خلال الشهور الاولى من سنة 1942، بدأ الشعب الالمانى يفقد الامل فى الانتصار الحاسم اللى وعده بيه الجيش النازى، وكمحاولة من الدعايا النازية انها تبث الأمل من جديد، أعلنت ان المصانع بصدد انتاج تشكيلة من الاسلحة الجديدة لمفاجأة العدو وتغيير مجرى الحرب، وبالفعل انتجت المصانع الألمانية عدة قطع سلاح مؤثرة أبرزها الدبابة الشهيرة تايجر 1، لكن برضه حاولت المصانع الالمانية تبنّي كل الأفكار مهما بدت غريبة عشان رفع الحالة المعنوية.
فعلى سبيل المثال تم ابتكار سلاح ماسورته منحنية، بحيث انها توفر للجندى المتحصن خلف الجدار او فى الدبابات انه يطلق النيران من أوضاع آمنة من خلال الاعتماد على بيروسكوب، وأمكن تنفيذ قطع محدودة من التقنية دي واللى كانت مازالت فى طور التطوير قبل ما يتم القضاء نهائياً على الجيش النازى واحتلال برلين.
ورغم سقوط ألمانيا، إلا ان فكرة الأسلحة الغريبة المبتكرة نفسها كانت موجودة سواء قبل التفكير الألمانى او حتى من بعده.
مدفع Redneck Obliterator
يعتبر مدفع جاتلين اللى تم تصميمه على ايد المخترع الامريكى ريتشارد جاتلين سنة 1861، هو أول مدفع رشاش يظهر للنور فى التاريخ.
وتم استخدام المدفع ده على نطاق واسع خلال الحرب الاهلية الأمريكية والحرب الأمريكية الأسبانية، والمدفع عبارة عن قاعدة عريضة مقسمة لعدة مواسير بغرض توزيع تأثير الطلقات النارية، وبنفس الفكرة تمخض ذهن واحدة من الورش الفنية المجهولة فى الاتحاد السوفيتى، وقدرت انها تصمم مدفع شبيه مكون من 6 بنادق نص آلية من طراز SKS السوفيتية، وبالرغم ان البائع الأول غير معلوم إلا ان الفكرة لاقت قبول في الورش المنتشرة في الولايات المتحدة الأمريكية، وبدأ صنع بعض النماذج اللى قدرت تقنن اوضاعها وترخص الابتكار وتخليه قابل للاستخدام بصورة شرعية، وهو السلاح اللي أتعرف فيما بعد باسم Redneck Obliterator، واللي أستخدامه مقصور على حديقة المنزل فقط على سبيل الحراسة، ولا يجوز التنقل بيه فى الشوارع.
وتقدر تعتبر السلاح أشبه بكلب حراسة مميت الغرض منه تحذير المتطفلين، وإن كان برضه تم وقف تصاريح السلاح ده من سنة 1986، وعشان كده بتعتبر النسخ الباقية منه عبارة عن قطع أثرية غالية الثمن بيتم عرضها للبيع فى المزادات، وغالبا ما بيتم فتح المزاد من 3 او اربع الاف دولار، وبتستمر المزايدات لغاية ما بتوصل لأرقام تقدر بمئات الآلاف لهواة القطع النادرة، ومدفع Redneck Obliterator ده بيحتوى على ذراع تدوير بتقوم بتفريغ كل بندقية من الستة فى تتابع سريع بيحاكى بشكل كبير المدفع الرشاش، وبيقدر المدفع ده انه يطلق فى حدود ال 40 طلقة فى الدقيقة الواحدة.
مسدس قبلة الموت
بيعتبر متحف التجسس الدولي KGB، هو واحد من أكتر المغامرات والزيارات اللى بيحب كتير من الناس انه يعملها بهدف اكتشاف عقليات المخابرات وتفكيرهم، خصوصا فى فترة الحرب الباردة.
وبيشتمل المتحف على مجموعة من الادوات والمعدات السرية فى العالم، فمثلا بيشتمل المتحف على رسائل وتقارير مدرسية لتشى جيفارا وفيدل كاسترو وغيرهم من القادة الموالين للسوفيت خلال الحرب الباردة، أما المخابرات السوفيتية KGB نفسها بتعتبر مجموعتها هى الأكثر غرابة وجنون، فمن ضمن المجموعة السوفيتية تم عرض بعض النماذج من مسدسات قبلة الموت، ومسدس قبلة الموت ده عبارة عن قطعة من أحمر الشفاه الخاص بالنساء، لكنه فى حقيقة الامر سلاح فعال وقادر على قتل إنسان عن طريق تزويده بإبرة رمى، قادرة على تصويب رصاصة من عيار 4.5 ملم.
وبيعتبر سلاح قبلة الموت سلاح غير قانونى فى الولايات المتحدة الأمريكية ولا يجوز حيازته، وإن كان بيتم عرض بعض القطع منه منزوعة إبرة النار فى بعض المزادات، ووصلت آخر قطعة تم بيعها من مسدس قبلة الموت لسعر 12 الف دولار أمريكى.
مسدس قدم البطة
مسدس قدم البطة هو نسخة مقلدة ومطورة من مسدس فلينتوك الشهير Flintlock، ومسدس فلينتوك ده كان من أول المسدسات اللى ظهرت فى التاريخ إن لم يكن أولها على الإطلاق، واشتهر المسدس باشتماله على 3 او 4 فوهات بتخلى المسدس شبيه بقدم البطة، أما النسخ المقلدة الحديثة فتم تطويرها عشان تشتمل على عدد من الفوهات بيوصل عددها لـ 8 فوهات فى بعض النماذج.
والمسدس عبارة عن سلاح كلاسيكى صغير، عنده القدرة على قتل عدد من المهاجمين فى نفس اللحظة، والمسدس ده بريطانى الأصل لكنه انتشر فى الولايات المتحدة الامريكية خاصةً خلال الحرب الاهلية، ومسدسات قدم البطة الاصلية الاصلية على الرغم من عيوبها المتمثلة فى قوة الارتداد وبطئ إعادة التحميل، إلا انها نادرة جدا ومرتفعة الثمن وبتعتبر برضه من التحف الأثرية اللى بتباع فى المزادات.
ومن أهم نسخ قدم البطة ده هو المسدس الخاص بسيمون بوليفار Simón Bolívar مناضل أمريكا اللاتينية الشهير، واللى تم بيعه فى مزاد سنة 2004 بمبلغ 1.76 مليون دولار.
بندقية بانت Punt Gun
البندقية الضخمة دى والمعروفة ببندقية بانت، مكانش واحد لوحده بيقدر يشيلها، ولو حتى تواجد شخص بالقوى الكافية اللى تسمحله يشيل الوزن ده كله، فبالتأكيد مكانش هيستحمل قوة رد الفعل، وعشان كده كان فى الغالب بيتم تثبيتها على قوارب خاصة بتتميز بالقاع المسطح، واللى بتكون مصممة للمناورة فى المستنقعات الضحلة، أما سبب تصميم البندقية دى فهو سبب صادم الى حد كبير.
فالبندقية تم تصميمها لصيد الطيور المائية وخاصة البط، وانتشرت عادة صيد الطيور المائية خلال القرن الـ 19 بعد ارتفاع الطلب على لحوم الطير فى الاسواق، بالإضافة لتلبية أحتياجات سوق الموضة النسائي، اللى كانت افضل أزياؤهم بتتميز بالقبعات المرصعة بريش الطيور النادرة.
وبندقية بانت بتقدر تطلق كرات حديدية متفرقة، بوزن يصل إلى نص كجم تقريبا فى الطلقة الواحدة، وهى الطريقة اللى بتخلى معدل انتشار الطلقات كبير جداً وبيأدى لسقوط أعداد كبيرة من الطيور، وكانت البندقية ناجحة جداً فى الصيد لدرجة إنها ساهمت بشكل كبير فى استنفاد أعداد الطيور فى البرية، وهو الامر اللى ادى لحظرها فى نهاية المطاف، وصدرت القوانين اللى بتحظر ممارسة الصيد أو حتى تجارة الريش بحلول سنة 1920.
مسدس Remington الكبير
مسدس Remington الكبير هو المسدس الحائز من موسوعة جينز على لقب أكبر مسدس على الإطلاق، وبيبلغ طول المسدس متر كامل و26 سم، أما وزنه فبيوصل ل 45 كجم، والمسدس ده تم تصميمه فى 4 مارس سنة 2013 على ايد البولندى ريتشارد توبيش Ryszard Tobys، واللى أستغرق إعداد المسدس معاه سنتين كاملتين.
والمسدس العملاق ده ماهو إلا نسخة مكبرة من المسدس الامريكى Remington 1858، وهو من أوائل المسدسات اللى تم ابتكارها خلال الحرب الأهلية الأمريكية، وكانت المسدسات من نوع Remington صاحبة سمعة طيبة ومبيعات عالية، واشتهرت بإنها المنافس الوحيد لمسدسات كولت الشهيرة، وإن كانت مسدسات كولت بتتفوق عليها فى دقة إصابة الأهداف، إلا إن مسدسات Remington اشتهرت بأنها أكثر متانة وأقوى فى الآداء، بالاضافة إلى انها كانت الموديلات الأولى اللى اشتملت على دبوس أمان للحماية، والمسدس العملاق ده بيقدر يوفر طاقة حركية بتوصل بسرعة الطلقة لحوالى 400 م/ث، وبيحتوى المسدس على ساقية دوارة بتشيل 6 طلقات، ووصل وزن الطلقة العملاقة لـ 136 جرام كاملين.
مسدس كوليبراى Kolibri
يعتبر مسدس Kolibri هو الأصغر فى العالم بالنسبة لفئة Pistol، والمسدس ده تم تصميمه فى امبراطورية النسما والمجر سنة 1914، وكان الهدف منه هو إبعاد الكلاب الضالة اللى كانت منتشرة فى الشوارع، والمسدس ده على صغر حجمه وحجم رصاصته اللى مش بتتجاوز ال 2 ملم وسرعتها اللى لا تتجاوز ال 150 م/ث، إلا انه فى النهاية مش مسدس لعبة، يعنى ممكن إصابته تكون قاتلة خاصة لو أصابت انسجة الجسم الرخوة.
ومصمم المسدس ده هو صانع الساعات المعروف فرانز بفانل Franz Pfannl، والمسدس نصف أوتوماتيكى ومصرح بإمتلاكه بصورة عادية بعد إصدار التصاريح المطلوبة، لكن ده فى حالة ان الشخص اللى عايز يشتريه يلاقى منه قطعة فى الاسواق أو المزادات، فكل النسخ اللى تم تصنيعها من المسدس Kolibri لا تتعدى الألف نسخة.
وجدير بالذكر ان المسدس ده هو الأصغر في فئة الـ Pistol، وإلا فـ فيه نوع تاني من المسدسات وهو الـ Revolver وأصغر واحد في المسدسات دِه هو الـ SwissMiniGun، وبعكس ندرة مسدس الـ Kolibri، فمسدس SwissMiniGun متوفر وبيوازى سعره حوالى 6000 دولار أمريكى، بل صدرت منه نسخ ذهبية مش بتقل عن 50 ألف دولار.
جلوك 17 بالخزنة المئوية glock 17
الجلوك 17 هو واحد من أكثر المسدسات شعبية فى العالم، والمسدس تم تطويره للاستخدام فى الجيش النمساوى سنة 1985، لكنه حقق نجاح وانتشر بعدها فى اكتر من 40 دولة على مستوى العالم، فالمسدس سلس ودقيق ووزنه وهو مكتمل الذخيرة مش بيزيد عن 900 جم.
ومسدسات الجلوك ليها موديلات كتيرة، لكن أشهرهم وأعلاهم مبيعاً هو الجلوك 17، ومن افضل مميزات الطراز ده هو بساطة التصميم و وفرة قطع الغيار وتعدد الخزائن بتاعته، فالمُصنعين قدروا أنهم يصمموا خزنة من 100 طلقة كاملين، وبيتم اخراج الطلقات بسرعة 20 طلقة فى الثانية، عشان يقدر ينافس بيهم سرعة أقوى المدافع الرشاشة.