97% من نسبة المياه على كوكب الأرض مياه مالحة، ومن المتوقع في عام 2025 إن تلت سكان العالم يعانوا من نقص المياه بشكل مزمن، بالإضافة لأن الطلب العالمي على المياة العذبة بيتضاعف كل 20 سنة، طب ليه مانستغلش ال 97% بتوع المياه المالحة ونحولهم لمية عذبة؟ وهل لو كل مياه المحيطات اتحولت لمياه عذبة ف ده فعلا هيحل مشاكلنا المائية، ولا لأ؟
انقراض الكائنات البحرية
لو إفترضنا فعلاً إن كل المياة المالحة الموجودة في البحار والمحيطات إتحولت لمياه عذبة، الوضع هيكون من أخطر ما يكون،مبدئياً كده كل الكائنات البحرية هتموت تقريبًا، بداية من الكائنات الحية الدقيقة مرورًا بجميع النباتات المائية والأسماك والمخلوقات البحرية اللي مُتكيفة النهاردة مع المياه المالحة، واللي هيسبب موت الكائنات دي كُلها هو إنتفاخ كل خلاياها لحد ما توصل لمرحلة الإنفجار، جزيئات المياه بتنتقل من التركيز الأقل من الملح للتركيز الأعلى، وبما إن البحار والمحيطات هتبقى المياه فيها عذبة، فده هيخلي مياه البحر تفضل تدخل لأجسام الكائنات البحرية بشكل عنيف ومُستمر لحد ما أجسامهم تنفجر تمامًا، وبما إن البكتيريا المحللة اللى عايشة فى البحر هتكون هي كمان ماتت لما يتحول البحر لمياه عذبة، فالمخلوقات اللى هتموت دي مش هيحصلها تحلل، وبالتالي هيحصل إنهيار للسلسلة الغذائية وإنهيار للنظام البيئي العالمي، وده لأن المخلوقات البحرية ركن أساسي ضمن السلسلة الغذائية، وضمن عناصر التوازن البيئى، وده غير أن المخلوقات البحرية تمثل لوحدها حوالي 15% من كل المخلوقات المكتشفة.
والموضوع مابيقتصرش على موت الكائنات البحرية وإنقراضها وبس.
كوارث طبيعية ونقص في الأكسجين
المية المالحة بوجه عام تقيلة وكثافتها أعلى مُقارنة بالمياه العذبة، وده بدوره بيديها ثِقل مُعين بيخليها تضغط على قاع البحار والمُحيطات وتعمل شيء من التوازن، لكن لو إستبدلناها بمياه عذبة، فالإنخفاض الكبير في الضغط على قاع البحر، هيعمل سلسة غير متناهية من الزلازل والبراكين في كل مكان في العالم تقريباً، بالأضافة إنها هتتسبب في تغيرات مناخية شديدة، والجدير بالذكر إن الطحالب البحرية مسؤولة عن إنتاج نصف الأكسجين على كوكب الأرض، وبما إن حصل إنقراض للكائنات البحرية، فنصف كمية الأكسجين اللي بتُنتج هتختفي، وطبعًا نسبة ثاني أكسيد الكربون هتزيد، وبالتالي إحنا والنباتات والحيوانات البرية هنبقى مُعرضين للهلاك.