الكافيين واحد من الحاجات اللي ناس كتير مدمناها، ولو حد شافك قاعد بتنام وأنت عندك شغل أو مذاكرة، أول حاجة هيقولها لك اشرب قهوة أو شاي، طيب يا ترى إيه بقى اللي بيعمله الكافيين في الجسم والدماغ علشان يتقال كده؟.

أماكن تواجد الكافيين

مبدئيًا كده الكافيين مصدره الوحيد مش الشاي والقهوة بس زي ما هو شائع بين الناس، لكن له مصادر تانية، زي مثلًا الشيكولاتة الداكنة، والآيس كريم، وبعض أنواع البروتين؛ وكمان حبوب التخسيس، ومش أقل من 80% من البالغين على مستوى العالم كله بيستهلكوا كميات كبيرة منه لدرجة يخليه يأثر على الدماغ، ولذلك يعتبر الكافيين هو المادة ذات التأثير النفسي الأكثر استخدامًا في العالم كله.
الكافيين واحد من المنبهات الأكثر شيوعًا واستخدامًا في العالم، وفيه دراسات كتير اتعملت عنه بتشير إنه له تأثير على الجهاز العصبي المركزي للإنسان، بالإضافة لكونه واحد من المواد اللي بتعمل تغيير مؤقت في وظائف المخ، فهتلاقيه بيأثر على وظائف المخ من حيث المزاج، والسلوك، وعملية الإدراك، وده اللي بتعمله نفس العقاقير التانية؛ اللي زي الكحول، والنيكوتين، والهيروين.
ومعدلات استهلاكه بتتفاوت بين الرجال والنساء وبين الأعمار وبين الدول وبعضها، وممكن نقول أن متوسط استهلاكه على مستوى العالم من 110 إلى 300 مللي جم، وكوباية القهوة العادية المنتشرة اليومين دول نسبة الكافيين فيها حوالي 95 ملي جم، وشوت الإسبرسو بيحتوي على حوالي 63 ملي جرام من الكافيين، والفرق بينه وبين العقاقير التانية اللي قولنا عليها إنه مش مضر بالصحة زيهم، لكن ده برضو ميمنعش إن الإفراط في أي حاجة بتكون مضرة، طيب تفتكر ليه لما بتكون عايز تنام ووراك حاجة؛ بيقولوا لك اشرب قهوة أو شاي؟

بنية الكافيين

الكافيين بيشبه في البنية بتاعته مادة كيميائية بتتكون في الدماغ اسمها “الأدينوزين Adenosine”، والمادة دي هي اللي بتخلي الإنسان بيشعر بالنعاس، ونسبة الأدينوزين دي ما بتقلش غير بالنوم، طيب الكافيين بيعمل إيه بقى؟
لما بتشرب قهوة؛ الكافيين بيرتبط بمستقبلات الأدينوزين في الدماغ، وده بيخلي الكافيين ياخد مكان الأدينوزين في دماغك، وده اللي بيخلي الأدينوزين الباقي يبدأ يشوف مكان تاني يستقر فيه، ولما بيلاقيش مكان؛ الباقي منه بينتج مادة اسمها “الأدرينالين Adrenaline” علشان تحل مكانها، وبالتالي النتيجة النهائية بتكون إن الأدرينالين يكون هو المادة الموجودة مع الكافيين، والأدرينالين أصلًا بيعتبر هو كمان نوع من أنواع المنبهات، وبكده؛ الكافيين بيخدع الدماغ إنها مش مرهقة ولا حاجة، وبيخلي الإنسان يكون عنده شعور بالنشاط أكتر؛ ولمدة أطول.
ومن الجدير بالذكر؛ إن أدمغة الناس اللي بتستخدم الكافيين بصورة كبيرة بتنمي مستقبلات أكتر لمادة الأدينوزين في الدماغ، ويعتبر هو ده السبب الرئيسي اللي بيخلي مدمنين القهوة عايزين كميات أكبر منها، وده علشان بس يحصلهم نفس التأثير اللي ممكن يعمله فنجان صغير في شخص مش بيشربها كتير.

تأثير الكافيين على المزاج

فيه دراسة اتعملت سنة 2015؛ بتقول إن مادة الدوبامين بتشتغل بصورة أفضل في حالة إنها ترتبط بالكافيين، وده بيحصل لما بيتم منع مستقبلات الأدينوساين من العمل في الدماغ، والدوبامين هو مادة منبهة طبيعية بيتم إنتاجها في دماغ الإنسان، واللي البعض بتعبره مادة كيميائية ممتعة؛ وده علشان إنتاج الدوبامين بيحفز الدماغ على الشعور بالنشاط والسعادة.
الكافيين كمان من الحاجات اللي بتخلي الجسم ما يحسش بالاكتئاب، وده وضحته دراسات كتير اتعملت عن الموضوع ده، بتقول إن الاستهلاك المنتظم للكافيين بيكون مرتبط بعدم شعور الإنسان بالاكتئاب.
الكافيين بيعتبر أحد المكونات الرئيسية لمعظم أدوية الصداع والصداع النصفي، والباحثين بيقولوا إن الكافيين بيقلل من تدفق الدم للمخ بحوالي 27%، واللي بدوره بيقلل من عملية تضخم الأوعية الدموية في الدماغ؛ واللي بتسبق الصداع والصداع النصفي، كمان الكافيين بيساعد على زيادة فاعلية الأدوية اللي بينضاف ليها بنسبة تتعدى الـ 40%، وده حسب اللي ذكره موقع WebMD في مقال بعنوان “الرابط بين الكافيين والصداع”.

تأثير الكافيين على الذاكرة

الكافيين من المواد الفعالة جدا مع الذاكرة، وبيأثر عليها بشكل ملحوظ؛ إما سلبا؛ أو إيجابا، وفيه بعض الدراسات اللي اتعلمت بتقول إن الكافيين قادر على الحفاظ على ذاكرتك قوية لفترة طويلة، ومن ضمن الأبحاث دي كان بحث اتنشر في مجلة Neuroscience Nature بيقول إن الكافيين أو كوباية قهوة واحدة بس، كفيلة بإنها تقوي ذاكرتك لمدة بتوصل لحوالي 24 ساعة، ولكن فيه بعض الدراسات التانية بتقول إن لازم تستخدم الكافيين في الوقت اللي انت بتتلقى فيه المعلومات دي، ووضحت كمان بإنك لو ما عملتش كده؛ احتمال يكون وضع الذاكرة زي ما هو في الوضع الطبيعي والكافيين مش هيفيدك بحاجة.

أضرار الكافيين على الجسم

زي ما قلنا إن الإفراط في كل حاجة غالبًا بيكون مش كويس، وحتى لو الشئ ده مالهوش أضرار أو آثار جانبية؛ فمع الاستخدام الكتير بيتحول لحاجة مضرة، ويمكن كمان ما تقدرش تسيطر على ضرره ده بعد كده، والجرعة المناسبة للكافيين في اليوم هي 250 مللي جم، إلا بقى لو أنت متعود تستخدم نسبة أعلى من دي.
الكافيين من المواد اللي بتحفز الجسم على الصحيان والنشاط، ولكن الإفراط في تناول الكافيين بيزود نسبة الأدرينالين في الجسم، وزيادة الأدرينالين بتسبب توتر وقلق للإنسان، ده ناهيك عن إنها في بعض الأوقات ممكن تكون مميتة، كمان كل ما نسبة الكافيين زادت في جسمك؛ كل ما هتلاقي نفسك مش قادر تنام غير بعد مدة أطول، ده غير بقى الأعراض الجسدية التانية، زي ألم البطن، وآلام الضهر، وإصفرار الأسنان وضعفها.
وفيه أكتر من دراسة اتعملت؛ وضحت بإن الكافيين لو تم استهلاكه بصورة أكبر من الحد اللازم، ده بيأثر على المخ بصورة كويسة في اليوم الأول، لكن في اليوم التاني من استهلاك الكمية الكبيرة دي؛ غالبًا جسمك بيكسر وبتبقى مش قادر تقوم من مكانك.
الكافيين بيساعد عضلات الجهاز الهضمي على سرعة الإنقباض والانبساط، وده اللي بدوره بسأثر على عمليات كتير بيعملها الجهاز الهضمي، زي مثلًا عملية هضم الطعام، وزيادة الكافيين في البطن ممكن كمان تسبب مشكلة عند الناس المصابة بمرض الارتداد المعوي؛ أو الارتداد المعدي المريئي، وبمناسبة البطن بقى، فـ فيه معلومة من المعلومات الشائعة بين الناس؛ إن القهوة بتسبب قرحة المعدة، ولكن ده لحد دلوقتي ما تمش إثباته في أي دراسة من الدراسات اللي اتعملت.

الآثار الجانبية للكافيين على الجسم

من الآثار الجانبية للكافيين على الجسم بردو هي ارتفاع ضغط الدم، أبحاث كتير اتعملت وأثبتت النتائج بتاعتها إن الكافيين الكتير؛ بيرفع ضغط الدم، وطبعًا ارتفاع ضغط الدم بيسبب كوارث في الجسم، وخصوصًا لو أنت أصلًا جسمك ضعيف أو مش متعود على استخدام الكافيين بصورة كبيرة.
ده غير بقى إن الكافيين بيسبب سرعة ضربات القلب، وعدم استقرار في عضلة القلب بصورة مؤقتة، وده المرض اللي بيعرف باسم الرجفان الأذيني، واللي بردو غالبا وقتها هتكون نتيجة عدم الاستقرار ده؛ وخصوصًا لشخص بيعاني من أي مرض من الأمراض المزمنة، هي الوفاة.
والرجفان الأذيني ده ممكن تحصل للشباب اللي بيلعبوا رياضة وبيستخدموا مشروبات الطاقة اللي فيها نسبة كافيين عالية، ولكن فيه دراسات اتعملت النتايج أظهرت إن فيه بعض الناس اللي بتعاني من أمراض القلب؛ ممكن ما يحصلهمش حاجة لو استخدموا نسبة كبيرة من الكافيين.
وفي الأول والأخر لو استهلكنا معدلات معتدلة من كل حاجة هيكون أفضل كتير من الإفراط في كل حاجة، وفي النهاية الإفراط في استهلاك أي حاجة، الاعتدال أحسن وسيلة لتجنب المشاكل.