أي حد من اللي بيسمعونا دلوقتي أكيد شاف قبل كده شخص مركب تقويم أسنان، بل إن إنت شخصيًا ممكن تكون ركبت تقويم أسنان قبل كده في مرحلة من مراحل حياتك.
لكن بالرغم من الإنتشار الكبير للتقويم، إلا إن آلية عمله مش مفهومة لكتير من الناس، ممكن شخص يبقى الفك العلوي من أسنانه بارز للخارج أو عنده مشكلة معينة في ترتيب الأسنان، لكن بعد ما يستخدم التقويم نكتشف إن أسنانه رجعت تاني لشكلها ومكانها الطبيعي!
فإزاي الحاجة الصغيرة اللي بيتم تركيبها داخل الفم دي، بتكون قادرة إنها تعيد تنظيم الأسنان بالشكل المذهل ده؟
وإيه مَدى صِحة الأقاويل اللي بتُثار حوالين تقويم الأسنان، هل صحيح إن التقويم بيضعِف الأسنان وبيتسبب في حدوث تشققات فيها؟؟
وهل بعد إنتهاء العلاج، بتبقى الأسنان مُتراخية وعُرضة للتساقط ولا لأ؟
امتى أحتاج تقويم أسنان؟
في البداية خلينا نعرف إيه الحالات اللي بتستدعي وجود تقويم الأسنان، أو إيه الهدف من استخدامه بوجه عام، في أشخاص كتير بيعانوا من حالات عدم الانتظام في أسنانهم، زي مثلا إن يبقى في مُشكلة في تطابق الفك العلوي والفك السفلي عند الشخص، ومابيقدرش يقفل شفتيه على بعض كويس، وكذلك من أكبر الأعراض أو المشاكل اللي بتبقى موجودة عند كتير من الناس، هو ازدحام الأسنان وكِبر حجمها في منطقة معينة من الفم، أو التوائها و تداخلها في منطقة تانية، أو إن يبقى في نقص في عدد الأسنان، واللي بدوره يتسبب في وجود فراغات كبيرة بين الأسنان وبعضها.
الأعراض الظاهرية دي كلها بقى مع مرور الوقت، ممكن تسبب مشاكل خطيرة جدًا، زي مثلا حدوث خلل في وظائف الفم، بمعنى إن الشخص يحصل عنده مشكلة في الكلام والنطق، وكذلك مضغ الطعام، أو ممكن بسبب عدم انتظام الفك والأسنان يحصل ضِيق في مجرى التنفس الأنفي، ده غير بقى المشاكل الثانوية اللي ممكن تحصل زي تسوس الأسنان المفرط ، وخصوصًا في الحالات اللي بيكون فيها فراغات بين الأسنان، لأن بقايا الطعام بتتجمع في الفراغات دي بشكل مكثف، بالإضافة لـ الإلتهابات اللي ممكن تحصل باللثة، واحتمال تعرض الأسنان الأمامية البارزة للكسر، ده غير طبعًا إن فيه جانب نفسي لو صاحب الحالة دي حصل له تنمر بسببها.
طيب إزاي بقى تقويم الأسنان بيقدر يحل المشاكل دي كلها؟
سر التقويم
اللي بيعمله تقويم الأسنان ببساطة هو الضغط على الأسنان أو شدها بمقدار معين، وتوجيهها لموضعها الصحيح داخل الفم، والتوجيه ده بيحصل بصورة بطيئة ومستمرة، علشان يسمح للأسنان إنها تتحرك داخل اللثة بمرونة، وبدون أي مشاكل.
طيب هو إزاي أصلا بيضغط أو بيشد الأسنان؟
التقويم بشكل مُبسط بيتكون من 3 أجزاء رئيسية، أول جزء هو الحمالات المعدنية.
ودي قطع معدنية صغيرة بيتم لصقها على الأسنان، وكل سِنة أو ضرس على حدى بيتم لصق عليهم واحدة من الحمالات المعدنية دي، والحمالات دي بقى بتكون في العادة مجوفة من جوا، وليها خطاف قابل للفتح والغلق، الجزء التاني بقى بعد كده بيكون (سلك معدني) مقاوم للصدأ، بيتم إدخاله في منتصف الحمالات المعدنية الملتصقة بالأسنان، وده علشان يربط كل الحمالات المعدنية ببعض، وبيتم شد السلك ده كل فترة بتكنيك معين علشان يقرب الأسنان من بعضها.
وأخيرًا الجزء اللي بعد كده بيكون الأربطة المطاطية، ودي القطع الملونة الجميلة اللي بنشوفها موجودة في تقويم الأسنان، والهدف من الأربطة المطاطية دي بجانب شكلها الجمالي، هو إنها تحكم الإغلاق على الحمالات المعدنية، بالإضافة لإن ليها دور مُهم في عملية الشد.
وعلشان الصورة تتضح أكتر، فخلينا ناخد مثال عملي :
صورة زي اللي قدامنا دي مثلا، الأسنان فيها مُنتظمة ماعدا سِنة واحدة بس موجودة في أعلى الفك، اللي بيعمله التقويم ببساطة هو إنه بيسحب السِنة دي لتحت، الطبيب من وقت للتاني بيشد السلك المعدني بتاع التقويم من الأطراف وبيقرَّط عليه، وبيكرر الموضوع ده في كل مرة بيزوره فيها المريض، العملية البسيطة دي مع الوقت بتخلي اللثة تبقى مرنة جدًا وتستجيب لقوة الشد اللي بتأثر عليها، وبالتالي السِنة تنزل لأسفل تدريجيًا وترجع لمكانها الطبيعي.
وعلشان كده كلمة السر في آلية عمل تقويم الأسنان بتكمن في تأثير الخطوات الصُغيرة خلال فترة زمنية طويلة، وده السبب في إن فترة تركيب التقويم بتكون من 6 شهور ولحد سنتين أو أكتر، كمان من العوامل المساعدة والمهمة جدًا في عملية إنتظام الأسنان، هي الأشرطة أو الأربطة المطاطية الملونة اللي اتكلمنا عنها من شوية، الأشرطة دي بجانب السلك المعدني، بتساهم في إنها تضم الأسنان على بعض،
يعني مثلا حالة زي الوضع اللي بيبقى فيه فرق أو فراغات بين الأسنان ، ف تركيب شريط من المطاط على الأسنان كلها في الحالة دي، بيخليهم مع الوقت يضموا على بعض وبيقضي على الفراغات تمامًا، ومش بس كده، الأشرطة المطاطية بالرغم من بساطتها إلا إنها بيكون ليها دور مهم جدًا في تناسق الفكين مع بعض، والعملية دي مابيقدرش السلك المعدني لوحده إنه يقوم بيها، طيب يعني إيه الكلام ده؟
في أشخاص كتير بيعانوا من بروز أحد الفكين، وعدم إنطباقهم على بعض، زي مثلا بروز الفك العلوي للأمام.
في الحالة دي بنبقى محتاجين حاجة تربط الفكين وتقربهم من بعض، وعلشان كده بيتم استخدام الأربطة المطاطية ولكن بتكنيك معين. بيبدأ الأطباء يجيبوا رباط مطاطي ويثبتوا طرف منه في ناب أحد الفكين، وليكن الفك العلوي مثلا .. والطرف الأخر بيتثبت في ضروس الفك السفلي، والعملية البسيطة دي بتخلي الفكين يقربوا من بعضهم مع الوقت، وينطبقوا تمامًا فوق بعض.
الأربطة المطاطية كمان بتكون مفيدة في حالة اسمها (العضة المفتوحة)، ودي الحالة اللي بيكون فيها الفكين فوق بعض، لكن في نفس الوقت الأسنان العلوية والسُفلية مابيبقوش منطبقين على بعض بشكل صحيح، وبيبقى في فراغات ما بينهم.
الحالة دي بقى بتبقى محتاجة قوة رأسية علشان تقرب الأسنان من بعض، وعلشان كده بيتم إحاطة الأسنان الأمامية للفكين العلوي والسفلي بإطار من المطاط، واللي مع مرور الوقت بيساهم في إن الفكين يقربوا جدًا من بعض، وبيقضي على المسافة اللي بينهم تماماً.
وطبعًا في ملاحظة مهمة جدًا وهي إن الأربطة اللي من النوع ده بيتم استخدامها في المنزل فقط أو أثناء النوم، لأنها بتقيد جدًا من حركة الفم، وعلشان كده الطبيب بيدي للمرضى كيس من الأربطة المطاطية وبيخليهم يركبوها لنفسهم.
من الجدير بالذكر إن كلامنا لحد دلوقتي كان مُقتصر على التقويم المعدني الثابت فقط، طيب هو في أنواع تانية؟
تقويم الأسنان الداخلي
تقويم الأسنان في منه أنواع وأشكال كتيرة جدًا على حسب كل حالة، لكنهم في النهاية بيعتمدوا على نفس فكرة العمل، زي تقويم الأسنان الداخلي، النوع ده من تقويم الأسنان بيتم فيه لصق الحمالات في الجهة الخلفية من الأسنان، وبعض الناس بتفضل استخدامه لأنه بيبقى مخفي تمامًا ومش باين للناس، وفي نفس الوقت بيقوم بدوره عادي جدًا زيه زي التقويم الأمامي الثابت.
التقويم الخزفي
النوع ده بيتميز بإن الحمالات بتاعته اللي بيتم لصقها على الأسنان بتكون مصنوعة من مادة خزفية لونها فاتح ، وأشبه بلون الأسنان، وبيكون خفيف في الوزن وبيساعد على تحريك الأسنان بشكل أسرع.
التقويم الشفاف
واللي بيبقى عِبارة عن قالب شفاف بيتم تصميه خصيصًا على شكل أسنان المريض، وبعد عدة أسابيع بيتم تبديل القالب بقالب تاني ولكن مع تغيير المسافات على حسب كل حالة.
التقويم المتحرك
بعد إنتهاء فترة التقويم الثابت وبعد ما الأسنان بترجع لمكانها الصحيح، بيكون في مرحلة ختامية أخيرة لابد منها! .. والمرحلة دي هي استخدام تقويم مُثبت أسنان، التقويم ده بيكون في العادة عِبارة عن قالب من البلاستيك واخد شكل الفم من الداخل، بالإضافة لأطراف معدنية، والهدف من استخدام التقويم المُتحرك هو إنه بيحافظ على الوضع اللي الأسنان وصلت ليه وبيمنع رجوعها لحالتها الأولى مرة تانية.
شائعات وإرشادات
في النهاية خلينا ننوه إن التقويم بجميع أنواعه، ما بيسببش أي ضرر للأسنان إطلاقا طالما بنعتني بالفم بشكل بسليم وبنتبع إرشادات الأطباء، وكذلك الأسنان بعد إنتهاء العلاج ما بتكونش عُرضة للتساقط ولا حاجة، وبرده المنطقة اللي أسفل تقويم الأسنان مش بتتعرض للعفن والتسوس، ده غير إنك بتقدر تغسل أسنانك بالفرشة والمعجون عادي جدًا وبتغسل التقويم نفسه كمان، أما بقى بخصوص التساؤل الخاص بالسن، وهل تقويم الأسنان منحصر على فئة محددة من الأشخاص ولا لأ؟
الإجابة ببساطة هي إن مفيش حد معين للعمر، الأشخاص ممكن يركبوا تقويم الأسنان في عُمر 15 و 20 و 30 و 40 سنة! على حسب حالة كل شخص، كل الفكرة إن الشخص كل ما كان صغير في السِن كل ما استجابته للتقويم كانت أسرع وأكثر كفاءة، لكن ده لا يمنع أي فئة عمرية من استخدامه عادي.