القطط كائنات واسعة الانتشار، موجودة في كل مكان تقريبًا وحتى لو سافرت الصحرا فبرضو فيه احتمال إنك تقابل القط اللي بيعيش هناك.
من الوهلة الأولى كده ممكن تفتكر إنه ده قط من القطط اللي بنربيها في البيت؛ وده لأنه شبهها في الشكل والحجم إلا إن قط الرمال بيعيش في ظروف مناخية قاسية وجافة ودرجات حرارة صعب جدًا على القطط المنزلية؛ ولأن موطنه الأصلي هو الصحراء هتلاقيه بيتميز بصفات جسدية مختلفة عن القط المنزلي عشان تساعده إنه يتكيف ويقدر يعيش في بيئة صعبة زي البيئة الصحراوية.

قدرته على التموه

يعتبر قط الرمال من الثدييات اللاحمة يعني اللي غذائها بالدرجة الأولى بيعتمد على اللحوم، وبينتمي لفصيلة السنوريات زي الأسود والنمور والفهود، وبيوصل وزن القط البالغ من قط الرمال حوالي 3,5 كيلو جرام، وطوله يتراوح من 45 لـ 57 سم من غير الذيل اللي بيتراوح طوله لوحده من 28 لـ 35 سم.
وبالرغم من أن قط الرمال وزنه وطوله متشابهين من القط المنزلي، إلا أنه مشهور بلونه الأصفر الرملى اللي بيخليه أقل وضوح وسط الرمال وده بيساعده بشكل كبير في عملية التمويه والاختباء من مفترسيه.

ومن الأمور المثيرة عنه بخصوص التموه، أنه معتاد على الحركة وهو مقرب جسمه من الأرض، والغريب إنه بيقدر يعمل كده وهو محافظ على سرعته اللي بتوصل لـ 40 كم في الساعة.
وبيتميز قط الرمال بالخط البني المائل للأحمرار اللي بيمتد على جانب كل عين، والخطوط الدائرية الغامقة اللي الموجودة على آخر الذيل وعلى أقدامه، وكمان رأسه العريض نسبيًا مقارنة بالقط المنزلي.

قط الرمال زي ما واضح من إسمه كده بيعيش بشكل أساسي في الرمال، فهنلاقية بيعيش في 3 صحاري رئيسية ألا وهم، صحراء أفريقيا في بلاد زي الـ “المغرب، والجزائر، والنيجر، وتشاد، ومصر”، وهنلاقيه كمان في صحراء شبه الجزيرة العربية في “السعودية، واليمن، والكويت، والإمارات”، وأخيرًا في وسط آسيا في الـ”تركمانستان، وإيران، وباكستان، وأفغانستان”.

سلالات القط الرملي

بيتفرع لـ 6 سلالات لقط الرمال، ولكن نظرًا لأننا مكنش عندنا معلومات عنه قبل سنة 2015، ونظرًا كمان لصعوبة دراسة حياته، لقلة الإمكانيات وصعوبة الدراسة في البيئة الصحراوية اللي بيعيش فيها، فإحنا للأسف منعرفش غير معلومات بسيطة عن سلالتين فقط ألا وهما، سلالة “مارجريتا مارجريتا Felis Margarita Margarito” ودي مشهورة بحجمها الصغير ولونها الأصفر الرملي أو البيج، ودي اللي موجودة في صحراء أفريقيا ودي السلالة الأشهر والأكثر دراسة لخصائصها.

والسلالة التانية “مارجريتا ثينوبيا felis margarita thinobia” ودي أكبر في الحجم وبتميل للون الرمادي، والخطوط في جسمها لونها أبهت وأقل بروز من الفصيلة الأولى، ودي اللي موجودة في صحراء آسيا وشبه الجزيره العربية، والسلالة دي أقل إنتشارًا ولسه منعرفش عنها معلومات كتير.

الفرو السميك في الصحراء

تعيش قطط الرمال في درجات حرارة تتعدى الـ 40 درجة مئوية في النهار، وبتنخفض في ليالى الشتاء لـ25 درجة مئوية تحت الصفر، وأوقات درجة حرارة الرمال بتوصل لـ 80 درجة مئوية في النهار، ودي درجة كفيلة إنها تحرق باطن أقدامها، إلا إن ربنا سبحانه وتعالى وهبها فرو سميك بيبطن قدمها؛ فيحميها من درجات الحرارة العالية للرمال، ومش بس كده، لأ كمان بيساعدها على النجاة من المفترسين؛ لأنه بيبقى صعب مع كمية الفرو السميك اللي بيبطن قدمها إنها تسيب وراها آثار أقدام على الرمال، فبتقدر تهرب من مفترسيها بعد ما بيفشلوا إنهم يتتبعوا أثرها.
ومش بس باطن أقدامها اللي بيغطيه طبقة من الفرو السمك، لأ ده جسمها كله، فرو القط السمك بيعمل كعازل لدرجات الحرارة العالية والمنخفضة بحيث إنه يقدر يحافظ على برودة جسمه في الحرارة العالية، وكمان يحافظ على جسمه دافئ في برودة الليل.

السمع الحاد

من المدهش إن كائن صغير الحجم بيعيش في بيئة ظروفها صعبة من حيث درجات الحرارة وندرة الأكل وأكيد كمان الماء، إلا أن متوسط عمره بيوصل لـ 13 سنة، يعني تقريبًا زي القطط الأليفة اللي بيتوفر لها الأكل والماء ودرجات الحرارة المعتدلة، أما بالنسبة لدرجات الحرارة العالية جدًا أو المنخفضة جدًا اللي ميقدرش يستحملها جسد قط الرمال، فـ إحنا هنلاقيه كائن خبير في الحفر لأعماق كبيرة تحت الأرض لمسافة كفيلة إنها تعزله عن درجات الحرارة القاسية.
المشكلة التانية اللي هتقابله هي بحثه عن الغذاء والمياه، قط الرمال بيعتمد بصورة أساسية على اللحوم، فمشكلة ندرة الزرع والنباتات في البيئة الصحراوية مش أزمة بالنسباله، ولو بصينا لمصادر اللحوم اللي بيعتمد عليها في غذاؤه، فـ إحنا منقدرش نعتبره كائن انتقائي في حميته الغذائية، بمعنى أصح، هو بياكل أي حاجة تيجي قدامه، فئران ماشي، زواحف وسحالي ماشي، حشرات وصراصير وعناكب تمام، أرانب وطيور ميضرش، حتى إن التعابين والأفاعي السامة مسلمتش منه، وعلى الرغم من أنها حرفيًا بتاكل أي حاجة إلا إن الـ “أي حاجه دي” مش متوفرة بكثرة قدامها، لكنها بتقدر تتغلب على المشكلة دي بمساعدة ودانها الكبيرة.

قطط الرمال بتمتلك أذن كبيرة الحجم وقناة سمعية أعرض مرتين من القطط المنزلية، وهنا أحنا بنتكلم عن الأذن من جوا مش شكلها من بره القناة السمعيه وظيفتها إنها بتنقل الموجات الصوتية من صوان الأذن اللي هو الجزء الظاهر من الودان لطبلة الأذن ومنها للأذن الوسطى ثم للأذن الداخلية وأخيرًا للعصب السمعى، وبسبب الاختلاف في حجم القناة السمعية ده فكمية الصوت اللي بتدخل عند قط الرمال أعلى بـ 5 مرات من القطط المنزلية، وعشان تعرف قد إيه هي سمعها حاد، يكفي أقولك إنها تقدر تسمع صوت حركة حشرة على بعد نص كيلو متر؛ ولأنها بتقدر تلقط أقل الترددات ده بيخليها تسمع أقل حركة لصوت فريستها، سواء فوق الأرض أو تحتها، ومهما حاولت الفريسة إنها تحافظ على هدؤها وتصدر أقل صوت، إلا أنها بتفشل في الهروب من مخالب قط الرمال.

مخلوق انعزالي

أما بالنسبة لمشكلة ندرة المياه، فهي ممكن تقعد بالأسابيع من غير ما تشرب وبتعتمد فقط على السوائل اللي في جسم فرائسه.
وقط الرمال من الحيوانات الانعزالية باستثناء موسم التزاوج، ومن الصعب تلاقيهم في مجموعة باستثناء وجود الأم مع صغارها.
ومع وجودهم بأعداد قليلة في مساحات شاسعة، بتظهر ميزة أذنها الكبيرة للمرة تانية، فهي مش بس بتلقط تحركات فرائسها، لأ دي كمان بتلقط الأصوات البعيدة اللي بتصدرها باقي القطط من فصيلتها بغرض التزاوج، لو كان القط محظوظ كفاية إنه يعثر على شريك ويتزاوج معاه بنجاح، فالأم بتضع عادة من 2 لـ 4 هررة، وفي بعض الأحيان النادرة جدًا ممكن توصل لـ8 هررة بعد فترة حمل تترواح من 59 يوم لـ 67 يوم.

ووزن الهر عند ولادته تقريبا 39 جرام، وبتوصل لـ تلت حجم القط البالغ في خلال 6 شهور فقط، وبمرور عام بتبقى قادر إنه يعتمد على نفسه بشكل كلي.
وبيختلف موسم تزاوج كل قط على حسب مكان تواجده، يعني السلالة اللي موجودة في الصحراء العربية بيبدأ موسم التزاوج عندها في شهر يناير ويتنهي في شهر إبريل، وهو نفس الشهر اللي بيبدأ فيه موسم تزاوج السلالة اللي بتعيش في تركمستان، أما بالنسبة لباكستان فـ بيستمر من بداية شهر سبتمبر لنهاية شهر أكتوبر فقط، وعادة بتتزاوج القطط مرة وحده بس في السنة، لكن ممكن تزيد لأكتر من مرة بناءًا على الظروف المناخية والرعاية اللي بتتلقاها من مربيها.

تربية سيد الصحراء

بالرغم من شكل قط الرمال اللطيف، إلا أنه مازال قط بري من ضمن 38 فصيلة قطط برية، وبعض الدول بتجرم تربية القطط البرية، وتاني مشكلة ممكن تعوق تربيتك له، هي مشكله الجو والظروف البيئية اللي متعود يعيش فيها، قط الرمال بيحب يعيش في الوديان الصخرية والسهول الجافة فمش هيبقى مرتاح أنه يعيش في مكان زي البيت أو الحديقة اللي حوالين البيت، ونقطة جفاف الجو دي مهمة جدًا لحياة القط، تواجد الرطوبة في الجو، بتخلى القط أكثر عُرضة لأمراض الجهاز التنفسي.
نيجي بقى لمشكلة تالتة، وهي الأكل و المياه، بالنسبة للأكل، عشان تُشبع عنده غريزة الحفر فإنت يستحسن انك تدفن شرائح اللحم أو بعض القوارض في الرمل ولأنه ممكن يقعد بالأسابيع من غير مياه ويعتمد بشكل أساسي على امتصاص السوائل من جسم الفرائس، فمش هينفع تقدم له أكل مجفف ولازم توفر له أكل غني بالسوائل.

ولو فاكر أنها كدا اتحلت، للأسف لسه عندك مشكلة، إن قطط الرمال كائنات مش اجتماعية وأظهرت بعض السلوك الغريب وبعض القلق والتوتر في وجودها حول البني آدمين.