من حيث الحجم تعتبر الثديات هي المسيطرة على عالمنا النهاردة باعتبارها الأضخم على وجه الأرض، ويكفي تعرف إن أضخم حيوان على مر العصور هو من الثديات اللي مازالت عايشة ما بينها لحد النهاردة، ألا وهي الحوت الأزرق، طول الحوت البالغ بيتراوح من 24 متر لـ 30 متر، يعني بتتكلم فيما يعادل مبنى مكون من 10 طوابق، وده بخلاف وزنه اللي بيقترب من الـ 200 ألف كجم أو 200 طن، لكن خارج عالم البحار هل الثديات البرية بتحظى بنفس القدر من المكانة؟

البَهضَم أو الميجاثيريم Megatherium

بالرغم إن حيوإن الكسلان يعتبر من الثديات اللطيفة والمثيرة للاهتمام في عالمنا، خصوصاً مع حركته البطيئة ونومه الكتير اللي بيوصل أحياناً لـ 18 ساعة في اليوم، إلا إن أسلافه كانوا مختلفين عن الصورة ده تماماً، حيوان البَهضَم أو الميجاثيريم كان من الكسلانيات العملاقة اللي جابت الأرض من ملايين السنين قبل إنقراضها من حوالي 12 ألف سنة، وعلى عكس حيوان الكسلان اللي بيزن 5 كجم وطوله بيتراوح من 40 سم لـ 80 سم، البَهضَم كان أقرب لفيل ماشي على الأرض، مع طول يصل لـ 6 أمتار من الرأس للذيل، ووزن يقدر بـ 4 ألاف كجم أو 4 طن، ولما كان بيقف على ساقيه الخلفيتين، كان ارتفاعه بيوصل لـ 3 أمتار ونص، أي ما يعادل ارتفاع مبنى مكون من طابق واحد.

وعلى خلاف حيوان الكسلان النهاردة اللي بيقضي معظم وقته وهو متعلق على الأشجار بشكل مقلوب، فالـبَهضَم كان من الكسلانيات الأرضية، ومن الصعب حيوان بالحجم ده انك تشوفه متعلق رأساً على عقب على جذع شجرة، ومن المعلومات العجيبة عن الميجاثيريم إن العلماء بيقترحوا إنه كان هدف للصيد البشري، وإن من الممكن ان الناس قديماً كانوا بيتغذوا على لحمه، وبنى العلماء رأيهم بناءً على الأحافير اللي تم اكتشافها، واللي كان عليها علامات قطع بيُرجح انها من أدوات وأسلحة من صنع البشر.

وحيد القرن السيبيري أو إلاسموثيريم Elasmotherium

بالرغم إن عالمنا النهاردة مافيهوش غير 5 أنواع بس من الكركدنيات أو وحيد القرن، إلا إن ومن حوالي 2.6 مليون سنة، كان فيه 250 نوع مختلف من وحيد القرن بيجوبوا الأراضي الافريقية والأوراسية وأمريكا الشمالية، ومن أشهر الأنواع دِه من وأضخمها كان الـ إلاسموثيريم والمعروف باسم وحيد القرن السيبيري أو إلاسموثيريم، وبالرغم من اعتقاد العلماء إن الحيوان ده انقرض من أكتر من 100 ألف سنة، إلا إن الحفريات اللي تم اكتشافها مؤخراً بتوضح انه انقرض من أقل من 40 ألف سنة فاتت، وامتاز وحيد القرن السيبيري بقرن ضخم يعتبر هو الأضخم بين أقرانه على الإطلاق، سواء العايشين ما بينا النهاردة أو اللي انقرضوا بالفعل، مع طول يصل لحوالي 1.8 متر، وحجم الحيوان نفسه كان ضخم بشكل رهيب، مع طول يصل لـ 5 أمتار وارتفاع يقدر بـ 2.5 متر، ووزن يقترب من الـ 5 ألاف كجم أو 5 طن.

وحيد القرن الأبيض

حتى مع انقراض الغالبية العظمى من أنواع الكركدنيات أو وحيد القرن، إلا ان الأنواع الموجودة النهاردة معانا مازالت بتمتاز بمكانتها الضخمة وسط الثديات.
وحيد القرن الأبيض يعتبر هو أكبر أنواع وحيد القرن الحالية على مستوى العالم، بيعيش في السهول العشبية في افريقيا، وزيه زي كل أنواع الكركدنيات بيمتاز بحاستي شم وسمع قوية، ومعتاد على انه يمترمغ في الطين عشان يوفر لنفسه طارد طبيعي للحشرات بخلاف الوقاية من أشعة الشمس، وبيمتلك وحيد القرن الأبيض زوجين من القرون، واحد منهم بيبقى أطول من التاني بفرق محترم، وممكن يوصل طول القرن الأمامي لما يقرب من المتر ونصف، والقرن ده هو سبب هلاك الحيوان المسالم، لأن الصيادين بيستهدفوهم عشانه، وبيتم استخدامه في الطب التقليدي بالصين وتايوان وسنغافورة، وبيصل طول وحيد القرن الأبيض من رأسه لقاعدة ذيله لما يقرب من 4 أمتار، وبيتراوح وزنه من 1600 كجم لـ 4000 كجم أو 4 طن.

الغَوْر gaur أو البيسون الهندي

الغَوْر والمعروف كمان باسم البيسون الهندي، هو أكبر أنواع الماشية البرية في العالم على الإطلاق، موطنه الأصلي جنوب اسيا وجنوب شرقها، وهو من الحيوانات المهددة بخطر الإنقراض من سنة 1986 ميلادياً، بل إنه انقرض بالفعل من بعض المناطق زي سيرلانكا وبنجلاديش، وعلى مدار الـ 3 أجيال الأخيرة انخفضت أعداده بأكتر من 70% من اللي كانت عليه في الماضي، وبيمتاز النوع ده من البقريات بقرون في كلا الجنسين، وبينموا من جانبي الرأس قبل ما ياخدوا شكل منحني في اتجاه بعضهم، وبيتراوح طول القرون من 60 سم لـ 115 سم، وجسم الحيوان نفسه بيتراوح طوله من مترين و50 سم لـ 3 متر و30 سم، وذيله ممكن يضيفله 100 سم كمان، وممكن يوصل ارتفاعه عند الكتفين لـ مترين و 20 سم، أما عن الوزن بقى فأنت بتتكلم في رقم يصل لأكتر من 1500 كجم.

فرس النهر

فرس النهر من الحيوانات اللي بتحب المياه لأبعد حد، وده كان السبب في تسميتهم عن طريق الاغريق باسم “حصان النهر أو فرس النهر”، وبيقضي فرس النهر ما يصل لـ 16 ساعة من يومه بالمياه في الأنهار والبحيرات عشان يخف من حدة أشعة الشمس الافريقية الحارة عليه، وبالرغم من حجمهم العملاق اللي بيضعهم في قائمة أضخم الثديات على الأرض، إلا انهم بيمتازوا برشاقة في المياه وبيعرفوا يسبحوا كويس، ناهيك عن انهم بيقدروا يحسبوا نفسهم تحت المياه لمدة تصل لـ 5 دقائق كاملين، وعنيهم وأنفهم بيقعوا أعلى رؤوسهم، وده بيسمحلهم انهم يشوفوا ويتنفسوا وجسمهم مغمور بالكامل تحت المياه.
وبيعتاد فرس النهر انه يتشمس أحياناً على الشط وبيفرز وقتها مادة زيتية لونها أحمر، والقصة ده أدت لظهور أسطورة عنهم وهي انهم بيعرقوا دم، بس الحقيقة إن السائل ده عبارة عن مرطب للجلد وبيديهم وقاية ضد أشعة الشمس وممكن يوفرلهم حماية كمان ضد الجراثيم، فرس النهر من الحيوانات الضخمة جداً على مستوى طول جسمه بخلاف وزنه، فطوله ممكن يوصل لـ 4 أمتار كاملين، ووزنه بيتراوح من 1500 كجم لـ 4000 كجم.

فيل الأحراش الافريقية و الفيل الآسيوي

فيل الأحراش الافريقية

أضخم الثديات في عالمنا النهاردة خارج عالم البحار وأضخم الحيوانات البرية على الإطلاق، هو فيل الأحراش الافريقية، ارتفاع الفيل أصلاً بخلاف وزنه بيخليك وأنت شايفه كأنك بتبص على مبنى مكون من طابق واحد، فــارتفاع فيل الأحراش الافريقية بيتراوح من مترين ونصف لـ 3 أمتار ونصف، أما عن وزنه فهو بيتراوح من 4000 كجم لـ 7000 كجم أو 7 طن كاملين، وأنيابهم الطويلة مش بتتوقف عن النمو لنهاية عمرها اللي بيوصل أحياناً لأكتر من 80 سنة، والحجم المهول للفيلة بيتطلب كميات مهولة من الطعام، عشان كده بنلاقي ان الفيل ممكن يلتهم يومياً من الجذور والأعشاب والفواكه ما هو مقداره 135 كجم، والكلام ده بخلاف المياه اللي ممكن توصل في اليوم الواحد لـ 200 لتر كاملين.
وبالرغم من الحجم الخرافي لفيل الأحراش الافريقي إلا إن الفيلة الآسيوية مش متأخرين عنهم كتير على مستوى الضخامة.

الفيلة الآسيوية

فــالفيل الآسيوي بيوصل ارتفاعه عند الكتفين لـ 2.8 متر، ووزنه بيتراوح من 3000 كجم لـ 6000 كجم.

ماموث السهوب steppe mammoth

من المنطقي ان أسلاف أضخم الحيوانات البرية على سطح الأرض النهاردة يبقوا ما يختلفوش عن نسلهم كتير، إن ما كانوش أضخم كمان، من أنواع الماموث اللي توصلها العلماء من خلال حفرياتها، يعتبر ماموث السهوب هو أكبرهم على الاطلاق، الحيوان العملاق كان بيعيش في شمال الأراضي الأوراسية وخصوصاً سيبيريا خلال أوائل ومنتصف العصر الجليدي، وبيقدر العلماء وزن النوع ده من الماموث برقم يتراوح من 9 لـ 14 طن وارتفاع يتراوح ما بين 4 أمتار لـ 4 أمتار ونصف، وامتاز ماموث السهوب بأنياب طويلة جداً ممكن يوصل طولها لـ 4.9 متر، ناهيك طبعاً عن وزنها.

وفي عام 2015 بالقرب من ضفاف نهر “لينا Lena ” في سيبيريا، تم العثور على هيكل عظمي شبه كامل لـ ماموث السهوب، وبالرغم ان أنيابه كان طولهم مترين ونصف بس، إلا ان وزن الزوج وصلوا لـ 150 كجم.

باراسيراثيريم Paraceratherium

الباراسيراثيريم هو عبارة عن نوع منقرض من وحيد القرن، لكنه وعلى خلاف تصنيفه كان بدون أي قرون، وعلى عكس الصورة المتعارف عليها لوحيد القرن، فالحيوان ده كان بيتمتع بجسم طويل ووزن رهيب ورقبة طويلة، ولأكتر من قرن كامل كان العلماء والباحثين بيعتبروه انه أكبر الثديات اللي مشيت على سطح الأرض، عاش الباراسيراثيريم في سهول أوراسيا من 20 لـ 35 مليون سنة فاتت، وبالرغم ان التقديرات الأولية للعلماء عن وزنه بعد اكتشاف أولى حفرياته كان مبالغ فيها، إلا إن الرقم اللي اتفق عليه العلماء حالياً ما زال غير قليل بالمرة، العلماء بيقدروا وزن الحيوان العملاق بـ رقم يتراوح من 15 لـ 20 طن، وبيقترب طول البارسيراثيريم من 8 أمتار كاملين، وارتفاعه يقدر بـ 4.8 متر.

باليولوكسودون ناماديكس أو فيل الانياب المستقيمة الآسيوي

زي ما الفيلة بتتربع على عرش أضخم الحيوانات البرية النهاردة، كانت هي المتربعة عليه من ملايين السنين، باليولوكسودون ناماديكس Palaeoloxodon namadicus أو فيل الأنياب المستقيمة الآسيوي، هي نوع من أفيال عصر ما قبل التاريخ اللي جابت جميع أنحاء الأراضي الاسيوية من الهند أول مكان تم اكتشاف حفرياته للمرة الأولى وصولاً لليابان، وبيعتقد انها انقرضت من حوالي 24 ألف سنة بالقرب من أواخر العصر الجليدي، وبناءً على الحفريات اللي تم العثور عليها للفيل الضخم، فالعلماء بيقدروا ارتفاعه برقم يتراوح من 4 أمتار ونصف لـ 5 أمتار كاملين، أما عن وزنه فيقدر بحوالي 24 ألف كجم أو 24 طن، عشان يكون هو أضخم الثديات البرية في التاريخ.