ماذا لو.. أختفى المشتري من المجموعة الشمسية؟

يعتبر كوكب المشتري واحد من أبرز كواكب مجموعتنا الشمسية، فـ بغض النظر عن شكله الجميل والمهيب؛ فهو كمان بيعتبر أكبر كوكب في مجموعته، بل إننا لو جمعنا كتل كل كواكب المجموعة الشمسية على بعضها، كوكب المشتري هيكون أكبر منهم بحوالي مرتين ونص، بس تفتكر إيه أهمية كوكب بالحجم دا، وهيحصل إيه لو اختفى تمامًا من المجموعة الشمسية، أو ما كانش موجود من الأساس؟!

كوكب المشتري المتجول

على مدى العقود الأخيرة اكتشف علماء الفضاء أكتر من ألف كوكب خارجي بيدوروا حوالين نجوم تانية غير الشمس، والكواكب دي كلها بتكون مع نجومها أنظمة شمسية شبه نظامنا، وبالرغم من التشابه الكبير ما بين نظامنا الشمسي والأنظمة الشمسية التانية؛ إلا إن الفلكيين لاحظوا إن معظم الأنظمة الشمسية التانية كواكبها الكبيرة بتدور في مسارات قريبة جدًا من نجومها أقرب بكتير من مسافة عطارد للشمس بتاعتنا، يعني مثلًا في سنة 1995م اكتشفنا كوكب إسمه 51 Pegasi b كتلته بتساوي تقريبًا نص كتلة كوكب المشتري، ومع ذلك بيدور حوالين نجمه في مسار أقرب 20 مرة من المسار اللي بيدور فيه كوكب الأرض حوالين الشمس، ودا إن دل؛ فبيدل على إن كوكب بحجم وجاذبية المشتري كان المفروض يدور حوالين الشمس بمسافة أقرب من مسافة عطارد.

وعشان العلماء يفسروا حاجة زي دي، خرجت نظرية مُرجحة بتقول إن بالفعل في بداية نشأة الكون، كوكب المشتري ساب مساره بسبب كتلته وجاذبيته العالية وقرب جدًا من الشمس، ولكن لإن شمسنا كانت مُحاطة بحزام من الغبار والغاز فكوكب المشتري أثناء تجوله خبط فيهم وكون كواكب صخرية، واللي هما دلوقتي عطارد والزهرة والأرض والمريخ، والفرضية دي بتقول إن كوكب زُحل بعد ما اتكون هو اللي كان السبب في جذب المشتري في مساره مرة تانية، والكلام دا معناه إن كوكب المشتري لو ما كانش موجود الأرض نفسها ما كانتش هتكون موجودة.

دِرع المشتري لحماية الأرض

في الـ10 سنين اللي فاتوا كوكب المشتري أتعرض تقريبًا لحوالي 5 مُذنبات أو كويكبات على الأقل، ودا بس اللي قدرنا نرصده، الفلكيين بيتوقعوا إن كوكب المشتري بيتعرض للصدمات دي من مرة لـ5 مرات كل شهر، طيب.. إحنا مالنا بقى بالكلام دا، الحقيقة إن لولا كوكب المشتري؛ كان زمان كل الصدمات دي بتصطدم بالأرض، بس لإن جاذبية المشتري مهولة؛ فهو بيعمَل كدرع حماية لكوكب الأرض من المذنّبات والكويكبات اللي ما لناش سيطرة عليها، إلا إن أحيانًا ممكن يحصل إن المذنّبات والكويكبات تِفلت من جاذبية المشتري وتصطدم بالأرض، بس ساعتها هيحصل تغير جذري في شكل الكوكب وحتى الكائنات الموجودة عليه غالبًا هتنقرض، زي ما حصل في عصر الديناصورات.