من أول ما الإنسان عرف ركوب البحر بدأ يستفيد من الموضوع ده في الأشياء الضرورية والمفيدة، وده زي صيد الأسماك واكتساب الرزق والسفر بين البُلدان وبعضها، لكن شوية شوية، بدأ تفكير الناس تجاه السفن يتغير، ووظيفة السفينة اتغيرت هي كمان وأصبحت المراكب والسفن مع مرور الوقت، وسيلة من وسائل التنزه والاستمتاع، ولحد دلوقتي الموضوع طبيعي ومفيهوش أي حاجة مُلفتة. لكن المُلفت فعلًا إن فيه عدد من الأشخاص وبين قوسين كده (الأثرياء) بدأوا يدفعوا ملايين إن لم يكن مليارات الدولارات؛ عشان يمتلكوا مجرد مركب، لكن المركب ده مش أي مركب.

يخت البحار السبعة seven seas

يخت البحار السبعة seven seas، هو واحد من أغلى اليخوت في العالم، وهو من تصميم شركة Oceanco، بيمتلكه المخرج المعروف “ستيفن سبيلبرغ Steven Spielberg”، وبيبلغ طوله حوالي 86 متر، وبيتميز بتصميم داخلي وخارجي غاية في الروعة.
فبالنسبة للتصميم الداخلي، هنلاقي اليخت بيتميز بتصميم معاصر بيمزج بين أجود أنواع الأخشاب والأقمشة والألوان الطبيعية، وبيقدَر اليخت إنه يستوعب 14 ضيف بكل أريحية، واللي بيقيموا في 7 حجرات منفصلة منهم الجناح الرئيسي وغرفتين لكبار الزوار، وبيقوم على خدمتهم 26 شخص من طاقم العمل.
أما بالنسبة للتصميم الخارجي، فهنلاقي على ظهر اليخت تحديدًا على السطح الخلفي، حمام سباحة لا متناهي، ودا نوع من أنواع حمامات السباحة المُصمم خصيصًا؛ عشان يديك إحساس وكأنك جزء من مياه المحيط اللي حواليك، ونفس الحمام دا ممكن يتحول بسهولة وفي أي وقت لمهبط للطائرات الهليكوبتر أو منطقة ترفيهية لأي غرض.
وطبعًا منقدرش ننسى الكماليات الأخرى اللي بتزود من قيمة اليخت وسعره، زي على سبيل المثال لا الحصر صالة الألعاب الرياضية، والسينما، والجاكوزي، وساحة الرقص، والمصعد، وغيرهم، وطبعًا مش هتكون مندهش لما تعرف إن سعر يخت زي دا حوالي 200 مليون دولار ، لكن هتندهش أكيد لما تعرف إن المخرج Steven Spielberg باع اليخت اللي طوله 86 متر؛ لأنه ببساطة وزي ما صرح محتاج واحد أكبر شوية.

آلـ سعيد Al said

يخت آلـ سعيد Al said يعتبر واحد من أغلى اليخوت في العالم، لكن بالرغم من كده بيتميز بهالة كبيرة من الغموض والخصوصية ومش معروف عنه معلومات كتير.
اليخت مِلك لسلطان سلطنة عمان الراحل (قابوس بن سعيد)، وبناه شركة “لورسن Larsson” وهي شركة ألمانية لصناعة السفن، أما شركة”Espen Oeino International” فهي اللي صممته بشكل مذهل داخليًا وخارجيًا. اليخت إتسلم في عام 2008م، ووقتها كان ثاني أكبر يخت في العالم لكنه خسر بعد كدا اللقب دا، ووقت بناء اليخت أُطلق عليه اسم Project” sunflower مشروع دوار الشمس”، وهو نفس إسم يخت صغير كان ملك السلطان قابوس، واللي يخت آلـ سعيد اتبنى أساسًا عشان يكون بديل ليه.
وبيحتوى اليخت على 6 طوابق من المساحات الترفيهية وطوله حوالي 155 متر في حين إن عرضه 24 متر، أما بالنسبة لمواد صنع اليخت فهو مصنوع من جسم فولاذي وبنية علوية من الألومنيوم، وبتبلغ سرعته 22 عقدة بحرية يعني حوالي 45 كيلو متر في الساعة، وبيحتوي يخت آلـ سعيد على حمام سباحة، ومهبط طيارات هليكوبتر، وقاعة حفلات موسيقية بتستوعب فرقة مكونة من 50 عازف، أما طاقم عمل اليخت ف مكون من 154 شخص موجودين لخدمة 70 ضيف من ضيوف السلطان، وبيبلغ سعر يخت آلـ سعيد فهو حوالي 300 مليون دولار.

يخت دبي Dubai

أما يخت دبي بقى فهو واحد من أغلى وأكبر اليخوت في العالم، وزي ما هو واضح من إسمه بيمتلكه حاكم إمارة دبي الشيخ محمد بن راشد آل مكتوم، بيتكون اليخت دا من 8 طوابق بيوصل بينهم 3 مصاعد دا غير السلم اللولبي اللي بيعتبر جوهرة فنية في حد ذاته، وبيقدر يجمع نور الشمس ويوزعها بطريقة بديعة ومختلفة، أما طول يخت دبي فهو حوالي 160 متر وبيقدر يتسع لحوالي 115 فرد بيسعى لخدمهم وراحتهم طاقم عمل مكون من 88 شخص.
وبيتكون يخت دبي من 5 أجنحة مخصصة لكبار الشخصيات، بجانب جناحين مخصصين للمالك، ودول هتلاقيهم في الطابقين السادس والسابع، دا غير سطح كبير وواسع ساعات بيستخدم للنشاطات الاجتماعية، كمان اليخت بيقدم نشاطات مائية في صالات مكيفة، وهتلاقي عليه ملعب للاسكواش، ومهبط للطيارات الهليكوبتر، وحمامات سباحة، وجاكوزي، وصالة كبيرة مخصصة للسفرة، بخلاف الأركان المخصصة لتناول الطعام ومساحات الاستجمام تحت أشعة الشمس، والحقيقة إن يخت دبي مش دا إسمه الوحيد؛ لأنه بيطلق عليه أسماء تانية زي “بلاتينيوم Platinum” و”بانهاندل Panhandle”، وبيقدَّر سعر يخت دبي بحوالي 350 مليون دولار.

عزام Azzam

يخت عزام يعتبر واحد من أكبر وأسرع وأغلى اليخوت في العالم، بيبلغ طوله بالكامل حوالي 180 متر، ومن الأشياء الطريفة، هي إنه كان من المقرر قبل البدء في بناء اليخت دا إن الطول يكون 145 متر فقط، بس مع شوية حماس وتوفيق، طوله زاد حوالي 35 متر؛ وبكدا أصبح واحد من أطول اليخوت في العالم.
بيمتلك يخت عزام واحد من أفراد العائلة المالكة في الإمارات العربية المتحدة، وبيقال إن اليخت دا واحد من أكثر اليخوت تعقيدًا وتحدي في بنائه، فهنلاقي إنه استغرق حوالي 4 سنوات من العمل عليه في حوض بناء السفن الألماني Lürssen، لحد ما أصبح جاهز في إبريل 2013م، إشتغل على بناء اليخت دا حوالي 4000 شخص سجلوا 6 مليون ساعة عملل؛ ولتوضيح صعوبة الموضوع صرح البُنَاه إن اليخت لو كان بناه شخص واحد فقط كان المفروض يبدأ شغل فيه من عام 1737 قبل الميلاد.
وبتبلغ سرعة اليخت حوالي 31.5 عقدة أو ما يعادل 59 كيلو متر في الساعة، دا غير إنه بيتميز بتوربينات ومُحركين ديزل، بطاقة إجمالية بتبلغ 35 ألف كيلو وات، وده بيساعد اليخت إنه يتحرك بسرعة عالية حتى لو كانت المياه ضحلة، ما إحنا ميهمناش حاجة بالصلاة ع النبي دافعين وصارفين.
كمان بيتميز يخت عزام بالديكور والتصميم الفرنسي، فهو بيتسع لصالون رئيسي كبير ومفتوح وبيستقبل 36 ضيف للإقامة بيخدمهم حوالي 80 فرد، وأخيرًا بقى تكلفة اليخت حوالي 600 مليون دولار.

يخت شوارع موناكو Streets of Monaco

أما اليخت المذهل شوارع موناكو Streets of Monaco فهو عبارة عن مدينة متكاملة على ظهر يخت عملاق، صممته شركة Yacht Island Design البريطانية، على غرار مدينة موناكو الساحرة، فهنلاقيه بيضم معالم كتيرة مميزة من موناكو زي كازينو مونتي كارلو (the Monte Carlo Casino)، وفندق دي باريس (the Hotel de Paris)، ولا راسكاس (La Rascasse)، ومضمار سباق الجائزة الكبرى (the Grand Prix course)، وحتى حوض السباحة عليه بيشبه بشكل كبير شاطئ موناكو.
وبيضم اليخت أماكن إقامة لـ16 ضيف، بتختلف الأماكن دي في مساحتها، فهنلاقيها مثلاً بتبدأ بأجنحة متواضعة مساحتها حوالي 135 متر مربع، وصولا لأجنحة كبار الشخصيات واللي بتوصل مساحتها لحوالي 356 متر مربع، لكن من باب الإنصاف كل الغرف دي بتضم غرفة استقبال، وحمام، وغرفة ملابس، وغرفة نوم، وشرفة لكن بتتمتع أجنحة كبار الشخصيات بحاجة زيادة شوية وهي وجود مكتب خاص.
وبيضم يخت شوارع موناكو مساحة مخصصة لطاقم العمل واللي بيوصل عددهم لحوالي 70 فرد.
أما الكماليات والرفاهيات (على أساس أن اللي فوق دا كله أساسيات يعني ما علينا)، هنلاقي اليخت بيحتوي على حمامات سباحة، وحدائق، وسينما، ومقاهي، وصالة استرخاء كبيرة (فيها مسبح سبا، وبار)، دا غير صالون مانيكير، وتصفيف الشعر، وأجنحة مساج خاصة، وغرف ساونا، ومكتبة، ولو ده مش كفاية، اليخت بيحتوي كمان على ملاعب كرة سلة وتنس، واللي بتستخدم وقت اللزوم كمهبط للطيارات الهليكوبتر، أما سعر يخت شوارع موناكو فهو حوالي مليار دولار.

إيكلبس Eclipse

وبالنسبة لثاني أكبر يخت على مستوى العالم فهو يخت Eclipse، واللي بيمتلكه الملياردير الروسي “رومان أبراموفيتش Roman Abramovich”، وبيبلغ طول يخت eclipse حوالي 162 متر، وبيتكون من 24 كابينة للضيوف بيقوم على خدمتهم طاقم عمل بيوصل لــ 70 فرد.
وبينفرد يخت Eclipse بعدد من المزايا اللي صعب تلاقيها في أي يخت تاني، فهنلاقيه عبارة عن حصن أمني قوي ملغم بأحدث تقنيات الاتصال والدفاع، زي مثلاً النظام اللي مهمته الكشف عن المتسللين وحماية اليخت من القراصنة والدخلاء، دا غير غرفة النوم الرئيسية وغرفة التحكم، والمطليين بطلاء مدرع ونوافذ مضادة للرصاص، وعشان اليخت يكون محمي ضد مصورو صحافة المشاهير أو باباراتزي من خلال درع من أشعة الليزر المضادة للتصوير.
وطبعًا اليخت مليان كماليات ووسائل ترفية، زي أحواض الاستحمام الساخنة، ومسبحين للاستجمام، والغواصة الصغيرة اللي بتقدر تنزل لعمق 50 متر تحت المياه، وطبعًا يخت زي دا هيكون عليه مهبط للطيارة الهليكوبتر، وبيقدَّر سعر يختeclipse بحوالي 1.5 مليار دولار.

هيستوري سوبريم history supreme

آخر يخت معانا هو يخت “هيستوري سوبريم history supreme”، واللي بيعتبر اليخت الأغلى في العالم على الرغم من أنه أقل في المساحة والرفاهيات من يخوت تانية، لكن سعره العالي دا لسبب تاني خالص هنعرفه حالًا. لكن قبلها لازم نعرف أن طول يخت history supreme حوالي 30 متر ، واستغرق بنائه أكتر من 3 سنوات، أما ملكيته فبتعود للمستثمر ورجل الأعمال الماليزي “روبرت نوك Robert Knok”.
وسبب أنه اليخت الأغلى في العالم هو دخول 100 كيلو جرام من الذهب في تصنيعه واللي نقدر بسهولة نشوفهم في منطقة تناول الطعام، والسطح، والقضبان، والسلالم، والمرسى، ومش كدا وبس ضيف على الكلام دا غرف النوم المغطاة بالبلاتينوم، دا غير الجناح الرئيسي بقى واللي بيتميز بجدار صخري نيزكي، وتمثال مصنوع من عظام Tyrannosaurus Rex الأصلية، أيوة زي ما قرأت كدا، غرفة النوم الرئيسية بها عظام ديناصور أصلية، تم الحصول عليها من ولاية أريزونا بالولايات المتحدة الأمريكية، وبتبلغ قيمة عظم فخذ الديناصور دا لوحدها حوالي 68000 جنيه إسترليني.
كمان على اليخت هتلاقي حوض Aquavista Panoramic Wall المائي اللي وزنه 68 كجم من الذهب عيار 24 قيراط دا غير واحدة من أندر الماسات في العالم؛ عشان كدا وأكتر هنلاقي اليخت دا الأغلى في القائمة وعلى مستوى العالم كمان، وبيقدر سعر يخت history supreme بحوالي 4.8 مليار دولار بس.