أغلى المأكولات والمشروبات في العالم

من رحمة ربنا سبحانه وتعالى أن القيمة الغذائية للأطعمة مش معتمدة على سعرها؛ علشان كدا بالرغم من إن فيه أطعمة أسعارها فلكية زي ما هنشوف؛ إلا أن البديل دايمًا موجود.

الحليب

بما إننا هنتكلم عن المأكولات والمشروبات، فالأفضل إننا نبتدى بوجبة الإفطار، واللي من أشهر وأهم عناصرها هو الحليب، وبيعتبر حليب “ناكا زا وا Nakazawa” الياباني هو أجود وأغلى حليب في العالم، وبيوصل سعره لأضعاف أي حليب تاني؛ فحليب Nakazawa بيوصل اللتر الواحد منه لحوالي 45 دولار؛ وبيرجع السعر المرتفع ده لنوعية الأبقار اللي بيتاخد منها الحليب وطريقة تسمينها، بالإضافة كمان لتقنيات الحلب وسرعة التعبئة.
فحليب ناكازاوا بيتم أخذه من الأبقار مرة واحدة أسبوعيًا خلال الساعات الأولى من النهار، وبعد كده بيتم تعبئتة في خلال ست ساعات بالكتير؛ وعشان كدا حليب Nakazawa يكون غني بهرمون “الميلاتونين melatonin”، وهو الهرمون اللي بيساعد في تنظيم درجة حرارة الجسم وضغط الدم، بالإضافة كمان لدوره في الحفاظ على شبكية العين وعلاج حالات قرحة المعدة، وكمان بيعتبر حليب Nakazawa عامل كبير من عوامل السعادة بوصفه واحد من مضادات الاكتئاب، وأخيرًا فـ Nakazawa له دور مكمل في الاسترخاء وعلاج اضطرابات النوم.

الأجبان

مازلنا في وجبة الإفطار، ومش هنقدر ننسى حاجة من أهم عناصر الفطار وهي الأجبان، ونصيحة لله بلاش تتمنوا تاكلوا أغلى جبنة في العالم، يعني من الأفضل أنكوا تاكلوا الجبنة رقم اتنين، إلا يعنى لو حد يعني مصمم فأغلى جبنة في العالم بتتعمل من حليب الحمير فالجبنة “بو- لى Pule” الصربية واللي بيبلغ سعر الكيلو جرام منها حوالي 1300 دولار، مرشحلكوش إنها تبقى إختياركم الأول، أما النوع اللى ممكن تشتروه فهو الجبنة البريطانية المعروفة بإسم “White Stilton Gold”، واللي بيوصل سعر الكيلو جرام منها لحوالي 900 دولار فقط لا غير حاجة كدا على قد الأيد، والجبنة دي معروفه بريحتها الفريدة وطعمها المميز، واللي بيكون مخلوط بأوراق الذهب الصالحة للأكل.

الشاي

بعد ما خلصنا فطار ودفعنا 100 ألف جنيه كدا ولا حاجة، لازم طبعا نتكلم عن أسعار الشاي في العالم، بيعتبر شاي “دا هونج باو da-hong pao” الصيني، هو أجود وأغلى أنواع الشاي في العالم وبيوصل سعره لـ 1400 دولار للجرام الواحد، والغريب إن الأنواع الموجودة بالأسواق حاليًا هي من الأنواع التجارية المقلدة مش أصلية، لكن رغم كده مازالت بتعتبر برضه هي الأفضل والأغلى بين كل أنواع الشاي، وبتتراوح أسعار الأنواع المقلدة دي المتوفرة في الأسواق من 100 إلى 200 دولار حسب حجم العبوة، أما الشاى الأصلي فتوقف إنتاجه من سنة 2005 ميلادية؛ وكان السبب في توقف الإنتاج والتحول للأنواع المقلدة هو جفاف الأشجار الأصلية القليلة اللي كانت مزروعة في الصين، بل إن الأشجار الأصلية كانت في حته واحدة بس من الصين، وتحديدًا في المكان المعروف بمعبد “تيانشن يونجل Tianxin Yongle”، وكان بيشرف على زراعة شاي “دا هونج باو” الأصلي فيه هما رهبان المعبد نفسهم، وكان التقليد في موسم الحصاد من عهد أسرة “مينج Ming” في القرن الـ14، هو إقامة إحتفالات وطنية بيحضر فيها أرفع الشخصيات الصينية، وكان بيتقدمهم الإمبراطور، وكانت طريقة الزراعة من الأسرار الوطنية اللي محدش يعرفها، وكانت المنطقة كلها محاطة بالحراسة المكثفة، لكن برضو ورغم كل الإجراءات دي، قدر مجموعة من اللصوص إنهم يسرقوا بعض البذور الأصلية عشان يعيدوا زراعتها في تربة مختلفة، إما بقى آخر اللي اتباع من شاي البذور الأصلية كانوا 20 جرام بس بمبلغ 28 ألف دولار.

اللحمه

دلوقتي بقى جه ميعاد أهم وجبة بالنسبة لنا في اليوم كله، وهي وجبة الغدا، واللي دايمًا بيكون الحاجة عليها العين في الغدا إما اللحمة أوالفراخ أوالأسماك؛ فبالنسبة لـ اللحمة، فـ لحم الواجيو اليابانى wagyu beef، هو أجود وأغلى أنواع اللحوم في العالم كله ومن كتر ما الواجيو ده غالي جدًا مش بيتباع أصلًا بالكيلو جرام، لكن عادةً بيتم شراء شريحة من اللحمه واللي بكل الأحوال مش هتقل عن ما يعادل 300 دولار أمريكي، وعمومًا فالواجيو بتلاقيه في الفنادق والمطاعم العالمية، أو طبعًا في قصور الملوك والرؤساء والأمراء؛ وبيرجع السعر المرتفع للحم الواجيو؛ لإنه بيجى من سلالة نقية انفصلت عن باقي سلالات الأبقار من 35 ألف سنة تقريبًا، بالإضافة طبعًا لطرق التسمين والرعاية الفائقة اللي بتحصل عليها أبقار الواجيو، واللي بيتم إنشاء مصانع خاصه ليهم؛ عشان عملية انتاج الأعلاف الصحية، ده غير بقى جيش من الأطباء البيطريين والمدلكين والمربيين، وبيتميز لحم الواجيو بأنه أكثر طراوة وعصارة من أي لحم تاني، وبينتشر الدهن الصحي غير المشبع في لحم الجسم كله بعكس لحوم الأبقارالعادية، واللي بتتراكم فيها الدهون على الحواف الخارجية بس.
وفي السنين الأخيرة، قامت الولايات المتحدة الأمريكية بإنتاج نسختها الخاصة من الواجيو، وده كان من خلال استيراد أعداد كبيرة من الواجيو الياباني للأراضي الأمريكية، وبعدين إجراء عملية محاكاة للظروف والبيئة الأصلية اللي كانوا عايشين فيها، وعموما فبتوصل جودة الواجيو الأمريكي لـ90% من جودة الواجيو الياباني الأصلي.

السمك

لو مكنتش من أنصار اللحم الأحمر وبتفضل عليه اللحم الأبيض، فخلينا نبدأ بأغلى المأكولات البحرية، والعلبة الصغيرة دي سعرها أكتر من 100 ألف دولار.
الكافيار الأبيض الذهبي بيستغرق حوالي عشر سنوات عشان تتم معالجته، وبيحتوي على طبقة من الذهب قابلة للأكل عيار 22، وبيتم استخراج الكافيار في الأساس من سمكة في غاية الندرة، وهي سمكة الحفش السيبيرية أو سمكة الاستروجين السيبرية، لكن مش أي سمكة منهم وخلاص، ده بس بيستخرج من السمك الأمهق اللي من النوع ده، يعني لو سمكة طبيعية مبتطلعش النوع ده من الكافيار، وبعد ما بيتم معالجتها بيتم بيعها بحوالي 100 ألف يورو أو ما يعادل 113000 دولار أمريكي للكيلو الواحد.

الدجاج

الدجاج الإندونيسي المعروف بـ “أيام سيماني Ayam Cemani”، بيوصل سعر الفرخة منه لـ 2500 دولار أمريكي، وطبعًا بيتميز بطعم رائع وبيحتوي على كتير من مضادات الأكسدة، غير طبعًا إنه أقل في الكوليسترول، ودجاج أيام سيماني بيرجع سعره المرتفع؛ علشان مش بيتواجد إلا في موطنه الأصلي بأندونيسيا، ده بالاضافة إلى إن النوعية دي من الدجاج بتتميز بالضعف الشديد في الانتاجية يعني أعداد الدجاج ده أصلًا محدودة، وكمان مش بيعيش غير جوه بلده يعني عشان يبقى فيه فرصة إن حد يدوق الفراخ دي، إما إنه يطلب وجبة بالطيران، أو يسافر لإندونيسيا عشان ياكلها.

الفاكهة

بعد الغدا بيجي الحلو طبعًا، ومع الحلو نبدأ بالفاكهة، أغلى فاكهة في العالم هي كنتالوب “اليوبارى الملكي Yubari King melons”، والحقيقة إن اليابانيين مشهورين بثقافة هدايا الفاكهة في المهرجانات والأعياد الوطنية، والناس بتقدم لبعضها أنواع من الفواكة النادرة على شكل عينات؛ وعشان كده المزارع الكبيرة للفواكة بتعمل المزادات لبيع أنواع من الفواكة النادرة، وغالبًا ما بيتقدم للمزادات بعض رجال الأعمال، واللي بيشتروا العينات بأسعار مهولة، وبيكون الهدف هو تسليط الضوء وتناقل الأسعار في وكالات الأنباء بغرض الدعاية، وده الأمر اللي بيكون مفيد لما بيشتروا كمية كبيرة بالأسعار الطبيعية، طبعًا بغرض إعادة البيع للمستهلكين، وفي سنة 2019 في مزاد بمدينة “شيزوكا اليابانية Shizuoka”، أتباع حبيتين من حبات اليوباري بمبلغ 45 ألف دولار، لكن متقلقش السعر الحقيقي لواحدة من حبات اليوباري مش بيزيد عن الـ 200 دولار، يعني كنتالوباية بـ 4 آلاف جنيه مش حاجة يعني.

الشيكولاتة

لو كنت شايف إن الفاكهة غالية شوية وعايز تحلي بحاجة غيرها، فمفيش أحلى من الشيكولاتة، وطبعًا الشيكولاته السويسرية غنية عن التعريف، وبتتميز بإنها خالية تمامًا من المستحلبات الصناعية، وبيتم صناعتها من أنواع خاصة من الحليب وزبدة الكاكاو، واللي بيتم انتاجهم من مكان واحد بس في العالم كله، وهو مراعي جبال الألب السويسرية، والشيكولاته في سويسرا مش مجرد حلوى وخلاص، إنما بتعتبر هي والساعات من أهم الصادرات اللي بتعتمد عليها البلد، وأما افضل وأغلى أنواع الشيكولاتة السويسرية على الإطلاق فهي شيكولاتة “دولافيي DeLafée”، واللي بيتم خلط مكوناتها بالذهب الصافي الصالح للأكل، وبيتم تقديمها في علب فاخرة أصغرها بيحتوي على قطعتين بوزن 12 جرام، وسعرهم فبيكون 55 فرنك سويسري، أو ما يعادل حوالي 60 دولار أمريكي، أو يعني بالمصري تقدر تقول كل قطمة شيكولاتة بألف جنيه.