أضخم الكلاب في العالم

من آلاف السنين والصداقة نشأت بين الكلب والإنسان واللي قدر يثبت أنه الصديق الأوفى لصاحبه، واللي ممكن يدفع حياته تمن للدافع عنه، وبتختلف أنواع الكلاب وصفاتها وأشكالها وأصولها ووظيفتها، فهنلاقي لكل نوع اللي بيميزه عن النوع التاني، واللي صفاته ممكن متنفعكش في مهمة لكنها في مهمة تانية هتكون ونعم الطلب.

السلالة الدنماركية العظيمة The great Dane(zeus)

تعتبر “السلالة الدنماركية العظيمة The great Dane” الفصيلة الأطول بين كلاب العالم، ومفيش معلومة مؤكدة هل جذور الفصيلة دي ألمانية ولا دنماركية، لكن في بعض الأقاويل بتقول أن الفصيلة استخدمت لأول مرة في ألمانيا لصيد الخنازير البرية.
ونتجت السلالة الدنماركية العظيمة The great Dane من تهجين نوعين من الكلاب، وهما كلاب الدرواس الإنجليزية The English mastiffs، وكلاب الذئاب الأيرلندية The Irish wolfhounds، ومن مواصفاتها اللطف، والهيبة، وقوة البنية، وضخامة الجسم.
وأحد فصيلة الكلاب دي واللي بيُدعى “زيوس zeus” وصل طوله لحوالي 2.2 متر وبلغ ارتفاعه 1.1 متر، وبناءًا عليه فاز بلقب الكلب الأطول في العالم طبقا لموسوعة جينيس عام 2012م، وعلى الرغم من أن زيوس يبان عليه أنه نشيط ونحيف، لكن وزنه وصل لــ 70 كيلوجرام، ومات زيوس قبل ما يكمل 6 سنوات بشهرين، وعلى الرغم من أنه مات بطريقة طبيعية إلا أن الفصيلة نفسها ممكن تعيش فترة أكتر من كدا.

كلاب البيتبول The pit bull (Hulk)

تقريبًا محدش فينا سواء مهتم بالكلاب أو لأ مسمعش عن فصيلة كلاب الـ”بيت بول pit bull”، والمشهورة جدًا بسبب شكلها المميز وصفاتها العنيفة، وعلى الرغم من شراستها وعنفها اللي دايمًا كانوا سبب الحكاوي عنها وتصنيفها كواحدة من أخطر السلالات في العالم إلا أننا النهاردة بنتكلم عن الحجم والضخامة.
وبيرجع تاريخ كلاب البيتبول لأوائل القرن التاسع عشر الميلادي في المملكة المتحدة لما نتجت من تهجين كلب “البلدغ الأمريكي American bulldog” وكلب “البيتبول ترير الأمريكي American pit bull terrier”، وارتبطت كلاب البيتبول دايمًا بالعنف والشراسة؛ لأنها اكتسبت شعبيتها واسمها وقوتها من خلال رياضة دموية كانت بتمارس زمان بتُعرف باسم “صيد الثيران bull baiting”.
وواحد من أضخم كلاب الفصيلة دي وهو كلب يُدعى “هالك hulk” واللي اكتسب شهرته بسبب مواصفاته الجسدية العملاقة، فهنلاقي طوله من أنفه للذيل حوالي 1.6 متر، في حين وزنه وصل لحوالي 80 كيلو جرام، يعني حوالي 3 أضعاف وزن أي كلب بيتبول تاني، وعلى الرغم من حجم hulk الضخم وشكله المخيف إلا أن أصحابه “مارلون وليزا Liza & Marlon Grannon” بيقولوا أنه كلب عائلي لطيف وصديق لابنهم جوردان البالغ من عمره حوالي 3 سنوات، واللي بيسيبوهم يلعبوا مع بعض وهما مطمنين عليه، دا هما اللي بيقولوا مش أنا.

كلاب الدرواس التيبتي Tibetan Mastiff (THE HAIRY HONG DONG)

أما فصيلة كلاب الدرواس التيبتي أو الماستيف التيبتي، فهي مش بس واحدة من أضخم فصائل الكلاب على الإطلاق، ولكنه معروف كمان بأنه الكلب الأغلى على مستوى العالم، وبتعيش فصيلة الماستيف التيبتي في الصين، والهند، ومانغوليا، لكن بيرجع أصولها للصين، وتحديدًا لهضبة التبت الموجودة في جنوب غرب الصين واللي أتسمى على إسمها .
وتعتبر الفصيلة دي من أقدم فصائل الكلاب الموجودة في منطقة التبت والمرتفعات الشاهقة لجبال الهيمالايا، واللي استخدمها سكان المنطقة في الحراسة والرعي وحماية أغنامهم من الذئاب.
وبتتميز كلاب الدرواس التيبتي بفرو كثيف جدا وقامة طويلة وقوة كبيرة وحجم هائل بالنسبة لفصائل تانية كتيرة، وفي الغالب بيتوقف ارتفاع كلاب الفصيلة عند حوالي 66 سم في حين وزنها بيوصل لأكثر من 45 كيلوجرام،
ويعتبر كلب “هونج دونج THE HAIRY HONG DONG” واحد من أشهر كلاب فصيلة الدرواس التيبتي إن مكنش أشهرهم على الإطلاق، واللي وصل طوله لمتر تقريبًا ووزنه لحوالي 81 كيلوجرام، وشهرته مش بس عشان حجمه الكبير ووزنه التقيل؛ لأ دا لأنه أغلى كلب أتباع في العالم، واللي أتباع لرجل أعمال ومليونير صيني بمبلغ 1.5 مليون دولار، ولو مستغلي الفلوس اللي اتدفعت فخليني أقولك أن الروتين الشهري بتاعه في التغذية بيكلف 4.000 دولار.

نيوفاوندلاند Newfoundland

على الرغم من أن سلالة نيوفاوندلاند واحدة من أضخم فصائل الكلاب على الإطلاق، إلا أنها مختلفة جدًا في طباعها وتصرفاتها ومهامها، فالكلاب دي متولدش عشان تكون كلب حراسة أو صيد
بيرجع أصل تسمية الفصيلة لجذورها وهي جزيرة نيوفاوندلاند الموجودة قبالة سواحل كندا، أما عن أصولها فنشأت الفصيلة بترجع لوصول المستكشفين من أيرلندا وإنجلترا إلى نيوفاوندلاند في ثمانينيات القرن التاسع عشر لما كان في نوعين من الكلاب العاملة، وهما نيوفاوندلاند الكبرى التي كانت أكبر حجمًا وبشعر طويل، ونيوفاوندلاند الصغرى واللي كانت كلاب متوسطة الحجم واللي تعتبر السلالة التأسيسية لكلب نيوفاوندلاند الموجود حاليًا، وبيوصل ارتفاع فصيلة نيوفاوندلاند لحوالي 76 سم، بينما وزنها بيوصل لــ 68 كيلو جرام في المتوسط.
وبتتميز فصيلة نيوفاوندلاند بأنها كلاب قوية البنية ونشيطة وعاملة مش كسولة خالص، دا غير حجمها الكبير واللي بيبان أضخم بسبب شعرها الكثيف، والهدف اللي اتولدت عشانه كلاب سلالة نيوفاوندلاند هو مساعدة الصيادين في سحب الشباك وإنقاذ الناس من المياه؛ ودا بسبب قدرتها على أنها تجيب أي حاجة تقع في المياه بما في ذلك الأشخاص، وفعلاً على مدار تاريخها نجحت الكلاب في إنقاذ ناس كتيرة جدًا من الغرق والوصول بيهم لبر الأمان.

كلاب الدرواس الإنجليزي The English mastiff (Zorba)

فصيلة الدرواس الإنجليزي The English mastiff اللي بجانب كونها أكبر كلب في موطنها الأصلي إنجلترا، فهي واحدة من أضخم الكلاب على الإطلاق بسبب وزنها الثقيل جدًا.
وعن نشأتها وأصلها فدا محل خلاف كبير ، لكن أكثر الأقاويل إنتشارًا هي أن كلب الدرواس هو أقدم سلالة كلاب بريطانية فضلت موجودة في إنجلترا لعدة قرون أو ربما آلاف السنين بدون أي تغير نسبيًا.
وبيتوقف ارتفاع كلاب فصيلة الدرواس الإنجليزي عند حوالي 76 سم في حين وزنها بيوصل لــ 100 كيلو جرام بكل سهولة وبيزيد عنه كمان.
وعلى الرغم من جرأة وشجاعة الفصيلة واستخدامها قديمًا في كل أنواع الرياضات الدموية، وفي الحراسة، والحرب، وصيد الحيوانات الكبيرة زي الدببة والثيران وحتى الأسود، إلا أن مع الوقت تم ترويضها وأصبحت على الهيئة الموجودة عليها حاليًا من الطيبة والحب لأصحابها وللأطفال، ودا اللي بيجعلها واحدة من أنسب الفصائل للتبني وحماية أصحابها من أي خطر ممكن يواجهه.

وبين حين وآخر بيخرج كلب من فصيلة الدرواس الإنجليزي دي يدهش محبي وهواة الكلاب زي الكلب “زوربا zorba” اللي فاز بلقب الكلب الأثقل في العالم طبقًا لموسوعة جينيس في سبتمبر عام 1987م، واللي وصل وزنه لحوالي 155 كيلو جرام، بينما ارتفاعه كان 94 سم من عند الكتف، أما طوله من الأنف للذيل فوصل لحوالي 2.5 متر.

كلاب الدرواس الباكستاني Bully kutta (The Pakistani Mastiff)

بيرجع تاريخ فصيلة (الدرواس الباكستاني Pakistani Mastiff) للقرن السادس عشر تحديدًا في مناطق البنجاب في الهند والسند في باكستان، وفيه روايتين حول أصول الدرواس الباكستاني، الأولى بتقول أنها نشأت كفصيلة مباشرة من سلالة “ألونت القديمة The Ancient Alaunt” وهي سلالة كلاب صيد كبيرة كانت بِتُرَبَّى قديمًا للصيد والقتال والدفاع عن معسكرات أسيادهم، والرواية الثانية بتقول أنها نشأت وقت غزو بريطانيا العظمى للهند في القرن الثامن عشر الميلادي، تحديدًا لما بدأ يُربى كلب الدرواس الإنجليزي الذي جلبه الجنود مع كلب الدرواس الهندي واللي نتج عن تهجينهم الدرواس الباكستاني واللي بيعرف باسم Bully Kutta.
وبتتميز الفصيلة دي بثنايا جلد مترهل حول الفك والعنق مع جسم عضلي ضخم ورأس عريضة وساعات نادرة بتكون عيونهم صفراء وأنفهم أحمر، أما وزن الفصيلة ففي بعض الحالات القليلة وصل وزنها لـ 90 كيلوجرام تقريبا أما ارتفاعها فممكن يوصل لحوالي متر.
وعلى الرغم من أن كلاب الماستيف الباكستاني لم تعد تُستخدم في النزال والقتال إلا أنها مازالت غير ودودة، لكن لو عاوز كلب حراسة فأنت جيت للكلب المناسب.

ولف هاوند الإيرلندي The Irish Wolfhound

تعتبر فصيلة “ولف هاوند الإيرلندي The Irish Wolfhound” واللي تعتبر واحدة من أضخم الكلاب في العالم،وبخصوص إرتباط اسمها بالذئاب؛ فدا بيرجع للقرن الخامس عشر لما الذئاب اجتاحت الريف الإيرلندي، وقتها بدأت الفصيلة اللي كانت بتستخدم في اصطياد الفرائس الكبيرة زي الغزلان والخنازير تتخصص في صيد ومطاردة الذئاب، ومن كتر ما كانت الكلاب دي بتؤدي وظيفتها على أكمل وجه، بدأت الذئاب فعلًا واحدة واحدة في الإقراض من البلاد، وعلى الرغم من أن الفصيلة دي نحيفة مقارنة بالفصائل الأخرى اللي معانا وعلى الرغم من كونها مش ضخمة ولا بجسد عضلي إلا أن ارتفاعها مهول، وبيتعدى ارتفاع السلالة الدنماركية العظيمة، وبيوصل ارتفاع الفصيلة دي لأكتر من 90 سم من القدم إلى الكتف، في حين طولها ممكن يوصل لحوالي 2 متر، أما وزنها فساعات بيتخطى الـ 81 كيلوجرام.
وزي ما ذكرنا، الفصيلة كانت بتستخدم زمان في الصيد، وكمان كانت بتشارك في الحروب عن طريق جرجرتها لمقاتلي العدو من على خيولهم ومركباتهم وقت المعركة، لكن مع الوقت تطورت مهامها وبقت تستخدم في الحراسة بجانب الصيد، دا غير أنها نجحت في أنها تكون صديق جيد للإنسان، بحيث يمكن تربيتها وسهل تكيفها مع الحياة العائلية خصوصًا وأنها بتتميز بالهدوء والراحة والذكاء وسرعة الاستجابة والطاعة لصاحبها.