الشاي، والقهوة، والنسكافيه، والمشروبات اللي بتحتوي على الصودا، كلها حاجات أغلبنا ما بيصدق يصحى من النوم علشان يجري عليها ويشرب حاجة منها، ولو في الصيام الواحد ما بيصدق المغرب يأذن علشان يشرب حاجة منها، بل وكمان فيه ناس بتفطر عليها، ولو مكنتش واحد من النوعين اللي فاتوا دول، فـ أنت غالبًا هتكون النوع التالت واللي هو يدوبك أول ما يخلص وجبة الأكل بتاعته سواءً كانت فطار أو غدا أو عشا برضو بيجري يشرب مشروب من اللي فاتوا دول، وفي كل الحالات ده بيكون دليل على إدمانك للمشروب ده، فلو إدمانك غير صحي، رمضان أحد الفرص الذهبية للتخلص منه.

رمضان فرصة

مبدئيًا كده رمضان بيعتبر فرصة حقيقية للتخلص من أي حاجة انت عايز تتخلص منها، أي عادة سيئة بلا استثناء تقدر تتخلص منها في رمضان، وأحد العادات السيئة دي واللي بتأثر بشكل ملحوظ على صحة عقلك وجسمك هي إدمان الكافيين، بيعتبر الكافيين أحد أكثر المواد المُنشطة للدماغ استخدامًا في العالم والأكثر شيوعًا بين الناس؛ وده بيرجع لتأثيرات الكافيين على دماغ وجسم الإنسان زي تنشيط الدماغ، والزيادة مؤقتا من حِدة التركيز، وتحسين المزاج وغيرها من التأثيرات اللي بيعملها الكافيين في الجسم، ولو عايز تعرف أكتر عن الموضوع ده، فـ كنا عملنا حلقة منفصلة على القناة بتتكلّم عن “الآثار الصادمة للكافيين على دماغك وجسمك”، والكافيين موجود في حاجات كتير في حياتنا، أشهرها بين الناس الشاي والقهوة، واستخدام الكافيين شئ صحي، لكن طبعًا زيه زي أي حاجة، الإفراط في استخدامه بيؤدي لكارثة، لكن إيه هي أضرار الإفراط في الكافيين، وإزاي بيحصل إدمان الكافيين أصلًا؟

أضرار الإفراط في الكافيين

بالرغم من كون الكافيين له فوايد كتير على جسم الإنسان، وإن لحد دلوقتي مفيش اتفاق بصورة كاملة على إنه بيسبب مشكلة كبيرة في الجسم، إلا إن بعض الأطباء والباحثين اتفقوا على إن الإفراط في استخدامه بيعمل مشاكل، ومن أهم المشاكل والآثار الجانبية للإفراط في الكافيين هو التوتر والقلق، والأرق، وارتفاع ضغط الدم، وسرعة في ضربات القلب، والإرهاق الدائم، وتكسير في الجسم، وتقرحات الفم، واضطراب الجهاز الهضمي، والجفاف، وإصفرار الأسنان، وضعف الأسنان، وآلام الظهر والعضلات وغيرها كتير من المشاكل، وطبعًا كل ده – فضلًا – عن تحولك من مجرد شخص بيستهلك الكافيين لشخص مُدمن للكافيين.

أمّا عن سؤال إزاي بيحصل إدمان الكافيين، فـ الكافيين مادة كيميائية زيها زي كتير من المواد الكيميائية القابلة للإدمان، بتصيب حالة الإدمان دي ناس كتير نتيجة كثرة تناولهم للمشروبات والمأكولات اللي بتحتوي على الكافيين زي الشاي، والقهوة، والشيكولاتة الداكنة، والحاجة الساقعة، وحتى بعض الحبوب ومشروبات الطاقة اللي بيستخدمها الشباب أثناء ممارسة الرياضة؛ ونتيجة تأثير المادة دي على كيمياء المخ، وارتباطها بحالات تحسين المزاج، وزيادة القدرة على التركيز أو الاستيقاظ لمدة أطول، ومع استبدال المادة اللي بتخلي الإنسان يشعر بالنعاس واللي هي الأدينوسين بمادة تانية مُنبهة، واللي هي الكافيين بتبدأ مُستقبلات الأدينوسين تزيد في الدماغ، ومع الوقت بيبقى الجسم بحاجة لكمية أكبر من الكافيين علشان يحصل نفس التأثير اللي هو متعود عليه، ومن هنا بيحصل الإدمان، والسؤال هنا بقى إزاي أتخلص من إدماني للكافيين؟

التخلص من إدمان الكافيين؟

بعض الدراسات أوضحت إن الكافيين بيستغرق من 3-5 ساعات علشان الجسم يقدر يتخلص منه، وبكده تبقى أول خطوة هي إنك تحاول ما تشربش أي حاجة بتحتوي على الكافيين في خلال مدة أقل من 5 ساعات على الأقل، وبما إن أصلًا الفترة بين الفطار والسحور حوالي 9 أو 10 ساعات بس، فحاول إنك تقدر ما تشربش شاي أو قهوة أو أي حاجة عمومًا بتعتبر مصدر للكافيين غير مرتين بس، وفيه بعض الدراسات بتقول إنك علشان تقدر تكتسب عادة، أو تتخلص من عادة، فـ انت بتحتاج في المتوسط حوالي 21 يوم علشان تكتسبها أو تتخلص منها وبعضهم قال إن المدة دي بتبدأ من 21 يوم، ولازم تستمر لحد 90 يوم، وفي الحالتين لو بدأت الموضوع في رمضان أنت هتقطع شوط كبير.

التدرُّج

التدرُّج آلية طيبة جدًا لإكتساب شيء معين أو التخلص منه، وأفضل طريقة تتخلص بيها من إدمان أي حاجة، هي تقليل الحاجة دي بصورة تدريجية، فـ لو أنت من اللي بيستهلكوا كمية كبيرة من الكافيين حاول تقلله كل يوم جزء ولو بنسبة بسيطة عن اليوم اللي قبله، وده علشان جسمك ما يتأثرش بالآثار الجانبية للتخلص فجأة من مادة كيميائية هو متعود على وجود كمية كبيرة منها يوميًا، ومع انتهاء رمضان هتلاقي النتائج الصغيرة بتاع كل يوم اتجمعت كلها في يوم واحد علشان تلاقي نتيجة تغلبك على إدمان الكافيين، أو على الأقل التقليل منه بصورة كبيرة.

استبدال المشروبات

أحد الخطوات اللي ممكن تساعدك على التخلص من إدمان الكافيين في فترة الصيام، هو إنك تستبدل المشروبات اللي بتحتوي على الكافيين زي الشاي والقهوة بالعصائر الطبيعية وبالشاي الأخضر، وبالفاكهة، وبالمياه كمان، والمياه بتعتبر مُساعد جيد للجسم في التخلص من الآثار السلبية ومن بقايا الكافيين الموجود جسمك، وزي ما قلنا إن الكافيين بيعرض الجسم للجفاف، وبالتالي جسمك بيكون محتاج تعويض لنسبة المياه اللي فقدها بسبب الكافيين، بالإضافة لممارسة الرياضة كل يوم على الأقل لمدة 10 دقايق؛ بتساعد على التخلص من إدمان الكافيين، وبعيدًا عن الكافيين الرياضة مهمة عشان الصحة.

النوم المنتظم

النوم المنتظم بيعتبر أحد الحلول للتخلص من إدمان الكافيين، وده عن طريق التخلص من الصداع المستمر في رأسك، واللي بيحفزك إنك تشرب كفايين في الأساس؛ تنظيم فترات النوم بتساعد الجسم على الراحة، والتخلص من الإرهاق والتعب اللي بينتجوا إما عن جهد بيبذلوا، أو عن عدم تناول مادة كيميائية زي الكافيين، والنيكوتين، وغيرهم، وعلشان تتفادى الاستيقاظ المزعج خلال فترة النوم، فـ حاول قَدر استطاعتك تثبت ميعاد يومي للنوم، وقبل الميعاد ده بفترة كافية، حاول تقلل من شرب المشروبات اللي بتحتوي على الكافيين، وكذلك تجنب استخدام الموبايل أو اللاب توب، وكمان حاول النوم يكون فترة كافية يقدر الجسم يستريح فيها؛ علشان يقدر يستمد جزء كافِ من الطاقة اللي تساعدك تكمل اليوم اللي بعده بدون ما تشعر بالإرهاق أو الصداع، وتضطر تلجأ لحبوب الصداع، واللي هي أصلًا في حد ذاتها بتحتوي على الكافيين.

الماغنسيوم

كثرة الكافيين في الجسم بتتسبب في نقص الماغنسيوم في الجسم ؛ لذلك فـ من الحاجات اللي ممكن تساعدك إنك تتغلب على إدمانك للكافيين، وتجنب مشاكل نقص الماغنسيوم في جسمك كمان؛ هو إنك تتناول المأكولات والأطعمة الغنية بالماغنسيوم في فترة الإفطار؛ وده تعويضًا للي بيتسبب الكافيين للجسم في فقدانه؛ وفي نفس الوقت لأن عنصر الماغنسيوم بيساعد على الحد من فقدان الشهية، ومن الصداع اللي بيسببه الكافيين، وكذلك بيساعد على التقليل من نسبة ألم العضلات، واضطراب النوم اللي بيعمله الإدمان.

الخلاصة

زي ما قلنا إن من الخطوات اللي ممكن تساعدك على التخلص من إدمان الكافيين هو استبدال المشروبات اللي بتحتوي على الكافيين، هي المشروبات النباتية أو العشبية تقدر تساعدك على التخلص من مشاكل كتير، وأهمها إدمانك للكافيين، والمشروبات دي زي اليانسون، والنعناع، والبابونج، والشاي الأخضر، وعصير التفاح الأخضر.
وفي النهاية أنت ما وصلتش لمرحلة إدمان الكافيين في يوم وليلة، والموضوع بس هيحتاج منك شوية وقت علشان تقدر تتخلّص منه، وجسمك يرجع لحالته الطبيعية مرة تانية.