معظم منتجات التطهير والتعقيم، سواء ديتول أو غيره، بنلاقيهم دايمًا في إعلانتهم بيستخدموا جملة شهيرة جدًا، بتتكرر من وقت للتاني، وهي إن المُنتج بيقتل 99.9% من الجراثيم.
والسؤال البديهي اللي دايمًا بنسأله، هو ليه رقم 99.9% تحديدًا اللي بيتم إستخدامه، ليه مش 100% مثلاً، وهل فعلًا منتج الديتول بيقتل الجراثيم كلها ماعدا جرثومة واحدة زي ما البعض بيقولوا، ولا الموضوع ليه تفسير تاني؟

البداية

الديتول يعتبر واحد من أشهر منتجات التعقيم والتطهير في العالم كله، وهو منتج من منتجات شركة “ريكيت بنكيزر Reckitt Benckiser” الشركة العالمية الرائدة في مجال الصحة والنظافة، وبداية ظهور الديتول وإستخدامه لأول مرة كان بغرض تنظيف وتطهير الجلد أثناء العمليات الجراحية، والديتول وقتها بالفعل أصبح علامة تجارية موثوق فيها بالنسبة للدكاترة والطاقم الطبي بوجه عام، وبعد كده إنتقل للإستخدام العادي في المنازل والبيوت.
والجملة بتاعه هذا المنتج بيقضي على 99.9% من الجراثيم، فـ العبارة دي للأسف وغيرها من العبارات اللي بيتم إستخدامها فى تسويق المطهرات، هي عبارة غير دقيقة على الإطلاق، بل إنها كمان ممكن تكون عبارة مُضلِلة.
ومعظم المُستهلكين بيتكون عندهم تصور خاطئ عن قدرة المنتجات دي في التطهير والتعقيم، بسبب الجملة المُبهمة دي، يعني أنا لو سألتك دلوقتي، وقولتلك إيه اللي إنت فاهمه من جملة 99.9% من الجراثيم؟، غالبًا هتقولي إن لو في سطح عاوزين نطهره أو نعقمه، وليكن ترابيزة مثلاً، وبعدين رشينا عليها ديتول و مسحناها، اللي هيحصل إن كل الجراثيم والكائنات الدقيقة اللي عليها هتختفي تمامًا، ويادوب بس هيتبقى على سطحها كمية ضئيلة لا تُذكر من الكائنات، واللي هي بتمثل 0.01% اللي بيقولوها في الإعلان، صح كده؟
الحقيقة مش صح ولا حاجة، الكلام ده مش مظبوط إطلاقًا، ومش هو ده أصلا المقصود بجملة المنتج بيقضي على 99.9% من الجراثيم.

فكرة العمل

والترابيزة اللي إنت لسه ماسحها بديتول دي، ممكن يبقى مازال موجود عليها عدد لانهائي من الجراثيم والكائنات الدقيقة، وعايشين حياتهم فوق السطح عادي ولا أكن فيه حاجة حصلت.
الديتول بيدخل في تصنيعه مواد فعالة كتيرة جدًا، من ضمنها الكحول وغيره من المركبات، وعنده القدرة إنه يقضي على البكتريا والفيروسات والفطريات، لكن مربط الفرس في الموضوع هو إنه ما بيقضيش على كل أنواعه، ولكنه بيقضي على معظمهم، طيب الكلام ده معناه إيه؟
معناه بالعربي كده، إنه لو فيه سطح ترابيزة مثلاً ، عليها كل ما لذ وطاب من الجراثيم، ولنفترض مثلاً إن أنواع الجراثيم اللي عليها إسمها← A و B و C و D و E و F و G، وبعديها جبنا ديتول ومسحنا بيه الترابيزة، اللي هيحصل هو إن الديتول هيقضي على الأنواع A و B و C و D و E و F و G، لكنه النوعين G مش هيقضي عليهم؛ وده لأن التركيبة بتاعته مش بتحتوي على مادة تقدر تقضي عليها.
لكن لو فيه ترابيزة تانية عليها الأنواع من A لحد ← B فقط، الديتول هيقضي على 100% منهم عادي؛ لأن تركيبته فيها مواد فعالة بتقضي عليهم.
أما بقى لو في ترابيزة تالتة مفيش عليها غير النوعين G فقط، الديتول مش هيقضي على أي حاجة على الترابيزة ونسبة نجاحه في الحالة دي هتكون 0%.
إذا اللي عاوزين نقوله من القصة الطويلة العريضة دي، هو إن الديتول بيقضي على 99.9% من (أنواع) الجراثيم، وليست 99.9% من (كميتهم) زي ما البعض معتقد.
وبالمناسبة فيه عدد من الإجابات الغريبة، منتشرة بخصوص موضوع الـ 99.9% ده، لكنها طبعًا مش مظبوطة، يعني فيه أشخاص مثلاً بيقولوا إن ديتول بيذكروا رقم 99.9% تحديدًا لأنهم لو قالوا 100% فممكن حد يقاضيهم، ويكون ده مدخل لأي شخص عاوز يسبب مشاكل للشركة؛ لأن لو شخص مثلاً إستخدم الديتول عشان يطهر بيه سطح أو شيء معين، لكن بالرغم من كده الجراثيم فضلت موجودة، وتسببت في إنتشار عدوى، فبكده الشركة هتكون السبب، لكن طبعًا الأراء دي كلها مش مظبوطة ومفيش أي دليل حقيقي عليها.

هل كل المحاليل المطهرة متشابهة

هل كل المحاليل المُطهرة بإختلاف أنواعها ما هي إلا محلول واحد زي ما معظم الناس معتقدة، وإن الموضوع مجرد بس إختلافات إما في اللون أو الرائحة أو شكل العبوة أو نسبة تخفيف المطهر مثلاً؟
الحقيقة الموضوع برضو مش كدا خالص؛ وده لأن الاختلاف الحقيقي بين أي محلول والتاني هو إختلاف كُلي في تركيبته الكيميائية، بالإضافة بقى للاختلافات الظاهرية الأخرى؛ لأن المُطهرات عمومًا بيدخل في تركيبها عدد ضخم من المواد الكيميائية، والمكونات النشطة، زي مثلاً الأمونيوم الرباعي، وبيروكسيد الهيدروجين، وأيونات الفضة، واليود، ومركبات الكلول، والأحماض، وطبعًا الكحول، وغيرهم من المركبات.

الشاهد في الموضوع، إن كل مادة أو مركب من دول، بيكون له فاعليتة على سلالات مختلفة من الميكروبات، فهنلاقي مواد كيميائية بتكون أكثر فعالية ضد الفيروسات زي الأنفلونزا، والبعض الآخر فعال ضد البكتيريا الموجودة والمنتشرة في الأماكن اللي بنحضر فيها الأكل، وفيه بعض المطهرات بتشتغل ضد الكائنات اللي بتقدر تقاوم المضادات الحيوية، ودي اللي بيتم استخدامها في أماكن الرعاية الصحية.
إذًا لكل مكان بيئتة الخاصة اللي هتحتاج مطهر يكون مناسب ليها، وماينفعش تمامًا يبقى فيه منتج واحد هو المطهر الوحيد اللي بنستخدمه فى كل مكان؛ لأن لكل مكان من دول الأنواع والسلالات اللي هتنمو فيه، ولكل نوع منهم هتكون فيه المركبات الخاصة اللي هتقدر تقضي عليه، ويمكن ده السبب برده اللي بيخلي منتجات الديتول على سبيل المثال، بتتعدد في أنواعها داخل حيز المنزل؛ لأن كل نوع بيناسب وظيفة معينة، وكذلك مكان معي. ن
طب هل معنى الكلام ده إن مفيش مطهر واحد قادر إنه يقضي على كل الجراثيم والبكتريا والفيروسات والكائنات اللي عاملة مشاكل دي، بنسبة 100%، في الواقع المُطهرات والمعقمات الكيميائية المسجلة لدى وكالة حماية البيئة هي دي الأنواع الوحيدة من منتجات التعقيم اللي نقدر نجزم إنها بتقتل كل مسببات الأمراض الموجودة على الأسطح، لكن المُعقمات دي مش متاحة في الأسواق.

هل الديتول بيقتل فيروس كورونا؟

وبما إننا بقى ومع الأسف مازلنا بنعاني من انتشار فيروس كورونا، وبالأخص في الفترة الحالية بعد ما تم الإعلان عن موجة تانية من الفيروس، فالسؤال اللي تم طرحه كتير من بداية إنتشار فيروس كوفيد-19، هو هل منتج ديتول قادر فعلاً إنه يقتل فيروس كوفيد-19، وإحنا هنا بنقصد بالتحديد كوفيد19- مش فيروسات الكورونا بوجه عام، واللي أكدته شركة ديتول وفي أخر تحديث ليهم على موقعهم إن فيروس كورونا المستجد (كوفيد -19) سلالة جديدة ولسه متوفرش عالميًا إنها تكون متاحة للاختبار التجاري، لكنهم بيستندوا على إن منتجات ديتول أثبتت فعاليتها ضد سلالات من فيروس كورونا، وبما إن هيكل فيروس كوفيد-19 بيتشابه بنسبة كبيرة مع فيروسات تانية تم اختبارها واللي كان من ضمنهم فيروس السارس SARS-CoV”، وفيروس “كورونا الشرق الأوسط MERS-CoV” فالشركة بتتوقع إن نفس المنتجات دي هتكون فعالة بنسبة كبيرة في القضاء فيروس كورونا المستجد، وأن المواد الفعالة في منتجات الديتول بتقدر تدمر الغلاف البروتيني أو الدهني المُحيط بالفيروس، وبالتالي بتقضي علي فعاليته بسهولة.
وأخيرًا اللي لازم نعمله وخصوصًا في الفترات الحالية، هو إننا نهتم أكتر بالنظافة بوجه عام لكل الأسطح المحيطة بينا، ونستخدم لكل مكان المطهر الخاص بيه.