لو جينا نبص على الحيوانات في العموم هنلاقي بينا وبينهم حاجات مشتركة، إحنا الاتنين بناكل، إحنا الاتنين بنشرب، إحنا الاتنين بننام، وبما إننا في شهر رمضان وبما إنك صايم دلوقتي، فهل تفتكر أن الحيوانات كمان بيجي عليها وقت وتصوم زيك، ولو بتصوم فياترى إيه الظروف اللي بتضطره يصوم، وبيصومو إزاي، ولوقت قد إيه؟

فقدان الشهية

أكيد لاحظت قبل كده لما جالك دور برد إن شهيتك للأكل بتقل، وأكيد سمعت عن النصايح اللي بتتقال للمرضى خلال فترة علاجهم من نوعية إنك تاكل أكل خفيف زي شربة الخضار وتبعد عن الوجبات الدسمة والتقيلة.
فقدان الشهية عرض طبيعي تمامًا للمرض ومش إحنا بس اللي أكلنا بيتأثر بالمرض، الحيوانات زينا برضو لما بتمرض أو تنجرح بتفقد شهيتها للأكل، ومن غير تعليمات طبيب هي بفطرتها بتبتعد عن نظام أكلها المعتاد، بل وفيه حيوانات لما بتمرض بتصوم عن الأكل تمامًا لحد ما تسترد عافيتها من جديد.
وفيه اعتقاد خاطئ عند ناس كتير إن لما حد يمرض لازم ياكل كويس عشان زي ما بنقول بالمصري كده “يتقوى ويصلب طوله”، والحقيقة أن مفهوم الكويس عندنا ده أبعد ما يكون عن الكويس اللي المفروض يتاكل، ولو تأملنا في تعامل الحيوانات مع المرض هنشوف الفطرة السليمة اللي أودعها ربنا سبحانه وتعالى في كل الكائنات الحية ويمكن نتعلم منهم حاجة.
الحيوانات لما بتمرض أو تنجرج جسمها بيعرف إنه محتاج يسخر كل طاقته لمساعدة الجسم ده إنه يتعافى، وأول خطوة بيعملها هي إنه يدي الجهاز الهضمي أجازه ويوفر الطاقة الكبيرة اللي بيستهلكها في الهضم لعملية الشفاء ومساعدة جهاز المناعة إنه يشتغل بكفاءة أكبر.

وبيحكي طبيب ألماني عن حادثة حصلت لكلب أخوه الصغير اتكسر فيها رجلين من أرجل الكلب و3 ضلوع، وإصابة في الرئة خلته ياخد نفسه بصعوبة، اقترح عليه أصحابه أنه يقتله قتل رحيم عشان يريحه من ألمه، ولكنه رفض وقرر إنه يعتني بيه لحد ما يخف، وأثناء رحلة العلاج لاحظ إنه الكلب صام تمامًا عن أي أكل يتقدمله لمدة 20 يوم كاملين، اكتفى فيهم بس برشفات قليلة من المياه، حتى رفض إنه يشرب لبن أو أي سوائل تانية كانت بتتحطله، لحد ما تعافي.
والتجربة دي بيأكدها الدكتور الألماني “Irwin Liek اروين ليك” مع 3 من كلابه، كلب منهم خبطته عربية ونتج عنها كسور في عدة عظمة وجروح داخلية، وكلب تاني تناول بالخطأ كمية كبيرة من سم فئران وعانى من إسهال دموي وإنهار بالكامل، والكلب التالت كان عنده إصابة في عينه، والـ 3 كلاب انتهجوا نفس نهج الكلب اللي فات وصاموا عن الأكل حتى استردوا عافيتهم.
و صيام الحيوانات مش مقتصر فقط على الكلاب، راعي الماشية من “ماعز وجاموس وبقر” وغيره، بيلاحظ إنه فيه مشكلة صحية مع الحيوان اللي بيرعاه لما بيلاقي إنه استهلك من الأكل أقل عن المعتاد، القطط والغزلان كذلك لما بتتجرح أو بتمرض بتأوى لمكان آمن وتمتنع عن الأكل لحد ما تتعافى.

لحظة الولادة

أول ما طفل بيتولد بتبدأ الأم تُنصح بإنها ترضعه على طول؛ علشان يستفاد بلبن السرسوب اللي بيكون متوفر في بداية حياته كدفعة صحية يبدأ بيها مسيرته مع الدنيا.
لكن بعض الحيوانات بقى لحظة الولادة بيعملوا حاجة مختلفة تمامًا، صغار بعض العناكب بتصوم عن الأكل تمامًا أول 6 شهور من حياتها، والكتاكيت أول ما بيفقس البيض وتخرج للحياة مبتاكلش ولا تشرب لمدة 3 أيام كاملة، وبيعتقد الباحثون أن السبب ورا صيامهم هو إنهم بياخدوا وقت على ما يتأقلموا على بيئتهم ويبدأو يمارسوا حياتهم بشكل طبيعي.

الحالة النفسية

البرية هي المكان الوحيد للحيوانات البرية، لا السيرك ولا حديقة الحيوان ولا أي مكان تاني بيحرمهم من حريتهم، وكتير من الحيوانات البرية بعد فترة من أسرها بتبدأ تظهر سلوك عدواني مفاجئ تجاه الآخرين أو حتي تجاه نفسها عن طريق جرح جسمها؛ وده بسبب المشاعر الكتير اللي بيحسها الحيوان البري وهو محبوس خارج بيئته، الأحساس بالوحدة والاكتئاب والتوتر، وأحيانًا بيؤدي حبس الحيوان إلى هلاكه في النهاية وشعار “اعطني حريتي أو اعطني الموت” بيرفعه بعض الحيوانات البرية بعد تعرضهم للأسر.
ومن أشهر أمثلة الإضراب عن الطعام “الاجوانا البحرية Marine iguana”، واللي بتفضل مضربة عن الطعام لمئات الأيام، مش لأي سبب تاني غير إنها اتحبست.
وعلى سيرة المشاعر السلبية الكتير اللي بيحس بيها الحيوان لما يتحبس الحزن برضو واحد من ضمن المشاعر السلبية اللي بيحس بيها الحيوان وبتأثر على شهيته ولكن مش بسبب الأسر فقط، الكلاب أشهر الحيوانات المعروفة بولائها وانتمائها لصاحبها لدرجة إن فيه حالة وفاة صاحبها، بتحزن حزن شديد جدًا بيوصل لصيامها عن الأكل فترات طويلة، وأحيانًا بيكون نتيجة صيامها الطويل ده موتها.

الزواج

الصيام بالنسبالنا كبني آدمين مبيفرقش بين ذكر وأنثى، الجنسين بيصوموا نفس عدد الساعات في اليوم ونفس الأيام من السنة، لكن بعض الحيوانات في أوقات معينة زي “مواسم التزاوج ” الصيام بينفرد بيه جنس واحد فقط، ألا وهم الذكور، أشهر مثال للأسماك اللي بتصوم خلال فترة التزاوج هي سمكة السلمون الأحمر، سمكة السالمون أول كام سنة في حياتها تقريبا من 4 لـ 7 سنين بتعيش في المياه العذبة إلى أن تنضج جنسيًا وبعدها بتخرج في رحلة للمياه المالحة بتصل مسافتها لحوالي من 4 لـ 5 الآف كيلو متر بتتزاوج خلالها، وبعد ما تنتهي رحلة التزاوج بتاعها بترجع تاني للمياه العذبة موطنها عشان تضع بيضها وتبدأ دورة حياة جيل جديد من أسماك السلمون.
في خلال بقى رحلة التزاوج دي بيصوم ذكر سمكه السلمون مدة طويلة بتوصل لشهور، ونتيجة للصيام الطويل ده بيفقد ذكر السالمون الدهون اللي تراكمت على جسمه وبيصبح أكثر رشاقة، وبتزيد عضلاته قوة خلال الفترة الطويلة اللي استغرقها في السباحة، وده بيسهل عليه حركته خلال رحلته الطويلة، يعني من الأخر كدا ذكر السالمون الأحمر بيعمل فورمة قبل الجواز.

الظروف البيئية

الحرارة الشديدة أو البرودة الشديدة مشكله بتواجه كتير من الحيوانات اللي جسمهم مش مؤهل للحياة تحت الظروف القاسية، وبطريقة ما أو بأخرى بتلاقي الحيوانات طريقة تتكيف بيها، غالبًا بيكون اما عن طريق الهجرة زي ما بيحصل مع الطيور أو عن طريق “السبات Hibernation”، والسبات هو حالة من انخفاض النشاط الفسيولوجي للحيوان بتنخفض فيها درجة حرارة الجسم ومعدل الأيض، وضربات القلب ومعدل التنفس بيكون يادوب بالمعدل الكافي للحفاظ على حياة الحيوان، وبيفقد الحيوان الكتير من وزنه خلال فترة السبات؛ لأن كل الأنشطة اللي بتستهلك طاقة زائدة من الحيوان بتوقف، ومن ضمنها عملية الهضم، وبالتبعية بيتوقف الحيوان عن الأكل أو بيصوم خلال فترة السبات.
والحلزون واحد من الرخويات اللي بطبيعتها بتتجنب ضوء الشمس والحرارة لأنه بتسبب في جفاف جلدها، فبتلجأ أنها تدفن نفسها تحت طبقات من التربة لتتجنب الشمس والحرارة، لكن لما بتشتد الحرارة جدًا لدرجة تعرض الحلزون لخطر للجفاف وقتها بقى بيلتصق بأحد جزوع الأشجار وبيدخل في حالة سبات، وبيصوم لحد ما يبرد الجو تاني وتخف حدة الحرارة ويخرج من سباته، وبيساعده على عملية الصيام، طبقات الدهون الزايدة اللي اكتسبها جسمه طول السنة نتيجة لشراهه الزائدة للطعام.

قلة النشاط

بالرغم من أن بعض الحيوانات بتصوم بالفطرة ولكن بعضها خاصة في الأسر بيجبر على الصيام، ولو أخدنا الأسود كمثال للدراسة هتلاقي إنها نظرًا لقلة الحركة في الأسر مقارنة بحركتها في البرية بتعاني من السمنة والكسل وقلة النشاط ومشاكل في الهضم، ولما طبق عليهم نظام غذائي بيشتمل على أيام بيحرموها فيها من الأكل “صيام إجباري”،
يبدتي نشاطهم يزيد بشكل ملحوظ وكمان شهيتهم وعملية الهضم عندهم اتحسنت، ده غير إن سلوكهم العدواني كمان قل، وده اللي خلى حديقة حيوان “نيهرو في الهند Nehru Zoological Park” تطبق “الصوم الإجباري” في يوم واحد من كل أسبوع على حوالي 100 حيوان من آكلي اللحوم و 350 من آكلي العشب الموجودين في الحديقة، وكان رد المسئولين عن الحديقة لما اتسألوا عن ليه بيجبروا الحيوانات على الصيام يوم في الأسبوع قالوا “إنهم بيعملوا كده عشان يحافظوا على لياقة الحيوانات البدنية، ويضمنوا إنهم ميكتبسوش دهون زايدة، ويضمنوا كمان إن جهازهم الهضمي يفضل شغال بكفاءة عالية”.
وده إن دل على شئ فيدل على فوائد الصيام الكتير بالنسبة لجميع الكائنات الحية مش بس للإنسان.