إتنين صحاب قاعدين جنب بعض في أمان الله، وفجأة تيجي ناموسة فدائية وهوووب تقوم قارصة واحد فيهم من سمانته وده للأسف كان صاحبنا شمشون، في حين إن صديقه نعناع قاعد جانبه، وولا على البال ولا على الخاطر، ومش حاسس بأي حاجة ومفيش أي ناموسة بتقربله، ومفيش دقيقة وتيجي ناموسة تانية وهووووب تقوم لاسعة شمشون مرة تانية، ونعناع قاعد على الكرسي قدامه في سلام وباصص في السما بيتأمل ومن وراه في الخلفية صوت صرصور الحقل، وبعدها بشوية تيجي ناموسة تالتة وفي نفس ذات السمانة وهوووب، تقوم لاسعاها.
الحقيقة الموقف ده مش مقتصر على شمشون ونعناع بس، ولكنه تقريبًا بيحصل معانا كلنا، أوقات كتير نبقى قاعدين في مكان، وخصوصًا في الأماكن المفتوحة وبنلاقي فعلاً إن الناموس بيختار أشخاص بعينهم من اللي قاعدين وعامل عليهم حفلة، في حين إنه بيسيب أشخاص تانية وما يقربلهومش تمامًا، وأحيانًا الناموس ممكن يقرص كل اللي قاعدين في المكان، لكن في نفس الوقت بيبقى في شخص معين بيتعرض لـ لدعاتهم أكتر من غيره، فياترى إيه اللي بيحصل، هل فيه نوع من الدم بيكون لذيذ أو خفيف على معدة الناموس، ولا إيه الموضوع بالظبط؟

نبذة عن المخلوق الصغير

مبدئيًا كده قبل ما تتكلم هتهرش في رقبتك؛ لأن الكلمة نفسها هتخليك تشعر بالحكة وهتقولي الناموسة دي حشرة سِمجة جدًا، وكل هدفها في الحياة إنها ترازينا وتمص دمنا، وحش مصاص للدماء على هيئة مخلوق صغير، الدم هو أهم حاجة عند الناموس، صح كده؟
في الواقع مش صح أوي، خليني أصححلك كام معلومة بخصوص الناموس، وأولها، إن الناموس مش بيتغذى أصلاً على الدم، نعم، هو إيه ده اللي مش بيتغذى على الدم، أومال بيزعجنا ليه وطول الوقت عمال يقرصنا ويمُص في دمنا، ولو مش بيتغذى على الدم فياترى بيتغذى على إيه، وليه بيقرصنا؟
من الحاجات اللي كتير من الناس ماتعرفهاش، هي إن الناموس مش بيقرص الجلد وياخد الدم بغرض التغذية، الناموس عمومًا مش بيتغذى على الدم فعلاً، ولكن بعض أنواع الإناث من الناموس بتلجأ لإنها تقرص جلد البشر أو الثديات أو حتى بعض الطيور، وتاخد منهم كمية من الدم، وده عشان تستخدمه في إنتاج البويضات بتاعتها.

الدم أو تحديدًا البروتين والدهون الموجودين فيه، بتساعد أنثى الناموس في إنها تنتج بويضات مُلقحة وناضجة، والدم كذلك، بينَّشّط الجهاز التناسلي للناموسة، وبيخليها قادرة خلال بضعة أيام فقط، إنها تنتج عشرات إن لم يكُن مئات البويضات، والبويضات دي بتفقس خلال أسابيع، وبتنتِج جيل جديد من البعوض. إذًا لو فيه ناموسة قرصتك فـ إعرف على طول إن دي ناموسة ست مش راجل، وحتى قائمة الأمراض الطويلة اللي البعوض بيسببها للإنسان، ذكور الناموس أبرياء منها مالهومش علاقة بيها لا من قريب ولا من بعيد، الذكور مُسالمين، وما بيقرصوش حد، ومالهومش دعوة بحاجة.

الناموس بيتغذى على إيه؟

طيب ثواني، فيه دلوقتي سؤال هو لو الناموس مش بيتغذى على الدم، أومال بيتغذى على إيه؟، في الواقع الناموس بوجه عام بيتغذى على الرحيق وخلاصة الزهور والنباتات؛ لأن المواد السُكرية بالنسباله بتكون مفيدة، وبتحتوي على كمية مناسبة من الطاقة، الدم مجرد مصدر بياخدوا منه بعض العناصر المُركزة، عشان ينتجوا البيض زي ماقولنا، لا أكتر، ولا أقل.
طيب إحنا كده عرفنا إن الناموس مش بيتغذى على الدم ولا حاجة، وبيتغذى على الرحيق وعرفنا كمان إن اللي بتقرصنا بتكون أنثى مش ذكر، نرجع بقى للسؤال المهم، الناموسة هانم ليه بتختار ناس معينة وبتقرصهم؟
الحقيقة من الأسباب الشائعة، واللي كنا بنسمعها بإستمرار من وقت للتاني، بخصوص الموضوع ده هي إختلاف الأشخاص في نوعية دمهم، أو فيه فصيلة الدم نفسها، وسمعنا كمان إن فيه نوع من الدم بيكون مفيد للناموس ومُفضل ليهم، ونوع تاني ما بيكونش مفيد، وبيحاولوا يتجنبوه قدر الإمكان.

لكن الحقيقة الكلام ده مش هو السبب الرئيسي؛ الدراسات فعلاً أثبتت إن إناث البعوض بتعتمد على البروتين الموجود في الدم، لإنتاج البويضات، وعشان كده من المنطقي إن يكون فيه بعض فصائل الدم مرغوبة فيها بشكل أكبر من غيرها.
الناس مثلاً اللي فصيلة دمهم O بيكون ليهم جاذبية تجاه الناموس أكتر من الناس اللي بتحمل فصيلة دم A مثلاً على سبيل المثال، إلا أن الموضوع ده مابيفرقش بالدرجة اللي هي.
وأكبر دليل على إن الناموس مش بيهتم بنوعية الدم، هو إن نفس الناموسة ممكن تقف على الحيوانات عادي ويسحبوا من الأغنام والمواشي وغيرهم من الثديات، بل وكمان الطيور، يعني دايسين في أي حاجة؛ لأن زي ما قولنا الدم عند البعوض هو المهم، بغض النظر عن نوعه أو حتى مصدره، وبناءًا عليه مازال في أسباب أخرى أهم، بتخلي الناموس يختارك أنت بالذات.

مبدئيًا كدا الناموس مش بيختار شخص ويسيب التاني بسبب البيولوجيا الداخلية فقط، أو التركيب الخاص بالدم وخلافه، ولكن اللي بيحفز إنجذاب البعوض لبعض البشر، هو إختلاف جراثيم البشرة الدقيقة اللي بتكون موجودة على جلد الإنسان.
جلد الإنسان هو بمثابة مغناطيس بيجذب الجراثيم والكائنات الدقيقة، البعوض بقى وبين قوسين (الإناث) بيفضلوا رائحة بعض الميكروبات الموجودة على الجلد، دونًا عن غيرها، يعني نقدر نعتبرهم كده برفيوم بيجذب إناث الناموس، وطبعًا الجراثيم الجلدية الدقيقة دي بتكون مختلفة من شخص للتاني، وبيعتمد تكوينها على البيئة المحيطة، وكذلك على الطعام اللي بناكله، وعلى المكان اللي بنعيش فيه، وبالتالي إختيار الناموس لنوعية الجلد بيتفاوت.
ده غير إن العرق والرائحة المُنبعثة من المسام وبصيلات الشعر، هي برضو عامل حاسم في جذب البعوض للجلد، يعني الموضوع هنا مش متعلق بنوعية الدم ولا حاجة، ولكن متعلق بالكائنات الحية الدقيقة اللي بتعيش على الجلد، وكذلك ريحته.
بالأضافة أن البعوض كمان بينجذب لـ لأشخاص اللي بيوجد على جلدهم تركيز عالي للكوليسترول أو “المركبات الستيرويدية Steroid”، ونركز إننا قولنا على الجلد، مش في الدم، يعني مُمكن شخص نسبة الكوليسترول في دمه تكون طبيعية ويتقرص أكتر من غيره؛ لأن نسبة الكوليسترول والمركَّبات الكيميائية المرتبطة بيه موجودة على جلده أكتر من واحد تاني.

حاجة تانية من اللي بتجذب البعوض هو جلد الأشخاص اللي بينتجوا كميات زايدة من بعض أنواع الأحماض، زي “حمض اليوريك uric acid”، ووجود الأحماض دي على الجلد بيثير حاسة الشم عند البعوض، وبيغريه إنه يهبط على الجلد وياخد تعسيلة ويتكل على الله.
ده غير إن زيادة حركة الجسم بيزيد من إنتاج “حمض اللكتيكlactic acid”؛ وعشان كده الأشخاص المتحركين والنشطين، بيكونوا أكثر عرضة لقرصات الناموس من الأشخاص الساكنين.
ده غير إن الحركة نفسها بتساهم في إنتاج حرارة زيادة للجسم وده ياخدنا لأحد أهم العوامل اللي بتخليك تتقرص من الناموس وهي درجة حرارة جسمك.
البعوض بينجذب لـ الأشخاص الأكثر دفءً مقارنة بغيرهم، وخاصة الأشخاص اللي بيكون عرقهم “ساخن” نتيجة لدرجة حرارة جسمهم. ومن الأسباب المهمة جدًا برضه، هو غاز ثاني أكسيد الكربون، الناموس بيقدر يستشعر بغاز ثاني أكسيد الكربون من على بعد 50 متر، وبالتالي الأشخاص ذوي الزفير القوي بيكونوا أكثر جاذبية للبعوض.
وضيف بقى على كل العوامل دي إن فيه عوامل تانية إضافية زي لون الملابس، واللي بدوره بيسهل أو بيصعب على الناموس عملية الرؤية، كل دي عوامل بتخلي الناموس يختارك إنت بالذات دونًا عن غيرك.

الناموس بيلسعنا إزاي؟

وأخيرًا من المعلومات الغريبة جدًا، هي إن الناموسة لما بتهبط على الجلد ما بتبدأش بإمتصاص الدم من أي مكان وخلاص، ولكنها بتعمل حركات أشبه بورديات الإستطلاع، بتبدأ الأول تدور عن مكان مناسب، تنزل على الجلد وممكن تحط الخرطوم بتاعها عليه بدون ما تعض، وبعدين تطير تاني وترجع بعدها بشوية، وبعدين تتحرك على الجلد وبعدين تطير تاني وهكذا، والغرض من ده كله، إنها بتفحص المكان وبتبحث عن الحتة اللي فيها أوعية دموية سهلة الوصول إليها.
ده غير إن أنثى الناموس أو البعوضة بتمتلك في فمها مسارين أو خرطومين، ومش مسار واحد، الخرطوم الأول بتمتص بيه كمية من الدم عادي، أما الخرطوم التاني، بتفرز من خلاله لُعاب ومواد معينة بتكون مضادة للتخثر؛ وده عشان مايحصلش تجلط سريع للدم؛ وعشان كده طول ماهي شغالة في السحب بتفضل تفرز الإنزيمات دي عشان الخرطوم بتاعها ميتسدش.
ده غير إنها قبل وأثناء العملية بتفرز مواد أشبه بالبنج الموضعي بتقلل إنقباضات الأوعية الدموية، عشان حضرتك ماتحسش باللسعة بتاعتها إلا أما هي تمشي، وصدق أو لا تصدق، أنت ما بتحسش بلسعة الناموسة غير لما تسحب خرطومها وتطير، ويبدأ تأثير الإفرازات بتاعتها يروح، ويبدأ الدم يتجلط في المكان وتشعُر بالحكة.