ليه الإنجليزي فيه حروف كبيرة وحروف صغيرة؟

لو فتحنا أي كتاب إنجليزي وأخدنا منه جملة أو سؤال وليكن سؤال زي Did you visit Egypt before?، هنلاحظ إن أول كلمة في السؤال واللي هي Did، الـ D اللي في أول الكلمة Capital، والـ d اللي في الأخر small، وحرف الـ E اللي في كلمة Egypt كابيتال وفي كلمة before سمول.
والسؤال اللي بيطرح نفسه هنا، هو ليه فيه حروف كبيرة وحروف صغيرة، ليه يعني ميبقاش في نسخة واحدة بس من كل حرف وخلاص، وهل اللغة الإنجليزية هي الوحيدة اللي عندها القصة دي ولا لأ؟

ليه في حروف كبيرة وصغيرة؟

تخيل تفتح إيميلك الصبح أول ما تروح الشغل فتلاقي رسالة مبعوته بالشكل ده، هتحس إن فيه حاجة غلط، واللي هيجي في بالك وقتهاأكيد كان دايس على زرار الـ CAPS من غير ما ياخد باله، الإيميل بشكله ده حتى لو كان فيه عزومة عشا، فهو مش مريح على الإطلاق، لكن خليني أفاجأك وأقولك الكتابة بالإنحليزية في الأصل كانت بالشكل ده، واللي معظم كلماتها نشأت أصلاً من اللغة اليونانية واللاتينيه القديمة.
الحروف الكبيرة في اللغة كانت بيتم إستخدامها بداية من القرن التاني الميلادي، يعني كلها كانت CAPITAL ومفيش small خالص، وكل الناس في الوقت ده كانوا بيستخدموا الحروف في شكلها الكبير أثناء في الكتابة، ده غير إن الكتابة بالحروف الكبيرة في البداية كانت بتعبر عن العظمة أو التباهي أو الجدية في الكلام.
طيب يا عم ما الكتابة كلها كانت حروف كبيرة ولا في كابيتال وسمول ولا أي لغبطة، إيه بقى اللي حصل في الدنيا عشان يظهرلنا الإنجليزي بشكله الحالي وتظهر الحروف الكبيرة والصغيرة؟
عشان نعرف الحكاية بدأت منين، خلونا نذكر واقعة غريبة واللي تعتبر أحد الأشياء الرئيسية اللي بسببها بقى فيه حروف كبيرة وحروف صغيرة.

طيب يا عم ما الكتابة كلها كانت حروف كبيرة ولا في كابيتال وسمول ولا أي لغبطة، إيه بقى اللي حصل في الدنيا عشان يظهرلنا الإنجليزي بشكله الحالي وتظهر الحروف الكبيرة والصغيرة؟
عشان نعرف الحكاية بدأت منين، خلونا نذكر واقعة غريبة واللي تعتبر أحد الأشياء الرئيسية اللي بسببها بقى فيه حروف كبيرة وحروف صغيرة.
القصة بدأت من عند الكتبة والمؤلفين، وبما إن الكتابة كلها في الوقت ده كانت بخط اليد، فحسوا إن الكتابة بالحروف الكبيرة بتاخد وقت ومجهود كبير، فقالوا لأ إحنا لازم نقف واقفة ونشوفلنا حل في الموضوع ده، عايزين نكتب كتب أكتر وفي وقت أقل، نعمل إيـــــــــه، قالوا هو حل واحد، مش إنتوا شايفين إن الحروف الكبيرة مضيعة للوقت يعني، إيه رأيكم لو عملنا نمط حروف جديدة، مختصرة وصغيرة في الحجم، وتفي بالغرض، وفعلاً تم الاتفاق على خطة وبدأ اشتقاق النسخ المصغرة من الحروف الكبيرة، وعلى مزاجهم بقى الـ A الكبيرة كده يبقى الصغيرة نخليها كده a، والـ B الكبيرة كده والصغيرة نخليها كده β ولا أقولك خليها كده b.
ومعظم الحروف كان بيتغير شكلها في النسخة الأصغر منها، بإستثناء مجموعة من الحروف، بقت هي هي بدون تغيير، لكن بحجم أصغر، وجايز السبب في ده أن الحروف دي أصلًا كتابتها سهلة وهي كبيرة، المهم أن الموضوع جاب نتيجة والكتبة بقوا يحسوا بالتغيير ده وإنهم بينجزوا بقدر أكبر، لكنهم في بداية الأمر مكنوش بيخلطوا أبدًا في الكتابة بين الحروف الكبيرة والصغيرة، لكن الكتابة كلها بقت حروف صغيرة، وموضوع الفخامة والهيبة بتاع زمان مبقوش حتى مهتمين بيه، لكن بعد فترة أدركوا إن الحروف الكبيرة هي اللي بتجذب العين بشكل أكبر، وإن لما شخص بيقرا فقرة أو جملة بدون أي حروف كبيرة، مستوى الإهتمام بيكون أقل، وللسبب ده وعلى الرغم إن مكنش لسه ظهرت قواعد للكتابة بالحروف الكبيرة، الكتاب في الوقت ده بقوا يستخدموا الحروف الكبيرة في مواضع معينة، زي مثلاً في بداية الجمل ومع بداية كل صفحة وأي فقرة جديدة ومع الأسماء، ومش بس كده دول بقوا يكتبوا الحروف الكبيرة بخط وشكل مميز، وده إستمر لمئات السنين.
وفضل التطور في إصدارات الحروف الصغيرة هو كمان مستمر، عشان يبقى في مجموعة صغيرة كاملة من الحروف، وبرغم إن الحروف الكبيرة ليها هيبتها، إلا إن الحروف الصغيرة لحد اللحظة دي قدرت وبجدارة تتربع على عرش الكتابة؛ لإنها وببساطة كده هي الأسرع والأسهل.

سبب التسمية

الحروف الكبيرة والصغيرة في اللغة الإنجليزية بيطلق عليهم الـ uppercases و الـ lowercases، والتسمية دي بالمناسبة هي الدارجة بشكل أوسع للحروف أكتر من موضوع Capital و small، والحقيقة قصة التسمية دي هي كمان ليها قصة غريبة.
في ورش الطباعة القديمة كانت الحروف بتتحفر على قطع من المعدن وتتحفظ جوا مربعات واتسمت cases، والقطع اللي من المعدن الخاصة بطباعة الحروف الصغيرة، واللي كان بيتم إستخدامها بشكل مستمر كانت بتتحط في أرفف قريبة من الإيد أو الأرفف اللي تحت؛ فعشان كدا اتسمت بالـ lowercases أي العبوات السفلى.
أما الحروف الكبيرة اللي بيتم إستخدامها أقل، كانت بتتحط في أرفف عالية؛ اتسمت بالـ uppercases يعني السبب في التسمية هو مكان التخزين القديم في المطبعة مش أكتر.

إمتى نكتب حروف CAPITAL وإمتى نكتب small؟

لحد أوائل نهاية القرن الـ 18 مكنش في قواعد رسمية للكتابة بالحروف الكبيرة، أما مع بداية القرن ال19ـ بدأت القواعد تتحط وبدأ الموضوع يخرج من حيز الإجتهاد لقواعد ثابتة ومعروفة للكل، وبالفعل بقى فيه عدد كبير من القواعد اللي بتتحكم إذا كان الحرف ده يتكتب كبير ولا صغير، ومن أهم القواعد دي؛ هو إن أول حرف من الكلمة الأولى من أي فقرة أو أسم أو مكان أو بلد أو لغة أو شهر من شهور السنة أو عيد رسمي، كلهم لازم يبقوا حروف كبيرة.

لكن لكل قاعدة شواذ، بعض الأماكن زي الصحف والمجلات إستخدامو الحروف الكبيرة بشكل مختلف، وتحديدًا في أوائل القرن العشرين لما إدراكو إن الحروف الكبيرة في جذب أكبر عدد من الأشخاص، وحجم المبيعات بتزيد كل ما كان العنوان مكتوب بحروف الكبيرة.
وفعلاً أشهر الصحف والمجلات العالمية لحد وقتنا ده عناوينها واسمائها نفسها بتكون بالحروف الكبيرة، زي جريدة الـ TIMES على سبيل المثال.
لكن على الرغم من إن الحروف الكبيرة جذابة أكتر، إلا إن عدد كبير من الدراسات اللي تمت على مدار العقود اللي فاتت وبداية من عام 1914، أكدت إن النص اللي بيكون مكتوب كله بحروف كبيرة بياخد وقت وجهد أكبر عشان نقراه وواقعه على المشاعر بيكون مختلف.

الغرض من الدراسة هو معرفة واقع الحروف الكبيرة على المشاعر، وطلبوا من الشباب إنهم يوصفوا مشاعرهم لما يقروا نفس الرسالة، مرة بحروف كبيرة، ومرة بحروف صغيرة، وكانت النتيجة لما قروا جملة بتدل على السعادة، حسوا بسعادة أكبر لما قروا جملة IT’S MY BIRTHDAY، عن لما قروها It’s my birthday.
أما الرسايل اللي فيها عدائية زي (FIGHT ME) و(fight me)، وللسبب ده بقت الكتابة بحروف كبيرة دلالة على التنبيه الشديد.

حاجة كدا أشبه لما بتكلم واحد صاحبك على الشات وعايز تنبهه لحاجة أو تثبتله وجهه نظرك في موضوع معين فتقول الكلام بحروف كبيرة كأنك بتقوله بصوت عالي، وده بالظبط اللي بتعمله الحروف الكبيرة وسط الكلام العادي اللي بنكتبه، فهي عبارة عن طريقة مطبوعة، بتنقل نفس مجموعة الإشارات اللي ذكرناهم بس على الورق.
ولنفس السبب فيه عدد من الكلمات الفردية اللي بيتم إستخدامها كتير في الإعلانات زي WIN و FREE، واللي دايمًا بتتكتب بحروف كبيرة، أو الكلمات اللي بتبقى مكتوبة على إشارات في الشارع أو في الأماكن العامة زي EXIT وCAUTION و WC، كلها كلمات دايمًا بالحروف الكبيرة؛ عشان ينبهوا لحاجة لليافطة.

لغات تانية؟

وأخيرًا اللغة الإنجليزية مش هي الوحيدة اللي عندها حروف كبيرة وحروف صغيرة، معظم اللغات اللي حروفها إشتقت من الحروف اللاتينية، هي كمان عندها الحروف الكبيرة والصغيرة، زي الألماني، والفرنساوي، والإيطالي، وغيرهم كتير.
لكن على الجانب الأخر، فيه عدد كبير من اللغات مفهاش اللغبطة بتاعة الأحجام دي، والحروف هناك أسرة واحدة في نفس المستوى الطولي، وعلى رأسهم العربية، وده معناه إن كل اللغات اللي بتستخدم الحروف العربية، هي كمان مبتستخدمش حروف كبيرة زي اللغة الفارسية، والأوردية، ولغات تانية كتير زي اليابانية والصينية والكورية والتايلاندية.