وأنت قاعد في البيت هتلاقي نفسك بشكل تلقائي بتدخل المطبخ، وبعدين تفتح التلاجة وتبص فيها، وبعدين تكتشف إن التلاجة فاضية ومافيهاش أي حاجة مغرية بالنسبالك، فتقفل باب التلاجة وترجع أوضتك تاني.
بعد شوية هتلاقي نفسك مرة تانية بتكرر نفس السيناريو ده بالظبط!بتدخل المطبخ وتفتح التلاجة وتبص فيها، وبعدين تقفلها وتمشي، وياريت القصة بتخلص لحد كده، أبدًا، تلاقيك بعدها بشوية بتعمل نفس الموقف تاني!
قوة العادة
فيه مجموعة من الدراسات بتقول إن في أسباب نفسية كتيرة بتخلينا نعمل كده، وأحد الأسباب دي هي قوة العادة!
إحنا متعودين إننا لما بنجوع بنروح للمكان اللي بنخزن فيه الأكل اللي هو في السيناريو اللي معانا؛ التلاجة ونبص فيها، وبالفعل أول مابنلاقي أكل شهي جواها، فده بيكون بمثابة مكافئة كبيرة بالنسبة لعقلنا، وطبعًا مكافأت العقل يعني إفراز لكمية من الدوبامين، وعلشان كده اللي بيحصل في الحالة اللي التلاجة بتكون فيها فاضية وإحنا عارفين ده، هو إننا بمجرد مابنحس بالجوع بيبدأ عقلنا يركز على المكافأة بشكل لا واعي، وبـآلية تشبه نوعًا ما بالإدمان، وبينسى أي معلومات منطقية تانية، وده بيخلينا نروح على التلاجة مباشرة من غير ما نفكر.
نفسك في ايه؟ والشك
من الأسباب النفسية كمان إن الشخص بيبقى عنده هاجس مستمر بإنه مادورش كويس في التلاجة، فبيرجع مرة تانية لعل وعسى إنه يلاقي حاجة مكنش واخد باله منها قبل كده، كمان من الأسباب الإضافية هو تغير شهية الشخص تجاه الطعام اللي بيدور عليه من وقت للتاني، بمعنى إن الشخص مثلا ممكن في أول مرة كان عاوز ياكل شيء مالح، فراح فتح التلاجة ومالقاش فيها حاجة، وبعدين رجع أوضته تاني، بعدها بشوية ممكن يجي في ذهنه إنه محتاج ياكل حلويات أو حاجة مسكرة، ووقتها بسبب العادة يروح يفتح التلاجة يدور على غيرها.
لكنه عادةً مش بيلاقي حاجة برده.