هات أي حد واديله ورقة وقلم، وقوله خد ارسم قلب، هتلاقيه بشكل تلقائي بيرسمه بالطريقة دي :
ونفس الشكل ده بيتم استخدامه في الملصقات وفي المحادثات اليومية وغيرها، وده بالرغم من إن القلب في الحقيقة شكله كده :
ف ياترى إيه السبب؟
ازاي ترسم حاجة ماشوفتهاش؟!
الفرضيات اللي بتحكي الأصول التاريخية لشكل القلب الأحمر المرتبط في أذهان الناس، عديدة جدًا ومتداخلة، لكننا ممكن نذكر أشهر فرضيتين منهم.
الفرضية الأولى بتزعم إن أصل شكل القلب بيعود لفترة العصور الوسطى في أوروبا، لأن الرسامين والفنانيين في الوقت ده كانوا بيحاولوا يجسدوا شكل القلب في الرسومات بتاعتهم في الوقت اللي كانت فيه الكنيسة عاملة حظر للتشريح، وبالتالي الرسامين دوول ماكنش عندهم فكرة حقيقية عن شكل القلب، ولو بصينا على شكل القلب في الرسومات الخاصة بهم، هنلاقيه ظاهر بالشكل ده :
واستمر تصور الناس عن شكل القلب بالمنظر ده، حتى بعد ما تطور علم التشريح وأتعرف شكل القلب الحقيقي، وده لأن الرسمة في المرحلة دي كانت معبرة، وفي نفس الوقت سهلة وبسيطة.
نبات السيلفيوم
الفرضية الثانية بتحكي حاجة عكس الأولى خالص، بتحكي إن أصل الرسمة دي بيعود لنبات قديم اسمه (السيلفيوم) silphium، السيلفيوم كان نبتة ضخم بتنمو في منطقة شمال افريقيا،وكان الإغريق والرومان بيستخدموه في حاجات عديدة جدًا، زي التوابل والأدوية والعقاقير وغيرها، لكن من ضمن الاستخدامات دي، كان بيتم استخدام بذورها في منع الحمل، وده بدوره خلى بذور النبتة دي مرتبط في أذهان الناس بالعلاقة الحميمية بين الراجل وزوجته، ولو جينا نبص على شكل البذور دي، هنلاقيها شبه القلب اللي بنستخدمه بالظبط!
ونفس الرمز ده ، ظهر على العملات المعدنية لمدينة قورينا Cyrene، اللي أسسها الإغريق في الجبل الأخضر في أقصى شمال شرق ليبيا.
كانوا بيحطوا رمز القلب على العملة بتاعتهم، لأنهم كانوا بيتاجروا في نبات السيلفيوم، وبناءً عليه أصحاب الفرضية دي بيقولوا الشكل بتاع رسمة القلب مالوش علاقة بجسم الإنسان ولا مشتق منه.
وفي النهاية وبالرغم ان دوول أشهر فرضيتين، إلا إن فيه فرضيات تانية بتتكلم كذلك عن الموضوع.