أخطر العناصر الكيميائية على الإطلاق

عام 1939 في مخبأ سري بألمانيا، أشرفت مجموعة من العلماء النازيين على إنتاج مادة كيميائية حديثة الإكتشاف، أطلقوا عليها إسم “المادة N”.
المادة دِه بتغلي لو تعرضت للهواء وبتنفجر لو لامست الماء وبتقتل أي حد يتنفس بخارها.
ولو تحللت، بتطلق حمض الهيدروفلوريك القاتل.
ولو اتحطت في سلاح زي قاذفة اللهب، فالنار اللي هتطلع من السلاح ممكن تحرق بدرجة حرارة تتخطى الـ 2400 درجة مئوية، وكان الهدف من إنتاج المادة دي هو تسليح الجنود الألمان بمادة تحرق أعدائهم داخل المخابئ، وبالرغم من سمعة النازية وسمعتهم باختراق أي حدود في سبيل تحقيق أهدافهم، فلك أن تتخيل إن بعد دراستهم المادة دِه بمدة، قرروا وقف انتاجها والاختبارات عليها بسبب “مدى خطورتها”، والمادة N مش هي المادة الكيميائية الوحيدة اللي بتتمتع بالصفات المخيفة والجنونية دِه.

1.ثلاثي فلوريد الكلور Chlorine trifluoride

تعالوا نبدأ بالمادة اللي اشتغل عليها الألمان في اواخر التلاتينات، واللي بعد ما كانوا مخططين لإنتاج 90 طن منها بصورة شهرية، ما عملوش غير 30 طن بس على مدار فترة الحرب بأكملها.
المادة اللي أطلقوا عليها اسم “المادة N” هي المركب الكيميائي “ثلاثي فلوريد الكلور”، وهو أقوى مركب كيميائي بيضيف فلور للمركبات التانية، وده بيخليه من المركبات الكيميائية سهلة التفاعل بالإضافة إنه واحد من المؤكسدات القوية جدًا، لدرجة أنه أقوى من الأكسجين في عملية الأكسدة، وده بيخليه قادر على حرق أشياء مش ممكن تتخيلها أبدًا.
المركب ده بيقدر إنه يحرق الطوب والزجاج والرمل والخرسانة، وحتى الأشياء اللي اتحرقت بالفعل زي الفحم والرماد، بل إن المواد المعروف عنها إنها آمنة تمامًا ضد الاشتعال ومستحيل تمسك فيها النار، مالهاش أي قيمة في وجود ثلاثي فلوريد الكلور، و”الأسبستوس Asbestos” والمعروف عنه إنه مضاد للنار وبيتم استخدامه أساسًا في صناعة الأشياء المضادة للحريق، ما بيقدرش يقاوم المركب ده وبيشتعل بسببه.

2. أزيدوأزيد أزيد azidoazide azide

يعتبر الأزيدوأزيد أزيد هو أخطر المواد الكيميائية المتفجرة في العالم، وتقدر تقول عليه إنه بيتلكك عشان ينفجر، ومالوش تحذيرات معينة تقدر تاخد بالك منها عشان تتجنب انفجاره، لو حركته بينفجر، لو لمسته بينفجر، لو عرضته للضوء بينفجر، لو عرضته للأشعة السينية x rays بينفجر، وحتى لو ماعملتش أي حاجة من اللي فاتت وما هوبتش نحيته أصلاً، برده ممكن ينفجر لوحده.
وفي مرة أثناء فحصه من قبل المتخصصين بمطياف الأشعة تحت الحمراء انفجر برده، وفي أحد التجارب، تم وضع المركب في عبوة مضادة للإنفجارات داخل غرفة خالية من أي ضوء ومُتحكم في أجوائها وحرارتها، والنتيجة، إنه انفجر برده.
المركب المضطرب ده بيقع في فئة من المواد الكيميائية معروفة بإسم “المواد النشطة الغنية بالنيتروجين high-nitrogen energetic materials”، والفئة ده بتحتوي على كم ضخم من الطاقة الكيميائية المخزنة داخلها، والسبب في انفجارها بالشكل ده هو إن ولا ذرة من ذرات النيتروجين الـ 14 في الجُزئ الخاص بيها، مرتبطة مع نظيراتها بالشكل المزدوج اللي يخلي الجزئ مستقر؛ فــ ذرة النيتروجين المرتبطة بذرة نيتروجين تانية بتشكل واحدة من أكتر الجزيئات استقرارًا على وجه الأرض، إلكتروناتهم بتشكل رابطة ثلاثية قوية جدًا لدرجة إن مافيش حاجة طبيعية ممكن تكسرهم إلا صاقعة برق، والطريقة اللي عليها تكوين الجزئ في المركب ده بيخلي مافيش ولا ذرة منهم في رابطة ثلاثية، وبدون الرابطة فالذرات بتبقى مقيدة في حالة عالية من الطاقة وعايزين يتنقلوا لحالة أكتر استقرارًا، ومعاها بتخرج الطاقة المكبوتة داخل الذرات، وده بيخليها شديدة الحساسية وبتنفجر مع تعرضها لأبسط التدخلات، وأحيانًا، بدون تدخل من أساسه.

3. البتراكوتوكسين Batrachotoxin

مركب البتراكوتوكسين والمعروف اختصارًا بإسم BTX، هو أحد أخطر المواد الكيميائية السامة على الإطلاق، ولك أن تتخيل جرعة من 136 ميكروجرام منه كافية لقتل إنسان بالغ، وعشان تستوعب معايا الكمية دِه أد إيه بالضبط، فهي أقرب لــحبتين ملح.
المركب ده موجود بشكل طبيعي في أنواع معينة من الخنافس والضفادع والطيور، أشهرها على الإطلاق الضفدع الذهبي السام، الضفدع ده وبالرغم إن وزنه أقل من 30 جرام وطوله بيعمل 5 سم، إلا أنه بيحتوي على ما يقدر بـ 1100 ميكروجرام من السم ده، وهي الكمية الكافية لقتل 10 رجال بالغين.
والطريقة اللي بيشتغل بيها السم ده هو إنه بيمنع الخلايا العصبية من التواصل مع العضلات، ومن هنا بيصاب بالشلل التام قبل ما يفقد القدرة على التنفس وغالبًا ما بينتهي بيه الأمر بسكتة قلبية.

4. ستريكنين strychnine

الستريكنين هو من القلويات اللي بتاخد شكل مسحوق بلوري عديم الراحة، شاع استخدامه كمبيد حشري لقتل القوارض والطيور، لكنه في منتهى الخطورة على الإنسان.
في حالة استنشاقه أو بلعه أو حتى التعرض ليه وامتصاصه عن طريق العين، بيحصل للمصاب حالات تشنج رهيبة في العضلات وراها نوبة مرضية وإغماء وفشل في الجهاز التنفسي، وفي النهاية بتحصل سكتة دماغية خلال فترة تتراوح من 15 لـ 30 دقيقة.
مصدر المركب ده هو نوع من النباتات في الهند وشمال أستراليا معروفة بإسم “جوز القيء”،
والعجيب إنه بيدخل في تركيبة بعض سموم الفئران المنتشرة في معظم أنحاء العالم، والأخطر إن مافيش أي علاج ليه لحد النهاردة.

5.بوتوكس Botox

من الممكن تستغرب لما تعرف إن المادة المستخدمة في عمليات التجميل لشد الوجه وتقليل التجاعيد وغيرها، هي واحدة من أخطر المواد السامة في العالم كله.
“البوتيولينيوم السام Botulinum toxin” هو أحد المواد الكيميائية الشائع استخدامها في عمليات التجميل، وبيتم انتاجها من بكتيريا معروفة بإسم “كلوستريديوم بوتولينيوم Clostridium botulinum”،
300 مايكرو جرام من المادة دِه كافية لقتل بني آدم بالغ، يعني بتتكلم تقريبًا في 4 حبات ملح.
وبعض المصادر ذكرت أن 50 جرام من المادة دِه كافية لقتل كل الناس اللي على كوكب الأرض، وخطورة المادة ده على الإنسان بتتمثل في مهاجمتها للجهاز العصبي ومنع الاتصال بين الأعصاب والعضلات، والقصة ده بتأدي لحدوث شلل للمصاب وفشل الجهاز التنفسي في فترة وجيزة.
ومركز مكافحة الأمراض بالولايات المتحدة الأمريكي بيصنف “البوتيولينيوم Botulinum” باعتبار أحد أخطر 6 تهديدات بيواجهها العالم عن طريق الإرهاب البيولوجي.

6.ثنائي ميثيل الكادميوم Dimethylcadmium

ثنائي ميثيل الكادميوم هو مركب عضوي معدني، يعني بيحتوي على جُزئ ارتبط فيه الكربون بمعدن، وفي الحالة اللي معانا دلوقت فالمعدن هو الكادميوم، وهو في حد ذاته من المعادن الخطيرة، بتتمثل حطورة ثنائي ميثيل الكادميوم إنه بمثابة أحد أكتر المواد الكيميائية السامة على مستوى العالم، والمركب ده ليه تأثيرات حادة ومزمنة، يعني اللي بينجو من أثاره في الحاضر مستحيل ينجو منها بالمستقبل.
تم إعداده للمرة الأولى عام 1917م عن طريق أحد رواد الكيمياء العضوية المعدنية / الفلزية وهو الألماني “إريك كراوس Erich Krause”، المركب ده في حالة استنشاقه، بيتم امتصاصه سريعًا في مجرى الدم ووقتها بيشتغل وكأنه مرشد سياحي / سائق بيقود مركبات الكادميوم السامة في كل أنحاء الجسم؛ وبسبب فعاليته في استغلال مجرى الدم، فتأثيره بيكون سريع على الرئتين والكبد والكلى ناهيك عن الدماغ والجهاز العصبي.
ولو تمكن المصاب بمعجزة من النجاة في المرحلة الأولى من التعرض لثنائي ميثيل الكادميوم، فالدراسات أثبتت أنه بيصيب ضحاياه بالسرطان على المدى البعيد، وفي حال تفاعل المركب ده مع الماء، بينتج عنه حرارة عالية وكم كبير من غاز الهيدروجين القابل للاشتعال، وبالتالي المركب سهل الإنفجار مع المياه.

7.حمض الفلوروأنتيمونيك Fluoroantimonic Acid

من الصعب تكتمل قائمة لأخطر العناصر الكيميائية بدون حمض خارق، بيمثل حمض الفلوروأنتيمونيك مستوى تاني أقوى بمراحل من الأحماض العادية، وبيعرف النوع ده من الأحماض باسم الأحماض الفائقة، والحمض ده أقوى بعشرة مليون مليار “كوادريليون” مرة من حمض الكبريتيك، يعني 10 وقدامهم 15 صفر.
الحمض ده بيقدر بمنتهى السهولة أنه يذيب أي حاجة ممكن تفكر فيها، بخلاف إنه بينفجر في حالة تفاعله مع المياه، وفي حالة سقوطه على جسم إنسان، فالحمض مش بس بيذيب الأنسجة العضوية في الجلد والعضلات، لكنه بيذيب العظام نفسها.
والطريقة الوحيدة لتخزين الحمض ده بشكل آمن هو تخزينه في حاويات التيفلون Teflon والمعروفة بمقاومتها للمواد الكيميائية.