بعض الإحصائيات اللي إنطلب فيها من الناس إنهم يحددوا أكتر شئ مؤلم تعرضوا ليه خلال حياتهم، كانت أحد أكتر الإجابات المتكررة هي حصوات الكلى.
حصوات الكلى هي واحدة من أكتر الحالات المرضية اللي بنسمع عنها ويمكن عدد كبير مننا أو من المقربين لينا عانوا منها بشكل أو بأخر، وقبل ما نعرف إزاي حصوات الكلى بتعتبر واحدة من أشد الآلام اللي ممكن يتعرض ليها الإنسان، ف خلينا نعرف إيه هي حصوات الكلى أصلاً، حصوات الكلى بتكون عبارة عن كرات صلبة من معادن وأملاح تركيزها بيعلى في الجسم وبتتشكل داخل الكلى في صورة بلورات وبمرور الوقت بتتحول لحصوات.
وأحجامها بتتراوح في حجمها من حبة رمل لحباية بسلة، وفي الحالات النادرة ممكن تكبر عن كدا كمان، لو حجم الحصوة أقل من كده ممكن تنزل عبر المسالك البولية بدون ألم أو بألم بسيط، أما لو زادت عن 5 ملم ممكن تمنع تدفق البول، وده اللي بدوره بيسبب إنتفاخ الكلى وموجات من الألم الحاد في منتصف الظهر أو البطن أو الجوانب فيما بعد.
ومش بس الآلام دي اللي بتكون مُصاحبة للحالة، ولكن بيظهر أعراض أخرى زي الغثيان والقئ والحمى ووجود دم في البول، والأشياء دي مُجتمعة بتكون من أصعب ما يكون.
علاج الحالة المرضية دي في معظم الأوقات بيكون من خلال السوائل الوريدية والأدوية اللي بتسمح للحصوات إنها تمر من المجرى الطبيعي للبول، أو إنها تتفتت نسبيًا، لو كانت حجمها كبير، بيتم إستخدام آلية تفجير الحصوات من خلال الموجات الصادمة، أما لو كانت الحصوات حجمها كبير خالص أو عددها كبير بيتم اللجوء وقتها لطرق طبية مختلفة أكثر تعقيدًا.