أغرب أشكال صغار الحيوانات

من لحظة ولادة الطفل، وتلاقي الجد أو الجدة مثلاً يقولوا يااااه ده شبه أبوه بالضبط، لا لا ده شبه جده، مع إن أصلاً ملامحه مش بتبقى واضحة وهو لسه وليد، الغريب بقى انك ممكن تفاجئ مع مرور العمر، إن كلامهم طلع صح والعيل طلع فعلاً شبه الشخص اللي قالوا عليه، بس الكلام ده مختلف تماماً في عالم الحيوان، بعض الحيوانات الوليدة مش بس من الصعب تتبين ملامحها، ده انت مستحيل تتخيل نوعها من الأساس، بالرغم انه من الطبيعي أو المنطقي ان صغار الحيوانات ما يشبهوش أهلهم بالضبط لحظة ولادتهم، إلا ان الفرق اللي بنتكلم عليه أكبر ما ممكن تتصور.

الكنجرو

ما بين كل الثدييات على الأرض، مافيش أصغر من أطفال الكنجرو لحظة ولادتهم، ومافيش مولود صعب تتعرف على أصله بالنظر له أدُّهم، بيتراوح حجم صغير الكنجرو لحظة ولادته ما بين حبة رز وما بين جسم نحلة صغيرة، مع طول يتراوح من 5 ملم لـ 25 ملم، وفي المرحلة ده بيبقى أعمى وبدون أي شعر وحتى أقدامه الخلفية بيبقى لسه ما اكتملش نموهم.
ومن الصعب جداً انك تقول على حتة اللحمة الصغيرة دِه انها هتكبر وتبقى حيوان الكنجرو اللي انت معتاد على شكله، ولعل السبب في القصة دِه راجع لقصر فترة حمل إناث الكنجرو و اللي بتتراوح بين 21 يوم لـ 38 يوم بس حسب النوع، وبتلد الأنثى من صغير لـ 4 صغار في المرة الواحدة، وبمجرد ولادتهم بيتحركوا ببطئ لغاية ما يوصلوا لجيب الأم ويستمروا فيه لمدة تتراوح من 120 لـ 450 يوم، وهناك بيلاقوا ملجأ أمن و 4 حلمات يتغذوا من خلالهم،واللبن الغني بالعناصر الغذائية بيساعد على سرعة نمو حتة اللحمة دِه وتحولها لكنجرو بالغ في فترة تتراوح من 14 شهر لـ 20 شهر للإناث ومن سنتين لـ 4 للذكور، علماً ان الكنجرو بيخرج من جراب امه في عمر يتراوح من 8 شهور لـ 18 شهر باختلاف النوع.

وعلى مدار الفترة ده بيعتادوا التبول والتغوط داخل جيب الأم، وهي الفوضى اللي بتنضفها الام من الحين للتاني باستخدام لسانها، ولو الطفل عمره صغير بيفضل قاعد جوا الجراب و ماسك في حلمة أمه أثناء التنضيف، لكن لو عمره كبير شوية بتضطر أمه انها تطلعه برا أو بمعنى أصح تطرده بشكل مؤقت لغاية ما تنضف جرابها الأول.

الباندا

بالرغم انهم بيتبعوا عائلة الدبيّات، إلا ان صغار الباندا ما بيتمتعوش بنفس القوة اللي بيُولد عليها صغار الأنواع المعروفة من الدببة، صغار الباندا بيتولدوا وهما عميان وبدون فرو وفي منتهى الضعف، لدرجة انهم ما بيقدروش يزحفوا إلا بعد 3 شهور كاملة من عمرهم، وفي لحظة الولادة بيتراوح وزن صغير الباندا من 90 لـ 140 جرام، في حين إن الام ممكن يوصل وزنها لـ 140 كجم، ولو فاكر ان السبب في ضعف الباندا راجع لقصر مدة الحمل زي ما اتكلمنا عن صغير الكنجرو مثلاً، فالكلام ده غير صحيح، حمل إناث الباندا بيوصل لخمس شهور كاملة.

السبب الرئيسي بيرجع للنظام الغذائي للأمهات، فالأكل الأساسي للباندا بيعتمد على البامبو، والنوعية ده من الطعام بتفتقر لقلة البروتين فيها، والقصة دِه بتخلي عملية الأيض أو تحويل الطعام لطاقة عند الباندا قليلة جداً، ومعاها بيقل مستوى الاكسجين في الدم والصغير ما بيقدرش يحصل على كم كافي من الاكسجين في رحم أمه مهما طالت مدة الحمل، ولنفس الأسباب هنلاقي إن بالرغم من إن الأم بتلد عادة صغيرين في المرة الواحدة، إلا إن في الغالب واحد منهم بس اللي بيعيش، والسبب راجع لضعف المولود وعدم قدرة الأم على توفير اللبن الكافي للصغيرين مع بعضهم.

الكوالا

زي ما الباندا تعتبر أحد رموز الأراضي الصيني، تعتبر الكوالا أحد أشهر الحيوانات الاسترالية على الإطلاق، والاتنين بيشتركوا في نفس الانطباع اللي بيسيبوه على البشر لحظة رؤيتهم بسبب شكلهم اللطيف وخاصة بين الصغار، أكتر مشهد ممكن يعلق معاك وانت بتفكر في الكوالا، هو منظر الصغير وهم متشبث بظهر أمه في كل حتة بتتحرك فيها حتى أثناء تسلقها للأشجار، وهي الفترة اللي بتستمر لـ6 شهور كاملين بعد خروجه من جيب أمه.

الكوالا من الحيوانات الشقبانية اللي زي الكنجرو، والوليد بيكون مشابه لنفس حتة اللحم الحمرا اللي بنشوفها مع صغار الكنجرو، يولد صغير الكوالا بعد فترة حمل تتراوح من 33 لـ 35 يوم، وبيعيش بعدها في جيب أمه لمدة 6 شهور تقريباً حتى اكتمال نموه، وبعد ما بيكون طوله لحظة ولادته أقل من 2 ونص سم ووزنه أقل من نص جرام، بيخرج من جيب أمه ووزنه يقترب من النص كيلو جرام، لكن على عكس جراب الكنجرو اللي بتحمل فيه صغيرها واللي بيفتح لفوق، جراب الكوالا مايل أكتر لأسفل.

آكل النمل الكبير

يعتبر آكل النمل الكبير أحد أغرب الحيوانات في عالمنا، لسانه هو الأطول مقارنة بحجم جسمه بين جميع الحيوانات على الإطلاق، مع طول يصل لأكتر من نص متر “60 سم”، وبيساعده اللسان الطويل ده في أكل ما يقدر بـ 35 ألف نملة يومياً، في البرية بيتزاوجوا في الفترة من شهر مارس لشهر مايو، لكن في الاسر ممكن يتزاوجوا في أي وقت على مدار السنة، وبعد فترة حمل تتراوح من 130 يوم لـ 190 يوم، بتلد الأنثى صغير واحد وزنه بيوصل لـ 1.4 كجم، وفي الحالات النادرة ممكن تلد صغيرين، وعلى عكس معظم الحيوانات اللي معانا النهاردة، فالغريب في شكل وليد آكل النمل الكبير مش انه مختلف في هيئته عن أهله، بالعكس ده بيبقى نسخة طبق الأصل منهم تقريباً، بيتميز الصغير لحظة ولادته بمعطف كامل على جسمه، وبيكون أقرب لشكل أبوه وأمه باستثناء حجمه الصغير، وبيقضي السنة الأولى من عمره وهو متشبث بضهر أمه ومابيفارقهاش إلا نادراً.

والحكاية ده بتساعده في التموه، لأن الحيوانات المفترسة بتواجه صعوبة في ملاحظته بسبب تطابق الفرو بين الأم والصغير، وفي نفس الوقت بتخلي الأم تبان وكأن حجمها أكبر وبالتالي أقل إغراءً لإفتراسها، وبيعتاد الصغير على حشر نفسه تحت رجول أمه الأمامية والرضاعة لمدة ساعة كاملة تقريباً في المرة الواحدة، وعلى مدار اليوم بيرضع ما يعادل 10% من إجمالي حجم جسمه، وفي عمر 9 شهور بيتوقف عن الرضاعة، لكنه لا يترك أمه إلا مع نموه بصورة كاملة في عمر السنتين.

فرس البحر

مش بس شكل فرس البحر اللي يعتبر فريد وسط عالم الأسماك، لكن ارتباط الشريكين ببعضهم مدى الحياة وحمل الذكور للصغار عوضاً عن الإناث، بتخليهم من أعجب الحيوانات في عالمنا على الإطلاق.
بتمتاز ذكور فرس البحر بجراب فريد على بطونهم، ومع التزاوج بتضع الأنثى ما يصل لـ 1500 بيضة داخله والذكر بيقوم بتلقيحها داخلياً، وقتها بيحافظ الذكور على البيض في جرابهم لمدة تتراوح من 9 أيام لـ 45 يوم، وبعدها بيطلق الذكور صغارهم من الجيب في المياه بشكل أقرب لنافورة أو مدفع رشاش، وشكل الصغار وقتها بيبقى أبعد ما يكون عن الشكل المتعارف عليه لفرس البحر، وبتلاقيهم أقرب لـ فِتّل أو دود صغير.

وبدون مساعدة حد، بيعتمد الصغار على نفسهم في النجاة من الحيوانات المفترسة أو حتى التيارات البحرية القوية، ولعل ده يكون السبب ورا نجاة أقل من نص في المية من جموع الصغار وصولاً لمرحلة البلوغ.

البوم

لو شوفت صغار البوم لحظة خروجهم من البيض، من المستحيل تتخيل ان دوول بوم أو حتى طيور حقيقية، فأنت بتتكلم عن شكل أشبه بــكور قطن طالعلها سيقان ومرسوم عليها وشوش وكأنها لعبة صغيرة، تضع إناث البوم من 3 لـ 4 بيضات في المرة الواحدة، وبيفقس البيض بعد فترة تتراوح من 3 لـ 5 أسابيع حسب نوع البوم، بس العجيب ان البيض مش بيفقس في نفس الوقت، لأن الأم مش بتضع البيض مرة واحدة ولكن على مدار أيام مختلفة.

وأول بيضة بتضعها هي أول بيضة بتبدأ عملية حضانتها، وبالتالي هي أول بيضة بتفقس وسط أقرانها، ومن الممكن يوصل فارق العمر بين أول واخر فرخ لأسبوع أو أسبوعين.

سلمندر

السلمندر هو واحد من أغرب الحيوانات اللي ممكن تشوفها وتتعرف عليها في العالم كله.
أولاً كده السلمندر من البرمائيات الأشبه في شكلها بخليط بين الضفادع والسحالي، وتلاقي منهم أنواع ليها رجلين وأنواع تانية عندها أربع رجول، بعضهم عنده خياشيم وبعضهم عنده رئتين، وفيه منهم اللي ماعندوش حاجة خالص وبيتنفس عن طريق الجلد، وعلى نفس النسق، هنلاقي ان فيه منهم أنواع بتبيض وفيه أنواع بتلد!
وبناءاً على النوع، بيختلف عدد البيض في المرة الواحد، لكن فيه منهم اللي بيضع 450 بيضة في المرة الواحدة، وبيمتاز البيض بتاعهم انه شفاف وشبيه بالهلام، حاجة كده عاملة زي بيض الضفادع.

أما عن الأنواع اللي بتلد، فالبويضات المخصبة بتفقس داخل الجسم وبتلد السلمندر صغارها من نفس المخرج الخاص بالفضلات،