لكل دولة على مستوى العالم مُعتقداتها وقوانينها الخاصة، والقوانين دي من المفترض إنها في النهاية تكون لمصلحة الشعوب، وللسلامة العامة والأمن القومي، لكن الغريب إن في عدد كبير من الدول أصدروا قوانين بمنع أشياء غريبة جدًا، تحس إنها ملهاش أي أسباب منطقية، وعلى الرغم من كده، القوانين دي بالفعل سارية وبيتم تطبيقها على كل المواطنين، بل وكمان على أي شخص بيزور البلد وهيقيم فها لفترة، والعقوبات ممكن توصل بالسجن الطويل، أو بالغرامات المالية الضخمة.
كوريا الشمالية (ممنوع مشاهدة القنوات الأجنبية)
الحكومة في كوريا الشمالية مُتحكمة بصورة تفوق الوصف في كل ما يتعلق بالإعلام والبرامج التلفزيونية، والتلفزيون هناك هو حرفيًا مِلك ليهم، وتقدر تقول كده إن هما المُتحكمين بالريموت، وبيختارلولك تتفرج على إيه، وما تتفرجش على إيه، فممنوع تمامًا إنك تتفرج على أي برامج أو قنوات أجنبية، وحتى لو حاولت، فيؤسفني أقولك إنك مش هتعرف؛ لأن كل اللي متاح على التلفزيون الكوري هما أربع قنوات محلية فقط ومفيش قدامك أي إختيارات تانية.
ومش القنوات الأجنبية بس هي اللي ممنوعة داخل كوريا، ده حتى مجال الإعلانات محكوم من قبل الحكومة، والمنتجات العالمية ممنوع إنه يتم نشرها في أي مجلات محلية أو على التلفزيون، أما بقى بالنسبة لـ المجلات هناك، فهما نوعين بس، سياسي وتعليمي، وتقريبا كده كل شئ ممكن يكون سبب في إنك تنفتح على العالم خارج كوريا الشمالية هيكون ممنوع، وحتى الهواتف المحمولة، مفيش في كوريا غير فئة قليلة جدًا اللي بيحملوها، وحتى دول محظورعليهم إنهم يعملوا أي مكالمات دولية.
ومن الجدير بالذكر إن كوريا الشمالية هي واحدة من الدول اللي مابتعترفش تمامًا بالأديان؛ وعشان كده من المحظور هناك إنك تتكلم عن أي معتقد ديني أو حتى إنك مثلاً تشتري حاجة ليها علاقة بأي إحتفال ديني إطلاقًا.
ماليزيا (ممنوع استخدام اللون الأصفر)
“ماليزيا Malaysia” بالرغم من كونها دولة صناعية من الدرجة الأولى ومُصنفة كـ أحد أرقى الدول في جنوب شرق آسيا، إلا إن ده ما منعهاش من إنها تتورط في واحد من القوانين الغريبة جدًا، وفي أواخر عام 2015 قررت الحكومة الماليزية حظر ارتداء أي تيشيرت أصفر عليه كلمة “بيرسيه Bersih 4” بل إنها منعت ارتداء أي ملابس أو أحذية أو شنط أو غيرها يكون لونها أصفر وعليها الكلمة ده من أساسه.
والفكرة إن المعارضة في ماليزيا اعتادوا الخروج في احتجاجات ضد الفساد الحكومي وهما لابسين الشكل ده من التيشيرتات، وبالفعل تم القبض على عدد من المحتجين بسبب احتاجهم، ولكن لمجرد ارتدائهم التيشيرت بالشعار اللي عليه، وشاع وقتها إن أي حد هيلبس أصفر في البلاد هيتم القبض عليه.
قرية سيليا – إيطاليا (الموت ممنوع)
أصدرت قرية “سيليا Sellia” في إيطاليا قانون غريب جدًا في عام 2015، الحظر كان بمثابة مرسوم رسمي من عمدة البلدة، والقانون معروف إعلاميًا بإسم (ممنوع الموت)، وطبعًا مش المقصود هنا المعنى الحرفي للجملة، ولكن المقصود إنهم بيمنعوا الناس قدر الإمكان من إنها تُصاب بالأمراض وخصوصًا الأمراض المُعدية.
القرار مبدئيًا سببه إن البلدة تحث الناس على إهتمامهم بصحتهم في المقام الأول، أما بخصوص السبب الرئيسي للقرار، فهو إن في سنة 1960 كان عدد سكان البلدة حوالي 1300 شخص، وفي 2015 كل اللي اتبقى منهم حوالي 537 فقط، ومعظمهم أعمارهم فوق الـ 65؛ وعشان كده كان البلدة حريصة تمامًا على الحفاظ على أعداد السُكان، وأي فرد هناك مش هيلتزم بعمل الفحوصات الطبية بشكل منتظم هيتعرض لغرامة قدرها 10 يورو سنويًا.
ولكنه دلوقتي منتشر في عدد من الدول الأوروبية واللي بيعانوا من قلة في تعدادهم السكاني بدأو يقرروا قوانين مشابهة.
الدنمارك (مش هتختار إسم طفلك بمزاجك)
لو كنت موجود داخل الأراضي الدنماركية ورُزقت بمولود جديد، مش مسمحولك إنك تختار إسمه على مزاجك، القانون الدنماركي صارم جدًا فيما يتعلق بإختيار أسماء المواليد.
داخل الدنمارك مسموح فقط للأباء إن هما يختاروا إسم المولود من قائمة وضعتها الحكومة، وبتضم 7000 إسم، ولو معجبكش ولا إسم من الـ 7000 إسم فحضرتك كده داخل على مشاوير كتيرة، القانون هناك بيلزمك إنك تقدم في البداية طلب وتاخد الموافقة عليه من المؤسسة التابعة لديانتك، وبعد كده بيتراجع على الإسم من قبل مسؤولين في الحكومة، وبعد اللفة دي فيه إحتمال كبير إن الإسم يترفض؛ لأن من بين 1100 إسم كل سنة بيترفض حوالي 20% منهم بيترفض.
كندا (ممنوع استخدام مشايات الأطفال)
في كندا والحاصلة على المركز التالت في التعليم على مستوى العالم، فمن الطبيعي إن الدولة تكون بتسعى للاستفادة من أي أبحاث جديدة أُثبتت صحتها بالتجارب، وبالفعل تم إصدار قانون بحظر بيع مشايات الأطفال في 7 أبريل سنة 2004؛ وده لأن الأبحاث أثبتت أضرار المشايات على الأطفال، وإن نتائجها السلبية على الطفل أكتر من إيجابياتها. وبفرض أن أي أسرة عندها مشاية أطفال قديمة مثلاً وفكروا يبيعوها داخل البلاد، بيتعرضوا لغرامة ضخمة جداً تصل لـ 100 ألف دولار، وبتعتبر كندا هي الدولة الأولى في العالم اللي بتحظر بيع واستيراد مشايات الأطفال، وكنتيجه للقرار ده اتجه معظم الأباء للطرق القديمة في تعليم أولادهم المشي.
الصين (ممنوع إستعمال زهور الياسمين)
في عام 2011 ذاع صيت زهور الياسمين بين رواد مواقع التواصل الإجتماعي بإنها دليل على الإنتفاضات والتغيير، ولو غصون الزيتون بتعني السلام، فأزهار الياسمين بتعني الرغبة في التغيير. لما الموضوع بقى إتنقل للصين، الحكومة أخدت قرار غريب جدًا، وده في محاولة منهم لمنع أي إضطرابات أو تمرد ممكن يحصل داخل الدولة، والقرار ده مكنش إنها تنشر قوات آمن في الشوارع مثلاً أو تحكم القبضة الأمنية، ولكن اللي عملوه إنهم منعوا تداول زهور الياسمين داخل البلد.
أينعم هو تصرف غير منطقي بالمرة، لكن الصين بالفعل عملت كده، إجتمعت الحكومة مع أصحاب مشاتل الورد ومنافذ البيع وخلتهم يوقعوا على أوارق مفادها إنهم يمنعوا تداول زهور الياسمين تمامًا أو حتى زرعها، والمُدهش أكتر إنهم منعوا كمان رسم زهور الياسمين أو حتى إنك تسمع أغنية بيتقال فيها كلمة زهور الياسمين.
سنغافورة (ممنوع تطير طيارة ورق)
بما إننا بنتكلم عن القوانين والغرامات فمينفعش منتكلمش عن بلد الغرامات ألا وهي سنغافورة، ومن كتر ما سنغافورة مشهورة بغرامتها، فللهدايا التذكارية الموجودة في البلد مطبوع عليها عِبارات خاصة بالغرامات والجرائم اللي بيعاقب عليها القانون، يعني زي ما الهدايا التذكارية في مصر على سبيل المثال عبارة عن تحف فرعونية وتيشيرتات مطبوع عليها أهرامات وأشياء من هذا القبيل، في سنغافورة بقى ممكن ترجع ب تيشيرتات أو لوحات أو مجات كلهم مطبوع عليهم أشهر الجرائم اللي بيعاقب عليها القانون، وتحت كل فعل محظور هتلاقي تمن الغرامة اللي مُطالب بدفعها.
ومن أغرب الأشياء المحظورة في سنغافورة، هو إنك تطير طيارة ورق في شوارع سنغافورة، ولك أن تتخيل إن الطيارة الورق واللي تكلفتها لا تتعدى دولار واحد لو لعبت بيها هناك هتكلفك غرامة 5000 دولار.
ومن أكتر الصور اللي بتلفت نظرنا في أي دولة هو شكل الحمام الكتير اللي بيبقى متجمع في الميادين حوالين المعالم السياحية وشكل الناس وهي واقفة بتأكله، بس للأسف حركة زي دي في سنغافورة هتكلفك 500 دولار، ولو كنت في مكان عام لازم تاخد بالك من كل حركة لأن كل خطوة غلط هتعرضك لعقوبة، فمثلًا لو أزعجت شخص بآلة موسيقية هيكلفك غرامه 1000 دولار، والبصق في الطريق غرامته هو كمان 1000 دولار، ولو فكرت تسرق واي فاي وتدخل عليه بأي طريقة غير مشروعة فأنت مُعرض للسجن 3 سنين وهتدفع غرامة 10000 دولار.
بنجلاديش (الأكياس البلاستيك ممنوعة)
فيه دول كتير على مستوى العالم بتحاول إنها تحافظ على البيئة قدر الإمكان، وبنجلاديش كانت واحدة من الدول اللي سعت لكده، لكنها دعمت الموضوع بقوانين صارمة، وبالفعل الحكومة في بنجلاديش قامت بحظر الأكياس البلاستيكية المصنوعة من مادة البولي إيثيلين، واللي بيتم استخدامها لمرة واحدة فقط.
والسبب الرئيسي للحظر كان إن الاكياس البلاستيك بتعلق في أنظمة الصرف وبتصعب من تصريف المياه أثناء الفيضانات اللي بتضرب البلاد، والمنع جه في البداية للمناطق الساحلية والفنادق والمطاعم، لكن بعد كده توسعت دائرة إنتشاره، وفي عام 2002 كانت بنجلاديش من بين أوائل الدول اللي حظرت استخدام الأكياس البلاستيكية داخل الدولة بالكامل.
وبالرغم من أن الحظر ده يبان غريب، إلا أنه حظر العالم كله محتاج يبدأ يدرسه عشان يطبقه بالفعل، البلاستيك الكتير مشكلة العالم كله بيواجهها النهارده، ولو مقدرناش نحل مشكلة التلوث البلاستيكي البيئة بتاعتنا كلها ممكن تتعرض للخطر.