القرن| هل يعود وحيد القرن الأبيض من الانقراض؟

في 19 مارس 2018، أعلنت محمية “O.I.pejeta اول بيجيتا” الكينية عن موت آخر ذكر من حيوان وحيد القرن الأبيض الشمالي، القائمين علي المحمية قرروا قتله رأفة بحاله بما يسمى الموت الرحيم؛ وده علشان حالته الصحية تدهورت بشدة.
التكنولوجيا والعلم الحديث قدروا يقدمولنا حاجات كتير جدًا، لكن هل التقدم ده يقدر يرجع سلالة وحيد القرن الأبيض الشمالي من الانقراض ولا لأ؟

أضخم حيوان ثدي

حيوان وحيد القرن بيجي في المرتبة التانية كأضخم حيوان ثدي خارج البحار بعد فيل الاحراش الأفريقية وهو أضخم الحيوانات البرية على الإطلاق، وممكن يوصل وزن بعض الأنواع منه إلى 3600 كيلوجرام وأحياناً 4 آلاف كيلوجرام، وبيوصل طول جسمه لـ5 أمتار، وارتفاعه إلى 180 سنتي عند الكتف، وبرغم ضخامته دي إلا أنه سرعته بتوصل لـ50 كم في الساعة الواحدة.
وبالرغم من أن إسمه وحيد القرن إلا أنه أحيانًا بيمتلك قرنين مش قرن واحد، بل إن فيه أنواع ماعندهاش قرون خالص، ويتميز وحيد القرن بحاسة سمع وشم قوية، لكن الرؤية عنده بعافية شوية، موجود منه عدد قليل جدًا في البرية، والأنواع الباقية منه كلها مهددة بالانقراض؛ وده بسبب الصيد الجائر، واللي مخليه مستهدف من الصيادين، وهو الاعتقاد الشائع في بعض الدول الآسيوية إن قرونه ليها فوائد علاجية زي علاج الحمى والنقرس والضعف الجنسي وعلاج السرطان وغيرها من الأمراض.
وبسب الطلب الشديد عليها ارتفع سعرها بشكل خرافي لدرجة خلتها أكتر ربحًا من الأدوية، بل أحيانًا حتى أغلى من الذهب، وهتستغرب لو قلتلك إنهم في دولة زي فيتنام مثلاً بيحرصو على اقتناء بودرة قرون وحيد القرن وبيعتبروها رمز للثراء، يعني لو حد حب يجيب هدية فاخرة فالخيار الأمثل إنه يجيب بودرة قرن وحيد القرن.

وبالرغم من أن سايتس (CITES) حظرت التجارة بقرون وحيد القرن، وسايتس دي هي معاهدة التجارة العالمية لأصناف الحيوانات والنبات البري المهدد بالانقراض، وتم توقيع الاتفاقية في واشنطن في 3 مارس 1973، وبدأ العمل بها العام 1975، وهي تعتبر من أهم المعاهدات الدولية الخاصة بالحفاظ على الأنواع البرية من خطر الانقراض، وبالرغم من وجود معاهدات وقوانين دولية إلا إن عصابات الصيد الجائر كانت بتفنن في أساليب الصيد؛ للتهرب من السلطات، طيارات هيلكوبتر بقى ومعدات رؤية ليلية وأدوية كانو بيستعملوها لقتله.
وحيد القرن مسلمش من أذى الإنسان مش بس اصطياده وبيع قرونه، ده كمان حرمه من بيئته وموطنه الأصلي عن طريق تدمير الغابات والمراعي بتاعته؛ ببناء سدود ومشاريع طرق ومستوطنات بشرية ومزارع والمخلوق المسكين.

أنواع وحيد القرن

دلوقتي مابقاش موجود غير خمس أنواع من وحيد القرن تلاتة منهم في قارة آسيا
وأتنين في قارة أفريقيا.

أول نوع هو وحيد القرن الأسود (Black rhino)، أو وحيد القرن ذو الشفة الخطافية (hook-lipped rhinoceros)؛ وده لأن الشفه العليا واخده شكل خطاف، والحقيقة هو لونه مش أسود ولا حاجة، هو لونه الحقيقي رمادي وأتسمى كده؛ علشان يميزوه بس عن وحيد القرن الأبيض، والنوع ده وزنه يتراوح من 800 كيلو جرام إلى 1400 كيلو جرام، وبيمتلك قرنين الأمامي بيتراوح طوله من 50 سم لـ 130 سم، أما القرن الخلفي فبيبقى من 2.5 سم لـ50 سم، وموجود منه دلوقتي حوالي 5630 فرد فقط (تقريبا 8%) واللي كان موجود منه ما يقرب من 65000 فرد من 50 سنة، يعني خلال الـ 50 سنة اللي فاتو انخفض عددهم بنسبة 92% تقريبًا.

والنوع التاني هو وحيد القرن الهندي (Indian rhino)، وعلى عكس النوع الأول فهو بيمتلك قرن واحد فقط وطوله بيبقى من 20 لـ 40 سم، وبيتراوح وزنه من 1800 إلى 2700 كجم، تعداده دلوقتي وصل 3700 فرد بعد ما كان موجود منه 200 فقط في بداية القرن العشرين، وقصة النجاح العظيمة دي وراها إجراءات حماية وإدارات صارمة من الحكومات الهندية والنيبالية، واللي قدرت ترجع الأنواع دي من حافة الهاوية.

النوع التالت هو وحيد القرن السومطري (Sumatran rhino)، وسومطرة هي جزيرة في إندونيسيا واللي تعتبر موطنه الأصلي، وده أصغر الأنواع على الإطلاق وبيزن من 550 كجم لـ 1000 كجم بس، قرنه الأمامي طوله من 25 سم لـ 78 سم، والخلفي 7.5 سم، وهو الوحيد اللي جلده متغطي بالشعر، موجود منه دلوقتي أقل من 100 فرد فقط.

النوع الرابع هو وحيد قرن جاوة (Javan rhino)، أكتر نوع مهدد بالانقراض، وزنة يتراوح من 900 كجم إلى 2300 كجم، واللي عدد أفراده لا يتعدى 72؛ وموجودين كلهم في حديقة أوجونج كولون في إندونيسيا
(Ujong Kulon National Park)، والذكور عندها قرن واحد طوله 35 سم، أما الإناث لاتمتلك أي قرون.

أخر نوع معانا هو وحيد القرن الأبيض، ووهو أكبر الأنواع من حيث الوزن، بيوصل وزنه أحياناً إلى 4 أطنان، وهو في الحقيقة مش أبيض ولكن لونه رمادي، وبينقسم لنوعين شمالي وجنوبي، وبيمتلك وحيد القرن الأبيض قرنين طول القرن الأمامي بيتراوح من 94 سم لـ 101 سم في المتوسط، وممكن يوصل أحيانًا لمترين كاملين، والقرن الخلفي أقصر شوية بيبقى حوالي نص متر في المتوسط، تخيل بقى طعنة القرون دي تبقى عاملة إزاي.
وفي عام 1895م، كان موجود منه 100 فرد فقط، لكن مع الجهود المبذولة في حفظ النوع ده وصل عددهم دلوقتي إلى 18.67 فرد كلهم من النوع الجنوبي، والنوع الأبيض الشمالي للأسف انقرض من البرية ومش موجود منه غير 2 من الإناث دلوقتي في محمية “O.I.pejeta”.

Sudan وحيد القرن

“سودان Sudan” بطل قصتنا النهارده، وحيد قرن من النوع الأبيض الشمالي اتولد في شامب في جنوب السودان، ففي سنة 1973 بعدها وقع في الأسر بعد عامين من التجول في البرية واتنقل لحديقة حيوان “دفور كرالوف Dvur Kralove Zoo in the Czech Republic” في التشيك، واللي عاش فيها 34 سنة.
وفي ديسمبر 2009 مكنش موجود غير 8 بس من حيوان وحيد القرن الأبيض الشمالي، أربعة منهم بس كان عندهم القدرة على التكاثر 2 ذكور و2 من الإناث.
تم نقل الأربعة لمحمية (O.I.pejeta) الكينية، وكان منهم سودان ومعاه بنته (ناجينNajin)، وحفيدته (فاتو Fatu)، والذكر التاني واللي إسمه (سوني Suni)، على أمل أن عودتهم لبيئتهم الطبيعية والمراعي الواسعة والجو الأكثر دفئًا تساعدهم على التكاثر وحمايتهم من الانقراض.

لكن سوني مات سنة 2014، وبقى سودان هو آخر ذكر وحيد قرن أبيض شمالي وماتبقاش من نوعه غيره هو وبنته ناجين وحفيدته فاتو، وبالرغم من الجهود المبذولة لتزويج سودان بإناث من الفصيلة الجنوبية إلا إن المحاولات كلها فشلت؛ فحاول العلماء أنهم يشوفوا طريقة بديلة للحفاظ على جينات وحيد القرن الأبيض الشمالي، وده عن طريق تزاوج ناجين وفاتو بذكر من الفصيلة الجنوبية، ولكن برضو للأسف مانجحوش في ده، وتوفى سودان في سنة 2018 وكان عمره وقتها 45 سنة، وده يعتبر سن شيخوخة لوحيد القرن، وكده مابقاش موجود غير ناجين واللي عمرها 30 سنة، وفاتو واللي عمرها 20 سنة، وعلى الأرجح أنهم غير قادرين على الإنجاب، وتم الإعلان رسميًا عن انقراض فصيلة وحيد القرن الأبيض الشمالي.

قبل الانقراض

لحسن الحظ إن العلماء كانوا مستعدين لده من سنوات، البروفيسور الألماني “هيلدبراندت Hildebrandt” رئيس قسم التكاثر في معهد ليبينز لأبحاث الحياة البرية، قدر يجمع كمية من السائل المنوي لعدد من ذكور وحيد القرن الأبيض الشمالي، ومنهم سودان، وتم حفظها في الهيدروجين السائل بدرجة حرارة 196 تحت الصفر.
فكر البروفيسور في تقنية التلقيح الصناعي ونظم فريق دولي وابتكروا مخطط لإرجاع سلالة وحيد القرن الأبيض الشمالي، من خلال الإخصاب الخارجي في المختبر، لكن المشكلة تكمن في إن ناجين وفاتو، غير قادرين على الحمل؛ وده بسبب سنهم الكبير، وكمان عندهم مشاكل في جهازهم التناسلي؛ فقرروا إنهم ياخدوا بويضات من ناجين وفاتو والحمل يكون في أنثى من وحيد القرن الجنوبي، ودي هي المرة الأولى اللي هيتم فيها حمل اجنة وحيد قرن أبيض شمالي بواسطة وحيد القرن الأبيض الجنوبي بما يسمي (الأم البديلة)، ولكن العملية دي مكلفة جدًا، وقُدرت تقريبًا بعشر ملايين دولارات؛ وعلشان كده بيجمعو ليها تبرعات، والمشروع قائم عليه علماء من ألمانيا وكينيا والتشيك والمملكة المتحدة وإيطاليا.

في أغسطس 2019، نجحوا في إنه يجمع 5 بويضات من ناجين و5 من فاتو، وتم إرسال البويضات لإيطاليا، ونجحوا في إنضاج 7 بويضات منهم بعد ما تم حقنهم بحيوانات منوية، وفي 11 سبتمبر 2019، أعلنوا إنهم نجحوا في إنتاج جنينين في المرحلة الأولية، وفي يناير 2020 أعلنوا إنهم نجحوا في إنتاج جنين تالت، وهما دلوقتي متجمدين في النيتروجين المسال؛ علشان بعد كده هيتنقلوا لأنثى وحيد قرن جنوبي، والخطوة دي هي الأهم على الإطلاق على أمل أنه يتولد وحيد قرن أبيض شمالي جديد.