أفخم خطوط الطيران في العالم

زمان السفر بين الدول أو حتى بلدان الدولة الواحدة كان صعب جدا وبياخد أيام ويمكن شهور، لكن مع الوقت وطموح الإنسان اللي ملهوش حدود قدرنا نطير من مكان لمكان ونوصل في أسرع وقت ممكن، ومع ذلك الموضوع موقفش لحد هنا، لأ دا عدى بالبشرية فكرة الطيران من كونها وسيلة مواصلات وسفر، لوسيلة مواصلات مرفهة ومليانة بالفخامة وأقصى سبل الراحة الممكنة.

الخطوط الجوية البريطانية British Airways

تأسست الخطوط الجوية البريطانية (British Airways) ، في عام 1974م، وبفضل اللي بتقدمه لركابها من وسائل وسبل الراحة، نجحت في اكتساب الشهرة والسمعة الطيبة لحد ما بقت واحدة من أفخم خطوط الطيران في العالم.
بتبدأ الرفاهية والمتعة من قبل ما تطلع للطيارة لما بتقعد في صالة ركاب الدرجة الأولى تتناول وجبة لذيذة من أجود أنواع الطعام وأنت رايق كدا، ويا سلام لو روحت بدري وفيه شوية وقت فاضيين، ساعتها هتستمتع قبل الرحلة بخدمة (السبا Spa) اللي بتقدمهالك الشركة للركاب المهمين، ولما تطلع الطيارة بقى هتندهش من الديكور الأنيق للغاية اللي هتلاقيه موجود جواها، ولو حبيت تنام فهتلاقي سرير مفرود بمرتبة فاخرة، ولو نسيت تجيب بيجامة للنوم فمتقلقش خالص عشان الشركة هتقدمهالك مجاناً وطبعاً مش أي بيجامة، دا غير بقى منتجات التجميل والعناية بالبشرة وفرشاة الأسنان وغيرهم من المسلتزمات الشخصية من أفضل الماركات.

وطبعًا لأننا منقدرش نعيش من غير أجهزة الكمبيوتر المحمولة أو الهواتف النقالة، فالخطوط الجوية البريطانية كانت حريصة على توفير منافذ طاقة لشحن الأجهزة دي، فتقدر مهما كان طول الرحلة بتاعتك إنك تستخدم الأجهزة بتاعتك كلها بدون أي مشاكل، ده غير خدمة الواي فاي المتاح طول الرحلة بشكل مجاني.
أما بقى الشبابيك فدي الشبابيك اللي تستاهل نتخانق عليها فعلاً، خصوصا لما نعرف أنها ممتعة بسبب حجمها الكبير واللي بيتيح لك رؤية مساحة أكبر من الأفق والاستمتاع بالسماء في كل مراحل الرحلة، ولو حسيت بشوية ملل فممكن وقتها تروح بقى على شاشة التلفزيون وتتفرج على فيلم أو مسلسل من المكتبة المرئية الضخمة اللي بتقدمها الشركة واللي فيها معظم الإصدارات الجديدة من الأفلام والمسلسلات وغيرهم.

الاتحاد للطيران Etihad Airways

الاتحاد للطيران هي ثاني أكبر ناقل جوي في الإمارات، وبتتميز بالفخامة والرقي خصوصًا في الدرجة الأولى واللي بتسميها الدرجة الماسية.
في الدرجة الماسية هتلاقي جناح من 3 غرف بيسمى بــ The Residence ومعروف بأنه الأول من نوعه بين باقي خطوط الطيران، بيتميز بوجود غرفة للمعيشة مع ميني بار شخصي ومقاعد جلدية فخمة من تصميم خبراء شركة فيراري، دا غير مكان منفصل للنوم، وهي غرفة مزدوجة السراير فيها تلفزيون 27 بوصة؛ للاستمتاع بمشاهدته وأنت مسترخي أو وقت ما تكون بتحاول تنام، كمان فيه غرفة دش داخلية عشان تستمتع بحمام سخن أو حتى بارد وقت ما تحب وزي ما أنت عايز.

ده غير أن من ضمن المزايا اللي بتقدمها الرحلة أن فيه سواق خاص هيوصلك من وإلى المطار من المطار للمكان اللي أنت عايزة.
وبتتميز كلاً من درجة الأعمال والدرجة الأولى بوجود مكان أو مساحة مشتركة بينهم بتسمى باللوبي أو اللاونج أو الصالة، واللي فيها أريكة جلدية نصف دائرية وطاولة من الخشب المُطَعَّم اللي ممكن تستخدمهم وأنت بتستمتع بمشاهدة التلفزيون وفي إيدك مشروب لذيذ من البار اللي جنبك.

كاثي باسيفيك cathay pacific airways

تعتبر “كاثي باسيفيك Cathay Pacific” هي شركة الطيران الوطنية في هونغ كونغ بالصين، واللي تعتبر واحدة من أفخم خطوط الطيران في العالم، ويمكن دا عشان كاثي باسيفيك بتحاول على قد ما تقدر تدلع ركاب الدرجة الأولى حتى ولو عن طريق كرسي التدليك اللي مخصصاه للركاب المتميزين؛ بالإضافة أن المضيفات هناك متدربين كويس أوي وبيرحبوا بكل راكب من ركاب الدرجة الأولى بالإسم.
دا غير عدد من المميزات والخدمات الفخمة اللي بتوفره لركاب الدرجة الأولى واللي بتبدأ بالمدخل السري اللي بياخدك لمقصورة مكونة من 6 كبائن عشان تستمتع بمساحة خاصة وخدمات شخصية ملهاش حدود، واللي هنقول بعضها هنا، زي الكرسي الرائع واللي بيتحول بمنتهى الهدوء والإنسيابية لسرير مفرود بمرتبة سميكة مناسبة لنوم مريح وسط أزهار الأوركيد اللي بتزين جدران المكان من حواليك عشان توحي ليك بالطبيعة الخلابة المستوحاة منها الزهور، ولو جيه وقت الشغل فتقدر تفرد المقعد تاني وتستفيد بوظيفته التالتة وهي أنه يتحول لمكان شغل عشان تعرف تكمل شغلك.

وبالنسبة للأكل بقى فحدث ولا حرج لأنك عمرك ما هتحس بملل أو بالضيق منه خصوصًا لما تعرف أن المينو عبارة عن عدد كبير جدًا من الأكلات الآسيوية من هونج كونج والصين وغيرها من الأكلات العالمية اللذيذة اللي أعدها مجموعة من الطهاة المتخصصين في وجبات خطوط الطيران واللي برضوا بيشتغلوا في الأساس في مجموعة من أشهر المطاعم العالمية، وممكن تعمل كل دا وأنت بتستمتع بمشاهدة فيلم رائع على شاشة التلفزيون هتكون متاحة قدامك على متن الطائرة واللي هتبقى بتستخدم معاها سماعة عازلة للصوت عشان تنعم بالهدوء وتعيش عالم لوحدك، دا يعني لو حابب.

الخطوط الجوية القطرية Qatar airways

أما شركة الخطوط الجوية القطرية فهي واحدة من أفخم خطوط الطيران في العالم، وهي الشركة الوطنية والمملوكة لدولة قطر، وبتفتحر الشركة بديكوراتها الفخمة والترحاب العالي من قِبَل طاقم الضيافة واللي فاز بعدد من أرفع الجوائز بسبب اهتمامه بكل احتياجات الركاب وتفاصيلهم.
وكمان بتقدم الخطوط الجوية القطرية مستلزمات شخصية متميزة من إنتاج شركة Bric، دا غير ملابس النوم اللي مصنوعة من أجود أنواع الأقطان اللي بتقدمهم للركاب مجانًا.

بالإضافة لشركة ماركة (جورجيو أرماني giorgio armani)، اللي بتتعامل معاها الخطوط الجوية القطرية في توفير العطور وغسول الجسم أو اللوشن لركاب الدرجة الأولى.
وبتهتم الخطوط الجوية القطرية بركابها من كبار الزوار وحاجزي الدرجة الأولى من لحظة إنهاء إجراءات السفر لحد ما توصل بأمان لوجهتك خصوصا أنها بتبعتلك مرافق يساعدك في الوصول لصالة كبار الشخصيات بكل سهولة وكأنه سلاح بتتخطى بيه باقي الركاب وتعدي بوابة الأمن بكل أريحية وبدون مشاكل.
ده غير أنك لك سرير خاص بيك عليه بعض أفخم أنواع، ومتنساش قبل ما تنام تحط أجهزتك تشحن عشان لما تصحى تستمتع بخدمة الواي فاي براحتك.

لوفتهانزا Lufthansa

أما لوفتهانزا أو زي ما بتعرف برضوا باسم الخطوط الجوية الألمانية، فهي أكبر شركة طيران ألماني ومن أفخم شركات الطيران في العالم، بتبدأ فخامة لوفتهانزا من لحظة وصولك المطار لما بتبعتلك مساعد شخصي عشان يساعدك تخلص كل إجراءات السفر وروتينه الممل بمنتهى السرية والسهولة، وكمان يكون معاك عشان توصل الانتظار الخاصة بركاب الدرجة الأولى.
ولما تطلع على الطيارة تقدر تستمتع بالمحتوى الترفيهي اللي بتقدمه الشركة لما تختار فيلم من 150 فيلم أو برنامج من أكتر من 200 برنامج تلفزيوني، واللي طبعًا مترجمين بأكتر اللغات.

أما الأدوات الشخصية ووسائل الراحة هتاخد مجموعة متكاملة ومتميزة تستخدمها على متن الطائرة، منها مثلًا زوج من البيجامات المصنوعة من القطن وأدوات النظافة للاستخدام الشخصي واللي أكيد هتحتاج تستخدمهم بعد دش منعش في حمام الدرجة الأولى.
وبالنسبة للأكل فأكيد هيكون رائع خصوصًا لما تعرف أن اللي بيعده مجموعة من أمهر الطهاه حول العالم، ودا هيبان لما تجرب الأكل بنفسك.

طيران الإمارات Emirates Airlines

برضو واحد من أفخم الخطوط العربية والعالمية هي خطوط طيران الإمارات، واللي دخلوا في شراكة مع مرسيدي بينز، وقرروا الاشتراك في تصميم كبائن الدرجة الأولى بشكل مستوحى من التصميم الداخلي لفئة الـ S من سيارات مرسيدس بينز، وفي نفس الوقت، اللي بيحجز في الدرجة الأولى بيقدر يستخدم عربية بسواق من سيارات مرسيدس من نفس الفئة من وإلى المطار.
وأول طرق الراحة دي لما تلبس واحدة من البيجامتين اللي بيتقدمولك كهدية والمصنوعين من تقنيات حديثة بتحافظ على رطوبة جسمك وإحساسك بالراحة وأنت لابسهم، ومعاهم شبشب وغطاء للعين وشنطة مليانة أدوات ومسلتزمات للراحة وتسهيل الدنيا عليك طول ما أنت فوق.

ولو فكرت تاخد دش فدا شئ مفيش أسهل منه ومعمول حسابه، فمثلاً السطح العلوي من طيارة إيرباص هيساعدك أنك تاخد دش تجدد فيه نشاطك.
ولو النوم كبس عليك وأنت قاعد على كرسيك الفخم فممكن تحوله لسرير عشان تسترخي عليه وتستمتع بمشاهدة التليفزيون، وكل دا وأنت في إيدك مشروب حلو كدا من الميني بار الشخصي اللي جنبك.
وبالنسبة للأكل فدا كمان مفيش أفخم منه في الطيران الإماراتي خصوصًا وأنها بتسعى دايمًا في تقديم أفضل الأنواع على أفخم أدوات المائدة من ماركة “روبرت ولش Robert Welch” البريطانية المعروفة بتصنيع أفخم أدوات المائدة باهظة الثمن وعالية الجودة.
وتقدر تتحكم في درجة حرارة الجناح والإضاءة وغيره من خلال لمسة بسيطة جدًا للوحة التحكم اللي جنبك، ولو هاتفك المحمول أو حاسبوك الشخصي فصلوا شحن ومحتاج تستخدمهم فمتقلقش هتلاقي حواليك فيش ومنافذ طاقة لشحنهم بمنتهى السهولة.

خطوط طيران سنغافورة Singapore Airlines

أما الخطوط الأشهر والأكثر فخامة في العالم فهتكون من نصيب شركة الطيران الوطنية في سنغافورة وهي خطوط (طيران سنغافورة Singapore Airlines)، واللي أتصممت بدرجة عالية من الدقة والاتقان والفخامة من قِبَل المصمم الفرنسي (جان جاك كوست jean-jacques coste) مصمم اليخوت الفاخرة.
وبيتميز الجناح على متن طائرات خطوط طيران سنغافورة بميزة كانت الأولى من نوعها وقتها وهي ميزة الأسرة المزدوجة عشان تكون مناسبة ليك ولشريكك، دا غير أريكة مصنوعة من الجلد الفاخر عشان تستمتع بمشاهدة التلفزيون وأنت مسترخي.
وفيه مميزات تانية بتقدمها الخطوط زي منتجات العناية بالبشرة والبطاطين الفخمة والمخدات المريحة والبيجامات المتميزة واللي بتنتجهم ماركة “جيفنشي Givenchy” الفاخرة واللي أسعارها في متناول فئة معينة من البشر.