في شهر رمضان وبالتحديد بعد أذان العصر بشوية، بتبدأ تمسك ساعتك وتحسب فاضل قد إيه على أذان المغرب، والفترة دي بالتحديد بتكون من أصعب فترات الصيام في اليوم كله، جسمك بيكون مرهق وبتكون إستنفذت كل طاقتك على مدار اليوم.
وهنا بتبدأ تفكر أو خلينا نقول تتمنى، إنك تكون عايش في بلد عدد ساعات الصيام فيها قليل، بس ياترى إيه هي البلد اللي هتتمنى تكون عايش فيها، وهل عدد الساعات اللي هتصومها هيكون فعلاً قليل ولا لأ؟.
سبب الأختلاف
الصيام بيبدأ من أذان الفجر وبينتهي بأذان المغرب، وللوهلة الأولى ممكن تعتقد إن الفترة دي شبه ثابتة بين البلاد وبعضها، وإنها لو إختلفت فهيكون الإختلاف بضعة دقائق مش أكتر، بس خليني أقولك إن إعتقادك ده مش في محله، وخليني أقولك أنك عاق لأنك متقرأتش على حلقة “أطول ساعات الصيام في العالم“؛ لأنك لو كنت قرأتها مكنتش هتبقى فاكر كدا.
العامل الرئيسي في تحديد عدد ساعات الصيام هو الفترة بين الشروق والغروب، والعامل ده بيتغير من دولة للتانية، والتغير ده بيكون على حسب موقع الدول دي على سطح الأرض، وفصل السنة اللي هيوافق شهر رمضان.
وخلاصة الموضوع ده علشان ما أصدعكش إن رمضان لما بيكون في أشهر الصيف والربيع، البلاد اللي بتقع بالقرب من القطب الشمالي للكرة الأرضية، زي الدول الإسكندنافية وشمال القارة الأوروبية، بتكون الفترة بين شروق الشمس وغروبها كبيرة جدًا، وبالتالي عدد ساعات الصيام هيكون أكبر ما يمكن في الدول دي، وعلى العكس لما رمضان يبقى في الأشهر الشتوية، الدول في نصف الكرة الجنوبي هتصوم عدد ساعات أكبر من النصف الشمالي، وبما إن رمضان السنة دي متوافق مع شهور الربيع، فنقدر نقول إن الناس اللي بيعيشوا في نصف الكرة الأرضية الشمالي، هيحسدوا اللي عايشين في نصفها الجنوبي.
أقل فترة صيام في العالم العربي
معظم عالمنا العربي بيقع بالقرب من نصف الكرة الأرضية الشمالي، وده معناه إننا بنصوم عدد ساعات صيام كبيرة نسبيًا.
متوسط عدد ساعات الصيام في العالم العربي هو 15 ساعة تقريبًا، إلا إن دولة جزر القُمُر بتتمتع بعدد ساعات صيام أقل من جميع الدول العربية.
وجزر القُمُر هي دولة عربية عبارة عن أربع جزر بيقعوا في المحيط الهندي على الساحل الشرقي من القارة الأفريقية، وعلى الرغم من إنها تالت أصغر دولة أفريقية إلا إنها الدولة الأعلى من حيث الكثافة السكانية في القارة، وبالنسبة لعدد الساعات اللي هيصومها سكان جزر القُمر فهو 13 ساعة و 12 دقيقة في أول أيام شهر رمضان، وعلى عكس معظم الدول العربية عدد الساعات ده مش هيزيد خلال شهر رمضان، ولكنه هيقل تدريجيًا خلال الشهر لحد ما يوصل لـ 12 ساعة 59 دقيقة مع نهاية شهر رمضان.
والسبب اللي خلى عدد ساعات الصيام في جزر القُمُر تتناقص مع مرور شهر رمضان، هو قربها من القطب الجنوبي للأرض، والسبب ده هيتكرر معانا مع معظم الدول في موضوعنا النهاردة.
أقل فترة صيام في القارة الأفريقية
أغلب أراضي القارة الأفريقية موجودة في نصف الكرة الأرضية الجنوبي، والسبب ده خلى مدينة “كيب تاون Cape Town” الواقعة في دولة جنوب أفريقيا من ضمن قائمتنا النهارده.
جمهورية جنوب أفريقيا بتقع في أقصى جنوب القارة الأفريقية، والموقع ده مثالي للدولة في الأشهر الصيفية والربيعية من حيث عدد ساعات الصيام.
وعلى الرغم من إن عدد المسلمين في جنوب أفريقيا قليل جدًا ولا يتجاوز 1.5% من سكانها، إلا إن جنوب أفريقيا تعتبر من أكثر الدول إهتمامًا بالجالية المسلمة.
وعلشان يتم دمج الأقلية المسلمة مع المجتمع الجنوب أفريقي، تم إفتتاح العديد من المدارس والجامعات الإسلامية والمساجد، ومع عدد ساعات الصيام اللي لا يتجاوز الـ 11 ساعة و 50 دقيقة، دلوقتي عارفين الناس اللي هتحب تسافر في خلال رمضان هتروح فين.
أستراليا
“أستراليا Australia” هي أصغر قارة في كوكب الأرض وفي نفس الوقت هي واحدة من أكبر الدول في العالم، بإجمالي مساحة يتخطى الـ7 مليون و688 ألف كيلو متر مربع، بتصنف أستراليا على إنها سادس أكبر دولة في العالم.
وعلى الرغم من مساحتها الشاسعة بيبلغ عدد سكان أستراليا حوالي 25 مليون وكسور، والعدد القليل ده وضع أستراليا في تصنيف الدول الأقل كثافة سكانية على مستوى العالم.
وبالرغم من أن عدد المسلمين لا يتجاوز الـ2.2% من إجمالي عدد السكان، إلا أنه تاني أسرع ديانة إنتشارًا في البلاد، والمسلمين الأسترالين بيرجع أصلهم لـ 183 بلد مختلفة، والعدد الرهيب ده من الدول أنشأ مجتمع إسلامي بيحتوي على العديد من الثقافات والأعراق، والحكاية دي ساعدت في إندماج المسلمين في المجتمع الأسترالي بسرعة كبيرة جدًا، وبالطبع كانت عنصر فعال جدًا في زيادة إنتشار الدين الإسلامي في القارة.
عاصمة أستراليا هي مدينة “كانبرا Canberra” والمدينة دي بتقع في أقصى جنوب أستراليا، وبالتالي هتكون هي أقرب نقطة للقطب الجنوبي من قارة أستراليا، وبيبلغ عدد ساعات الصيام في كانبرا 11 ساعة و 51 دقيقة.
نيوزيلندا
وبما إننا إتكلمنا عن أستراليا فأكيد لازم نتكلم عن “نيوزلندا New Zealand”، نيوزيلندا هي دولة بتتكون من جزيرتين رئسيتين ومجموعة من الجزر الصغيرة كلهم بيقعوا بالقرب من جنوب شرق الساحل الأسترالي، وبالنسبة لعدد سكان البلد فهو صغير جدًا وبيزدهر بشكل بطئ للغاية.
نيوزيلندا بتحتوي على 5 مليون و 24 ألف نسمة ومن المتوقع إن العدد ده يزيد ربع مليون نسمة فقط خلال العشر سنوات القادمة، أما عن عدد المسلمين هناك فهو لا يتعدى الـ 1% من عدد السكان.
وبسبب قرب نيوزيلندا الشديد من القطب الجنوبي بتكون ساعات الصيام فيها قليلة جدًا، وبتوصل ساعات الصيام في مدينة “كرايستشرش Christchurch” إلى 11 ساعة و26 دقيقة فقط في أخر أيام شهر رمضان.
الأرجنتين
الأرجنتين هو أسم مشتق من الكلمة اللاتينية أرجنتيوم واللي معناها الفضة، واللي أطلق الإسم ده هما الغزاة الأسبان، اللي كان سبب غزوهم للبلاد هو شائعات كانت بتقول إنها بتحتوي على جبال من الفضة، والمفارقة هنا إن أرض الأرجنتين لا تحتوي على الفضة مطلقًا، وكانت نتيجة الغزو الأسباني هي الصفر.
وتعتبر الجالية المسلمة في الأرجنتين من أكبر الجاليات الإسلامية في أمريكا الجنوبية، وبترجع أصولهم إلى المسلمين اللي هاجروا من الإمبراطورية الأسبانية بسبب الإضطهاد في القرن الخامس عشر، وتبع الهجرة دي هجرات تاني من سوريا ولبنان في أواخر القرن التاسع عشر وبداية القرن العشرين.
وعلى الرغم من إن المسلمين في الأرجنتين يعتبروا من أكبر الأقليات المسلمة في أمريكا الجنوبية إلا إن عددهم حوالي 1.9% من إجمالي عدد السكان.
وبيتمتع المسلمين في مدينة “أوشوايا Ushuaia” اللي بتقع في أقصى جنوب الأرجنتين، بأقصر ساعات صيام في العالم واللي هتوصل إلى 11 ساعة و 20 دقيقة في يوم 12 مايو، أخر أيام شهر رمضان المبارك.
قرية وُكان العمانية
المكان اللي في الصورة ده سكانه بيصوموا 3 ساعات ونص فقط، والأغرب من كده إنه موجود في أحد البلاد العربية.
بالرغم من إن سلطنة عمان بتقع في قارة آسيا، وهي أقرب لنصف الكرة الأرضية الشمالي منه للجنوبي، ومتوسط ساعات الصيام في عمان بيوصل لأكثر من 15 ساعة، إلا إن قرية “وُكان Wekan” بتسجل أقصر يوم في العالم كله.
على بعد 150 كيلو متر من العاصمة العمانية مسقط، وعلى إرتفاع أكثر من 2000 متر فوق سطح البحر، بتقع قرية وُكان الجبلية.
وقرية وُكان هي قرية صغيرة بتقع في وادي مستل بولاية نخل بمحافظة جنوب الباطنة، والقرية دي بتشرق فيها الشمس الساعة الـ 11 صباحًا وبتغرب في تمام الساعة الثانية ونصف، واليوم عليها بيعتبر أقصر يوم موجود على سطح الأرض.
والسبب اللي خلى اليوم يكون بالشكل الغريب ده، هو وقوع القرية في منطقة بين الجبال شاهقة الإرتفاع فالشمس مش بتوصل ليها إلا لما تكون في كبد السماء، وبتغيب عنها سريعًا علشان نفس السبب، ولكن السؤال هنا هل سكان القرية دي بيصوموا 3 ساعات ونص فعلاً؟
لو تحمست لإن اليوم في القرية دي قصير جدًا، وبدأت تحضر في شنطتك علشان تسافر عمان، إسمح لي إني أخيب أملك وأقولك إن الموضوع مش زي ما أنت فاكر للأسف، على الرغم من تسجيل قرية وُكان لأقصر يوم على الأرض، إلا إن وقت الصيام بيبدأ من طلوع الفجر الصادق إلي غروب الشمس، ومعنى الكلام ده بإختصار إن وقت الصيام مش محدد برؤية سكان القرية دي للشمس، ولكنه محدد بطلوع الشمس على المنطقة اللي بيقع فيها الوادي نفسه، وبكده هيصوم سكان المدينة 15 ساعة زيهم زي باقي مدن سلطنة عمان.