في معظم فصائل الحيوانات بيظهر أفراد أكبر بمراحل من أقرانهم، ودائمًا ما بيبقوا محل اهتمام من الباحثين أو حتى من العامة لمشاهدتهم، ناهيك عن حماسة الصيادين لو واحد من الأحجام العملاقة وقعت تحت ايديه، بل إن بعض الصيادين بيستهدفوا الأرقام القياسية لأكبر المخلوقات اللي تم اصطيادها على الإطلاق.
1. سلطعون تاسمانيا
في عام 2012 بالقرب من جزيرة “تاسمانيا Tasmania ” الأسترالية تم اصطياد أحد أكبر المخلوقات البحرية اللي ممكن تشوفها في حياتك بالنظر لحجمها المعتاد، سلطعون أو كابوريا عملاقة بالمعنى الحرفي “أكبر 100 مرة من أي كابوريا ممكن تشوفها في حياتك”، كلنا عارفين إن الكابوريا اللي بنشتريها من الأسواق وزنها بيبقى عبارة عن جرامات معدودة، لكن الكابوريا دي وصل وزنها لـ 7 كجم لوحدها، وفي الوقت اللي بتوصل فيه المسافة بين المخالب الأمامية للكابوريا لـ حوالي 9 سم، الكابوريا دي وصلت المسافة بين مخالبها لـ متر كامل، وزي معظم أنواع السلطعون في العالم، واحد من المخالب بتلاقيه أكبر من التاني، الكبير بيبقى للتحطيم، والصغير بيبقى للمسائل أو المهام المحتاجة دقة أكتر في التعامل معاها، لكن السلطعون ده المخلب الصغير بتاعه من الحجم والقوة اللي تخليه قادر على كسر صوابع إنسان أو تحطيم ثمرة جوز هند.
والسلطعون اللي تم اصطياده في منتصف العمر ومتوقع له أن وزنه يزيد للضعف كمان، والصياد اللي اصطادها باعه لحوض أسماك بريطاني بـ 3 آلاف دولار.
2. التونة زرقاء الزعنفة
أسماك التونة ذات الزعنفة الزرقاء تعتبر هي أكبر أنواع أسماك التونة على الإطلاق، والصيادين بيعتبروها الجائزة الكبرى في عالم الصيد وبيتنافسوا دائمًا على مين يقدر يصطادها، خصوصًا انها من الأسماك القوية والسريعة، وبحسب الرابطة الدولية لصيد الأسماك فالرقم القياسي لأكبر سمكة من النوعية دي تم صيدها على الإطلاق كانت من نصيب الصياد “كِن فراسر Ken Fraser” بالقرب من مقاطعة نوفا سكوشا الكندية، ونجح “فراسر” في 26 أكتوبر عام 1979 في صيد سمكة تونة من ذوات الزعانف الزرقاء وزنها عامل 678 كجم.
وبعد أكتر من 40 سنة مازال مافيش صياد قادر يكسر الرقم ده، لكن فيه ناس قربت منه، منهم مجموعة من 3 مراهقين أعمارهم لم تتعدى الـ 17 سنة نجحوا في صيد زعنفة زرقاء بالقرب من ساحل ولاية”Maine” الأمريكية في عام 2020، وزنها اقترب من الـ 320 كجم، واستغرقوا مجتمعين أكتر من 7 ساعات في حرب معاها لحد ما عرفوا يمسكوها كويس، بس من ضخامتها ماكنوش قادرين يرفعوها على القارب بتاعهم وفضلوا ماسكين فيها وواحد منه اتصل بأبوه عشان يجيب القارب الكبير بتاعه ويسحب معاهم السمكة.
3. استاكوزا
تعتبر الاستاكوزا أو الكركند، من أشهى المأكولات البحرية على الإطلاق وأغلاها كمان، والاستاكوزا هي أحد القشريات التابعة لمفصليات الأرجل البحرية وبتمثل أحد أهم الصناعات على مستوى العالم بسبب سعرها العالي، ودائمًا تلاقي ظهورها على شاشات السينما يمثل غالبًا إشارة على الغنى أو الرفاهية.
بتعيش بشكل منعزل في الشقوق الصخرية أو الجحور في معظم محيطات العالم، وعادةً ما بيتراوح عمرها من 40 لـ 50 سنة، وغالبًا ما بيعتمد تحديد عمر الواحدة منهم بناءًا على حجمها، وده لأن حجمها بيكبر بإستمرار كل ما كبرت في العمر، ومن المثير للاهتمام عن الاستاكوزا أنها من ذوات الدم الأزرق؛ وده راجع لوجود النحاس في بروتين “الهيموسيانين hemocyanin” في مجرى الدم عندها.
وتعتبر أمريكا الشمالية من أهم المواقع اللي بيتم صيد الاستاكوزا فيها وخصوصًا من الأحجام الكبيرة، بل إن مقاطعة “نوفا سكوشا Nova Scotia” الكندية؛ يقال عنها إنها عاصمة الاستاكوزا على مستوى العالم ، والمعروف عن متوسط حجم الاستاكوزا أنه بيتراوح بين 25 سم لـ 50 سم على مستوى الطول ووزنها ممكن يوصل لحوالي 7 كجم، لكن في عام 1977 بعاصمة الاستاكوزا في العالم بكندا، تم اصطياد استاكوزا عملاقة وزنها عامل 20 كجم، وطولها معدي الـ 1 متر، وتم تقدير عمرها بـ 100 سنة.
4. مارلين سوداء
تعتبر المارلين السوداء هي أسرع مخلوق في عالم البحار على الإطلاق بسرعة تصل لـ 129 كم في الساعة، يعني أسرع من الفهد الصياد واللي هو أسرع المخلوقات البرية في العالم، بس ميزة السرعة عند المارلين السوداء مش مقتصرة على سباحتها وبس؛ لأ كمان في سرعة نموها، السمكة دِه بتكبر بسرعة غير معقولة على مدار عمرها، يعني في عمر سنة بتوصل السمكة لوزن 15 كجم، وفي عمر 3 سنين تلاقيهم وصلوا 50 كجم، وصولاً لـ 670 كجم في بعض الحالات.
العجيب بقى إنه وبالرغم من صعوبة صيدها مع حجمها الضخم وسرعتها العالية، إلا أن محُبي رياضة الصيد بيعشقوا صيد النوعية دي من الأسماك، بل وبيحاولوا يكسروا الرقم القياسي لأكبر سمكة مارلين سوداء تم صيدها على الإطلاق، بس لما تتعرف على الرقم القياسي هتشك إن فيه حد يقدر يكسره.
في 4 أغسطس عام 1953 نجح الأمريكي “ألفريد جلاسيل Alfred Glassell” في صيد مارلين سوداء طولها 4 متر ونص ووزنها معدي الـ 700 كجم “707 كجم”، “جلاسيل” اصطاد السمكة الضخمة بالقرب من ساحل بيرو بعد صراع معها في محاولة إمساكها استمر لقرابة الساعتين، وبعد مرور حوالي 70 سنة من الواقعة مازال مفيش حد قادر يكسر الرقم القياسي اللي حققه “جلاسيل” لحد النهاردة.
5. الحبار العملاق
بالرغم من معرفتنا القليلة عن الحبار العملاق؛ إلا إن اللي توصله الباحثين لحد دلوقت كله أغرب من بعضه، الحبار العملاق صاحب عدد من الأرقام القياسية، منها أنه “أكبر اللافقاريات على الإطلاق، وصاحب أكبر عيون في مملكة الحيوان” لدرجة أنها أكبر حتى من عيون الحوت الأزرق، وكل ده بخلاف غرابة شكله فتلاقي جسمه عامل زي الطوربيد مع 8 أذرع واتنين من المجسات المليانة على آخرها بالماصات اللي بيمسك بيها في فريسته، وعلى الرغم من نُدرة ظهوره ناهيك عن اصطياد؛ إلا أن في فبراير عام 2008 بـ نيوزيلندا حصلت صدفة ماحدش كان يتوقعها أبدًا.
الصيادين هناك رموا شباكهم في المياه بهدف اصطياد كميات ضخمة من الأسماك عشان يبيعوها، وبالفعل الشبكة تقلت بشكل غير طبيعي في المياه، بس لما سحبوها بدل ما يلاقوا كميات كبيرة من الأسماك مالقوش غير سمكتين تلاتة ومعاهم حبار عملاق طوله أكتر من 10 أمتار ووزنه معدي الـ 450 كجم، وتم إرسال الحبار بهدف دراسته في جامعة أوكلاند للتكنولوجيا في نيوزيلندا.
6. السلمون
ما بين كل أنواع أسماك السلمون، يعتبر سلمون “شينوك Chinook” أو سلمون الربيع أو “السلمون الملك king salmon” هو الجائزة الكبرى لهواة الصيد، وده على الرغم أنه أقل أنواع السلمون شيوعًا، بس الفكرة إن النوع ده بيوصل لأحجام أكبر بكتير من باقي الأنواع، بيتمركز وجودهم بشكل كبير على الساحل الغربي من الولايات المتحدة الأمريكية وكندا، وبيتراوح طولهم في المتوسط من 61 سم لـ 91 سم، ووزنهم من 5 كجم لـ 23 كجم، لكن طبقًا للرابطة الدولية لصيد الأسماك؛ فالرقم القياسي لأكبر سمكة سلمون من النوعية دي تم اصطيادها كانت في نهر “كيناي Kenai ” في ألاسكا سنة 1985، وصل طول السمكة العملاقة مقارنة بباقي بأقرانها من نفس النوع أو حتى باقي أنواع السلمون لحوالي 1.5 متر ووزنها عمل 44 كجم، ومازال الرقم القياسي زي ما هو لحد النهاردة بعد أكتر من 30 سنة.
7. قرش أبيض كبير
لما تفكر في أكبر سمكة تم اصطيادها على الإطلاق من الصعب يجي في بالك إنها هتبقى سمكة قرش، لأ وإيه أخطر أنواع القروش كمان،
طبقًا للرابطة الدولية لصيد الأسماك، فأكبر سمكة تم اصطيادها على الإطلاق هي قرش أبيض كبير وزنه معدي الواحد طن، وتحديدًا 1208 كجم، واللي نجح في صيد القرش وتحقيق الرقم القياسي هو الصياد الاسترالي “ألفريد دين Alfred Dean” في إبريل من عام 1959، بالقرب من ساحل “سيدونا Ceduna ” جنوب استراليا، والراجل ده كان تخصص صيد قروش لدرجة إنه مصطاد 7 قروش كلهم معديين الـ 900 كجم، بل إنه قبل 7 سنين من اصطياده للسمكة الأكبر على الإطلاق كان على وشك الإمساك بقرش وزنه قريب من الـ 2 طن، لكنه هرب منه في النهاية.