في 24 أغسطس من عام 79 من الميلاد، وتحديدًا في مدينة بومباي الإيطالية، انفجر بركان جبل فيزوفيس Vesuvius، بطاقة إنفجار أقوى 100 ألف مرة من إنفجار هيروشيما وناجازاكي، ونتج عنه سحابة ضخمة من الحجارة والرماد والأبخرة، وصل إرتفاعها لأكتر من 33 كيلومتر في الهواء، ومات بسبب الإنفجار كل سكان المنطقة واللي عددهم كان أكتر من 10000 شخص، وادفنت مدينة بومباي بأكملها تحت أكوام من الرماد، لمئات السنين ولحد ما تم إكتشافها في عام 1748 م.
ماذا لو انفجر مرة ثانية؟
بركان فيزوفيس هو واحد من أخطر البراكين في العالم، وده مش بسبب حادثة مدينة بومباي وبس، لكن لإنه موجود في أكتر المناطق البركانية في العالم كثافة، من حيث عدد السكان حوالي 3 مليون شخص بيعيشوا قريب جدًا منه، منهم 800 ألف شخص موجودين في منطقة الـ red zone أو المنطقة القريبة منه، والخطير كمان بخصوص البركان هو إنه موجود فوق خزان ضخم من الحمم البركانية مدفونة في باطن الأرض، في البداية هيحصل إنفجار حراري ضخم جدًا قادر إنه يحرق أي شئ هيقابله في أقل من ثانية، وهتبدأ الحمم البركانية والصخور تخرج من الفوهات وتزحف على سطح الأرض، وهتلتهم أي حاجة هتقابلها في طريقها، وفي نفس الوقت هيبدأ الرماد والدخان يملوا الغلاف الجوي على هيئة عمود أسود – ممكن يوصل طوله لأكتر من 32 كيلومتر، ومدينة بومباي ومدينة نابلوي الموجودين في وقتنا الحالي واللي هما الأقرب للبركان، الإتنين هيندفنوا تحت أكوام من التراب اللي هيوصل إرتفاعها لـ 20 متر، ومفيش بيوت ولا مباني هتقدر تتحمل الأوزان دي من الأتربة أو حتى درجات الحرارة المرتفعة، وكل اللي بنحكي عنه ده هيحصل في أقل من ربع ساعة بس.
تأثير الإنفجار
ومش بس سكان المنطقة هما اللي هيتأثروا، لكن للأسف ووفقً للمعهد الوطني الإيطالي للإحصاء، المنطقة دي بيزورها أكتر من 3 مليون سائح سنويًا، وللسبب ده هيتحول الإنفجار البركاني لمأساة لكوكب الأرض بأكمله، لكن طبعًا الضرر الأكبر هيكون من نصيب إيطاليا كل المناطق المجاورة للبركان هتتحول لصحراء قاحلة، الأرضية بتاعتها ماهياش رمال ولكنها حِمم بركانية ملتهبة، وحجم الخسائر زي ما تم تقديرها هيوصل لأكتر من 24 مليار دولار، والرقم ده كمان غير شامل بدائل السكن اللي هتوفرها إيطاليا للناجيين من البركان، وللسبب ده كل الجهات المعنية بيحاولوا إنهم يتنبؤا بالخطر بكل الطرق ويستعدوا ليه.
لكن المشكلة الكبيرة اللي هتواجه الحكومة الإيطالية في الإخلاء في حالة الإنفجار ، هو إن المنطقة لازم يتم إخلاءها في أقل من 72 ساعة من إعلان حالة الطوارئ، في حين إن إخلاء 800 ألف شخص هيستغرق لوحده حوالي أسبوعين، وحتى لو قللنا عدد السكان للنص، فالأمر هيستغرق 8 أيام، وطبعًا البركان مش هيستنى المدة دي كلها عشان ينفجر، فـ اللي بتحاول الحكومة الإيطالية إنها تعمله، هو إنها بتشجع سكان المنطقة ينتقلوا منها، وده عن طريق إنها بتدفع لكل شخص يوافق على الإنتقال 46 ألف دولار أمريكي، وده في محاولة منهم لحماية أكبر عدد من السكان – من خطر بركان فيزوفيس اللي وارد ينفجر في أي لحظة.