زي ما الغوريلا معروفة باعتبارها ملك الغابة، كتير من الناس بيشوفو ان اسماك القرش هي ملوك المحيط بلا منازع، شكلها المرعب كفيل في حد ذاته بدب الرعب في قلب أي انسان، ناهيك عن مئات الأسنان الحادة وشهيتها المفتوحة وسرعتها في السباحة، وعامة فالواحد مننا مش محتاج لكل ده عشان يخاف من سمك القرش، مجرد مشاهدتك لشكل زعانفهم فوق سطح المياه كفيل بخروجك منها وانك ماتهوبش ناحية المنطقة مرة تانية، وعلى مدار التاريخ ودايماً ما كانت فيه عداوة بين الإنسان وأسماك القرش، وهي العداوة اللي أشعلتها الحوادث المتفرقة في العالم وزادت من لهيبها الأعمال السينمائية المخيفة لأسماك القرش.
وبالرغم إن فيه أكتر من من 375 فصيلة من أسماك القرش، إلا ان الفصائل اللي يتخاف منها بالفعل تعادل نسبة 3% بس من الإجمالي.
قرش ماكو قصير الزعانف Shortfin mako shark
![](https://3shwa2yat.com/wp-content/uploads/2022/02/359_1342a_f1-1024x672.jpeg)
يعتبر قرش ماكو قصير الزعانف هو أسرع أنواع القروش على الإطلاق بسرعة تصل لـ 56 كم في الساعة، وبعض المصادر ذكرت ان سرعته ممكن توصل لأكتر من كده بـ 74 كم في الساعة، وبتساعده سرعته على اللحاق بأسماك سريعة وافتراسها زي أسماك التونا والبونيتو Bonitos وأبو سيف، بخلاف ان حميته الغذائية في محيطه بالمياه الاستوائية والمعتدلة بتشمل على الماكريل والسلاحف البحرية وحتى القروش اللي زيه، وبالرغم من اتهامه بالهجوم على البشر في حوادث قليلة مقارنة بباقي أنواع القروش، إلا انه بيجي في المرتبة التانية بعد القرش الأبيض الكبير في حوادث الهجوم على القوارب، وهجومه من القوة والشراسة اللي خلّته في مرة يفرتك قارب كامل ويغرقه في 3 دقائق مش أكتر، عشان كده بيعتبره الصيادين أخطر أسماك القرش عليهم على الإطلاق، والعجيب ان الصيادين هما كمان الخطر الأكبر على قروش الماكو.
فـالماكو يعتبر صيد ثمين لهواة صيد الأسماك بسبب صعوبة القبض عليه وتحمل عفوانه وعدوانيته بمجرد ما تمسك الصنارة فيه، فــبخلاف قوته وسرعته العالية، قرش الماكو بيستخدم قدرته على القفز من المياه لتحرير نفسه من الخطاف، وبيقدر الماكوا يقفز من المياه بارتفاعات تتراوح من 3 أمتار لـ 6 أمتار فوق سطح المياه، يعني بيوصل لارتفاع يعادل مبنى مكون من دورين، علماً انه صاحب وزن ضخم يتراوح من 60 لـ 140 كجم في أوائل عمره، ومع بلوغه ممكن توصل إناث النوعية ده من أسماك القرش لحوالي 600 كجم وطول يقترب من الـ 4 أمتار.
قرش الطرف الأبيض المحيطي Oceanic Whitetip Shark
![](https://3shwa2yat.com/wp-content/uploads/2022/02/2020-04-02-shark-1024x576.jpg)
طبقاً للضابط البحري والمصور الفرنسي “جاك كوستو Jacques Cousteau”، يعتبر قرش الطرف الأبيض المحيطي هو أخطر أنواع القروش على الإطلاق، فعلى الرغم من بُعده عن الشواطئ والجزر، إلا ان قرش الطرف الأبيض مُتهم بقتل مئات الضحايا في المياه الواسعة والعميقة في قلب المحيط، بيمتاز النوع ده من القروش بحركة بطيئة وزعانف طويلة ذات أطراف بيضاء، لكن أهم وأخطر ما يميزه هو عدوانيته تجاه البشر وانتهازه للفرص، خلال الحروباشتهر قرش الطرف الأبيض المحيطي أنه أخطر على الجنود من مدافع أعدائهم، فمع سقوط أي طائرة أو سفينة في المياه،بيكون هو أول الحاضرين لمواقع الحطام، ومن أشهر الوقائع دِه هي حادثة السفينة الأمريكية “USS Indianapolis يو اس اس إنديانابوليس” في يوليو عام 1945، واللي تم نسفها على ايد غواصة تابعة للبحرية اليابانية خلال الحرب العالمية التانية، السفينة كان على متنها 1195 فرد، 300 منهم غرقوا مع السفينة والباقي ماتوا من أعراض مختلفة زي الجفاف والتسمم بالمياه المالحة، لكن الغالبية العظمى منهم انتهت حياتهم بين أنياب قروش الطرف الأبيض اللي كانت بتنهش في لحمهم، الأحياء منهم أو الأموات.
ونفس الواقعة اتكررت خلال الحرب العالمية التانية للسفينة البخارية البريطانية Nova Scotia واللي راح ضحيتها أكتر من 800 فرد، معظمهم كانوا ضحايا هجمات نفس النوعية من القروش، وحالياً يعتبر القرش ده من النوعية المهددة بالانقراض بسبب الصيد، وخصوصاً لزعانفه الطويلة اللي بيتم استخدامها في اعداد حساء زعانف القروش المشهور جداً وخصوصاً في الصين.
قرش الطرف الأسود Blacktip shark
![](https://3shwa2yat.com/wp-content/uploads/2022/02/blacktip-reef-shark-shutterstock-ohishiapply_-1024x538.jpg)
طبقاً للملف الدولي لهجمات أسماك القرش، فاعتباراً من عام 2008 تم تسجيل 41 هجوم من قروش الطرف الأسود على البشر، وسنوياً تعتبر هي المسئولة عن 16% من هجمات أسماك القرش حوالين فلوريدا بالولايات المتحدة الأمريكية، بتمتاز النوعية ده من القروش بأطراف زعانفها ذات اللون الأسود، وبيوصل طولها في المتوسط لـ 1.7 متر ووزنها بيتراوح من 25 كجم لـ 100 كجم.، وحجمها الخفيف نسبياً بيساعدها على قفزاتها المشهورة من المياه أثناء هجومها على مجموعات الأسماك الصغيرة، وبيقدر قرش الطرف الأسود انه يلف في الهوا 3 مرات قبل سقوطه على سطح المياه مرة تانية، لكن أخطر ما يميزه هو انتشاره في المياه الساحلية الاستوائية وغير الاستوائية حول العالم وتواجده على قرب من سطح المياه، وده بيخليه عُرضه للمواجهات المباشرة باستمرار مع البشر.
قرش النمر الرملي Sand Tiger Shark
![](https://3shwa2yat.com/wp-content/uploads/2022/02/download-13.jpg)
من ملاحظة الباحثين تبين ان قرش النمر الرملي نادراً ما يهاجم البشر إلا في حال استفزازه أو مضايقته بطريقة أو بأخرى، لكن ما نقدرش نلوم الصيادين أو غيرهم لو حاولوا يبعدوا النوعية ده من القروش المخيفة عنهم، في حال وجودها بالقرب منهم، فــقروش النمر الرملي بيمتازوا بمظهر شرس مع جسم ضخم وأسنان حادة بارزة في جميع الاتجاهات حتى وأفواهم مقفولة، وطبقاً لإحصائيات الملف الدولي لهجمات أسماك القرش، فيه 77 حالة تم رصدها لهجوم قرش النمر الرملي على البشر، وبيساعد على زيادة المواجهات المباشرة بينهم وبين البشر، حياتهم بالقرب من الشواطئ في المياه الدافئة والمعتدلة بمعظم أنحاء العالم، بالإضافة لتواجدهم على عمق يتراوح من أقل من 2 متر وصولاً لـ 190 متر تحت سطح المياه، وبيتراوح طول النوعية ده من القروش ما بين مترين لـ 3.2 متر ووزنهم من 90 كجم لـ 160 كجم، ومن المعلومات الغريبة عن قرش النمر الرملي، أنه النوع الوحيد من القروش اللي بيطلع لسطح المياه وبيبلع كميات كبيرة من الهوا، والفكر انهم بيخزنوا الهوا ده في بطونهم وبالتالي بتسمح ليهم يطفوا بدون حركة في الماء بحثاً عن الفرائس.
قرش النمر Tiger Shark
![](https://3shwa2yat.com/wp-content/uploads/2022/02/p09y09s7.jpg)
على عكس معظم القروش اللي بتعتاد على تذوق فرائسها قبل التهامها، فــقرش النمر ما يعرفش غير انه ياكل على طول أيا كانت الحاجة اللي قدامه، عشان كده هتلاقي ان الباحثين اكتشوف في معدة قروش النمر النافقة أشياء عجيبة جداً، منها كتل فحم وعلب طلاء ولوحات معدنية وغيرها، حتى ان حميته الغذائية الطبيعية بتضم خليط عجيب بيجمع بين الطيور والتماسيح وأفاعي البحر السامة وحتى أسماك القرش، وأسنانهم الحادة مع عضلات فكهم المرنة وقوة العضة نفسها بتخلي مافيش مفر لأي حيوان يقع ما بين أنيابهم، لدرجة انه معتادين على أكل السلاحف البحرية بعد قضم الصدفة اللي عليهم بأسنانهم، عشان كده مش بيبقى غريب على معظم هجماتهم على البشر انها تكون مميتة، ووصلت أعداد حوادث الهجوم على البشر من جانب قرش النمر لحوالي 157 حادث، منهم 27 هجوم مميت كان بدون أي استفزاز من ضحاياه، عشان يستحق عن جدارة مركزه ضمن أخطر 3 قروش على الإطلاق.
قرش الثور Bull shark
![](https://3shwa2yat.com/wp-content/uploads/2022/02/bullshark_cover-scaled-1-1024x576.jpeg)
زي ما اسمه بيلمح كده، قرش الثور بيمتلك جسم ممتلئ وطبيعة عدوانية غير عادية وغير متوقعة بالمرة، لدرجة انه من الممكن يهجم على أي كائن حي حواليه حتى ولو مش على قائمة طعامه أصلا، وقدرته على الحياة في المياة المالحة والعذبة واستعداده المغامرة والدخول وسط الروافد والأنهار، بتزيد من احتمالية مواجهاته مع البشر بشكل كبير، بيتراوح وزن قرش الثور من 90 كجم لـ 225 كجم وبيوصل طوله لحوالي 3.5 متر، ووصلت عدد هجمات قرش الثور على البشر لـ 121 هجوم، منها 25 هجوم مميت بدون أي استفزاز أو مضايقة من الضحايا، وناهيك عن عدوانيته وطبيعته الشرسة، فالباحثين بيشوفوا ان قرش الثور من القروش اللي بتفضل السيطرة على منطقته، وبالتالي مجرد وجود انسان فيها بدون علمه، بيعرضه لهجوم القرش عليه.
القرش الأبيض الكبير Great white shark
![](https://3shwa2yat.com/wp-content/uploads/2022/02/sharks-5.jpg)
أخطر قروش العالم على الإطلاق هو بطل فيلم الرعب الشهيرJaws ألا وهو القرش الأبيض الكبير، مع طول بيوصل لـ 6 أمتار ووزن يقدر بـ 2200 كجم، يعتبر القرش الأبيض الكبير هو أضخم الضواري البحرية من الأسماك، وبيتخطى مجموع هجمات الأبيض الكبير هجمات جميع أسماك القرش سواء على مستوى الاصابات أو الوفيات أو حتى الهجوم على القوارب في المياه، مع 403 هجوم على البشر منهم 65 هجوم أسفر عن وفاة ضحاياه، و247 هجوم غير مبرر وبدون أي استفزاز من ضحاياه بالمرة، والمشكلة مع القرش ده انه فضولي وعنده هواية التذوق، بمعنى ان لو فيه انسان في محيطه وبدون أي داعي يحب انه يتعرف عليه وياخد منه قطمة كده ويشوف طعمه حلو ولا لأ!
بس المشكلة هنا ان قضمة القرش الأبيض الكبير غير أي قضمة في عالم البحار، لأنك بتتكلم في 300 سن تقريباً وقوة عضة رهيبة واعتياد على هز ضحاياه يمين وشمال أثناء العضة عشان ياخد منها أكبر قدر ممكن، والقضمة الواحدة عند الأبيض الكبير ممكن ياخد فيها من 9 لـ 14 كجم من لحم فريسته، والعجيب انه عادة وبعد ما يدوق قضمة من جسم انسان، نادراً ما بيرجع للقطمة التانية، وده لأن النوعية ده من القروش بتفضل الأكل الغني بالدهون واللي بيوفره ليه الفقمات وأسود البحر، بس القضمة الواحدة اللي بياخدها غالباً ما بتكون كفيلة ببتر عضو كامل من صاحبها أو تدمير عضو حيوي في جسمه.